အသင်းပြောင်းရွှေ့လိုနေတဲ့ အဲဗာတန်တိုက်စစ်ကစားသမား ဂေါ်ဒွန်ဟာ အသင်းဆီပြန် လာမှာမဟုတ်တော့ကြောင်း အသင်းတာဝန်ရှိသူတွေကို ပြောကြားလိုက်ပါတယ်။
အသက် ၂၁ နှစ်ရှိ အင်္ဂလန်ယူ ၂၁ လက်ရွေးစင် အန်တိုနီဂေါ်ဒွန်ဟာ ခြေစွမ်းပြနေတဲ့ ကစားသမားတစ်ဦးဖြစ်ပေမဲ့ အသင်းက တန်းဆင်းဇုန်ထဲရောက်ချိန်မှာ ထွက်ခွါဖို့ပြင်ဆင်နေတာပါ။
ဂေါ်ဒွန်ကို နယူးကာဆယ်အသင်းက ပေါင်သန်း ၅၀ ဝန်းကျင်နဲ့ ကမ်းလှမ်းခဲ့ပေမဲ့ အဲဗာတန်အသင်းက လက်မခံသေးပါဘူး။
ဒါပေမဲ့ကစားသမားကိုယ်တိုင်က လေ့ကျင့်ရေး ၃ ရက် ပျက်ကွက်ခဲ့သလို ပြန်မလာတော့ဘူးလို့ သတင်းပို့ခဲ့တာကြောင့် နယူးကာဆယ်ရဲ့ကမ်းလှမ်းချက်ကို လက်ခံသွားရဖို့ ရှိပါတယ်။
အဲဗာတန်အကယ်ဒမီထွက်ကစားသမားဖြစ်သူ ဂေါ်ဒွန်ဟာ ၂၀၁၇ ခုနှစ်ကတည်းက အသင်းကြီးမှာ ပွဲထွက်ခွင့်ရခဲ့ပြီး စုစုပေါင်း ပွဲ ၈၀ လောက် ကစားထားပြီးဖြစ်ပါတယ်။
ကွင်းလယ်လူ ကာမာဗင်ဂါအနေနဲ့ အသင်းပြောင်းဖို့ မရှိကြောင်း စပိန်ထိပ်သီး ရီးရဲလ်မက်ဒရစ်အသင်းရဲ့ နည်းပြ အန်စလော့တီက အတည်ပြုသွားပါတယ်။
ပြင်သစ်ကွင်းလယ်ကြယ်ပွင့်ကို အာဆင်နယ်နဲ့ မန်ယူအသင်းတွေက အငှားစာချုပ်နဲ့ ခေါ်ယူလိုနေတယ်လို့ သတင်းထွက်ပေါ်နေချိန်မှာ နည်းပြ အန်စလော့တီက ဖြေရှင်းသွားခဲ့တာပါ။
“ကျနော်တို့အနေနဲ့ ကာမာဗင်ဂါကို ထွက်ခွါခွင့်မပြုနိုင်ပါဘူး။ မိုဒရစ်နဲ့ တိုနီခရုစ်တို့လိုပဲ သူ့ကို ထိပါးလို့မရနိုင်ပါဘူး” လို့ နည်းပြအန်စလော့တီကပြောပါတယ်။
အသက် ၂၀ နှစ်ပဲရှိသေးတဲ့ ပြင်သစ်လက်ရွေးစင် ကာမာဗင်ဂါဟာ ၂၀၂၁ ခုနှစ်က ရင်းနက်စ်အသင်းကနေ ပြောင်းရွှေ့လာသူဖြစ်ပြီး ရီးရဲလ်မက်ဒရစ်အတွက် စုစုပေါင်း ၆၆ ပွဲမှာ ၂ ဂိုးသွင်းပေးထားပါတယ်။
