ဘုန်းမောက်နဲ့ပွဲမှာ တကျော့ပြန် ချဲလ်ဆီးနည်းပြဘ၀ ပထမဆုံးနိုင်ပွဲရခဲ့တဲ့အပေါ်မှာ ကစားသမား တွေအနေနဲ့ စိတ်ကြိုက်ပျော်ရွှင်သင့်ကြောင်း နည်းပြ လမ်းပတ်က ပြောပါတယ်။

ချဲလ်ဆီးအသင်းဟာ နည်းပြလမ်းပတ်တာဝန်ယူခဲ့တဲ့ ဝုဗ်အသင်းနဲ့ပွဲစဉ်ကနေ စတင်ပြီး ဘုန်းမောက်နဲ့ ပွဲမတိုင်ခင်အထိ ခြောက်ပွဲဆက်တိုက် ရှုံးနိမ့်ခဲ့တာပါ။ 

ဘုန်းမောက်အသင်းကို ၃ ဂိုး ၁ ဂိုးနဲ့ အနိုင်ယူခဲ့ပြီးနောက်မှာတော့ အဲဒီလို နိုင်ပွဲအရသာကို မခံစားရတာ အတော်အသင့်ကြာနေပြီဖြစ်လို့ ကစားသမားတွေအနေနဲ့ စိတ်လွတ်ကိုယ်လွတ် ပျော်ရွှင်အောင်ပွဲခံသင့်ကြောင့် နည်းပြ လမ်းပတ်က တိုက်တွန်းခဲ့တာပါ။ 

ဒီနိုင်ပွဲဟာ ရှေ့ဆက်လျှောက်ဖို့အတွက် သေးငယ်တဲ့ခြေလှမ်းတစ်ခုဖြစ်ပြီး ရာသီကုန်တဲ့အထိ နိုင်ပွဲတွေ ရယူနိုင်ဖို့ အရေးကြီးကြောင်း နည်းပြလမ်းပတ်က ပြောပါတယ်။ 

ရှုံးပွဲတွေ့ခဲ့ပေမဲ့အသင်သားတွေကို အရင်ကထက်ပိုပြီး ချစ်ကြောင်း အာဆင်နယ်နည်းပြအာတီ တာကပြောပါတယ်။

အာဆင်နယ်အသင်းဟာ မနေ့ညက ကစားခဲ့တဲ့ အဲဗာတန်နဲ့ပွဲစဉ်မှာ တစ်ဂိုး ဂိုးမရှိနဲ့ရှုံးနိမ့်ခဲ့ပြီး အခုနှစ်ရာသီ ပရီးမီးယားလိဂ်မှာ ၂ ပွဲမြောက် ရှုံးပွဲတွေ့ခဲ့တာပါ။

နည်းပြအာတီတာကတော့ အာဆင်နယ်အသင်းသားတွေကို အရင်ကထက်ပိုပြီး ချစ်ကြောင်းနဲ့ ခက်ခဲတဲ့ ခရီးလမ်းကို စည်းလုံးညီညွတ်စွာနဲ့ ဖြတ်သန်းသွားကြရမှာဖြစ်ကြောင်း ပြောပါတယ်။ 

“အသင်းသားတွေအပေါ် ကျနော်ဘယ်လောက်ချစ်သလဲဆိုတာ သူတို့ကို သိစေချင်တယ်။ လွန်ခဲ့တဲ့ ၃ နာရီ၊ တစ်ပတ်၊ တစ်လ ဒါမှ မဟုတ် ၃ လ လောက်က အသင်းထက် လက်ရှိအသင်းကိုပိုပြီး ချစ်ပါတယ်။ ကစားသမားတွေရဲ့ စိတ်ထဲမှာ အနိုင်ရလိုစိတ်နဲ့ ခြေစွမ်းပြသနိုင်မှုသာရှိနေရင် နောက်တဆင့်ကိုသွားဖို့ကလွယ်ပါတယ်” လို့ နည်းပြအာတီတာကပြောပါတယ်။

အာဆင်နယ်ဟာ အဲဗာတန်ကိုရှုံးနိမ့်ခဲ့မှုကြောင့် မန်စီးတီးကို ၈ မှတ်ဖြတ်နိုင်မယ့် အခွင့်အရေး လက်လွှတ်ခဲ့ရပြီး ၅ မှတ်အကွာနဲ့ အဆင့်တစ်နေရာမှာ ဆက်ပြီးရပ်တည်နေပါတယ်။