ယူဂန္ဓာနိုင်ငံရဲ့ မြို့တော်ကမ်ပါလာမှာ အသေခံဗုံးခွဲမှု ၃ ခုအတွင်း လူ ၃ ယောက်ထက်မနည်း သေဆုံးပြီး အယောက် ၃၀ ကျော် ဒဏ်ရာရခဲ့တယ်လို့ ရဲတွေက နိုဝင်ဘာ ၁၆ ရက်မှာ ပြောပါတယ်။

ဒီပေါက်ကွဲမှုတွေကြောင့် လွှတ်တော်အမတ်တွေနဲ့ တခြားလူတွေ အပြေးအလွှား ထွက်ပြေး ပုန်းအောင်းခဲ့ရတာပါ။ အနောက်နိုင်ငံတွေရဲ့ လုံခြုံရေး အထောက်အပံ့နဲ့ နှစ်ချီ ပျိုးထောင်နေရတဲ့ အရှေ့အာဖရိကနိုင်ငံမှာ ဒီပေါက်ကွဲမှုတွေကြောင့် ထိတ်လန့်တုန်လှုပ်ခဲ့ကြပါတယ်။

ရဲတပ်ဖွဲ့ ပြောခွင့်ရ ဖရဒ်အီနန်ဂါက “ဒဏ်ရာရသူ ၃၃ ယောက်ထက်မနည်းကို ဆေးရုံတင် ကုသပေးနေရတယ်။ ၅ ယောက်က အသည်းအသန် အခြေအနေမှာ ရှိနေတယ်။ ဗုံးခွဲသူ ၃ ယောက် အပါအဝင် စုစုပေါင်း သေဆုံးသူ ၆ယောက် ရှိတယ်။ သေဆုံးသူတွေထဲမှာ ရဲတွေလည်း ပါတယ်” လို့ ပြောပေမဲ့ အသေးစိတ်အချက်အလက်တွေကိုတော့ မပြောခဲ့ပါဘူး။

သေဆုံး ဒဏ်ရာရသူတွေထဲမှာ ရဲ ၂ ယောက်ပါတယ်လို့ သံတမန်တယောက်က ရိုက်တာကို ပြောပါတယ်။

ထောက်လှမ်းရေး အချက်အလက်တွေအရ အိုင်အက်စ် စစ်သွေးကြွတွေနဲ့ မိတ်ဖက်ဖြစ်တဲ့ မဟာမိတ်ဒီမိုကရေစီအင်အားစု (ADF) မှာ တာဝန်ရှိတယ်လို့ ရဲတွေက ပြောပါတယ်။

ယူဂန္ဓာနိုင်ငံမှာ အရင်က အယ်လ်ကေဒါတွေနဲ့ ချိတ်ဆက်ထားတဲ့ ဆိုမာလီသူပုန်အုပ်စု အယ်လ်ရှာဘတ်တွေက လူသေတဲ့အထိ တိုက်ခိုက်ခဲ့ဖူးပါတယ်။

ကုလသမဂ္ဂ ကျောထောက်နောက်ခံပေးထားတဲ့ အာဖရိကသမဂ္ဂ ငြိမ်းချမ်းရေးတပ်တွေရဲ့ အစိတ်အပိုင်းအဖြစ် ယူဂန္ဓာစစ်သားတွေက ဆိုမာလီနိုင်ငံထဲက အယ်လ်ရှာဘတ်တွေနဲ့ တိုက်ခိုက်ဖူးပါတယ်။

ဒီတိုက်ခိုက်မှုက ဘယ်သူ့လက်ချက်ဆိုတဲ့ တာဝန်ယူမှုလည်း မရှိသေးသလို အယ်လ်ရှာဘတ် စစ်သွေးကြွအုပ်စုရဲ့ ပြောခွင့်ရသူဆီက မှတ်ချက်ကိုလည်း မရသေးပါဘူး။

ဆိုမာလီနိုင်ငံမြို့တော် မိုဂါဒစ်ရှူးက စစ်စခန်းတခုမှာ ဇွန်လ ၁၅ ရက်က အသေခံ ဗုံးခွဲမှုကြောင့် လူ ၁၅ ယောက်ထက်မနည်း သေဆုံးတယ်လို့ မာဒီနာဆေးရုံမှာ အလောင်းတွေကို ကိုယ်တိုင် ရေတွက်ခဲ့ရတဲ့ မျက်မြင်သက်သေတယောက်ကို ကိုးကားပြီး ရိုက်တာသတင်းဌာနက ပြောပါတယ်။

သေဆုံးသူတွေဟာ စစ်စခန်း တိုက်ခိုက်မှုအတွင်း အသတ်ခံရသူတွေလို့ ဆေးရုံ အရာရှိတွေက အတည်ပြုပါတယ်။ ဘယ်သူ့လက်ချက်ဆိုတာတော့ ချက်ချင်း တာဝန်ခံမှု မရှိသေးပါဘူး။ 

အာဖရိက ဦးချိုစွန်းမှာရှိတဲ့ ဆိုမာလီနိုင်ငံအတွင်း အယ်လ်ရှာဘတ် အစ္စလာမစ်စစ်သွေးကြွ အုပ်စုက ဗုံးခွဲတာတွေ မကြာခဏ လုပ်လေ့ရှိပါတယ်။

မြို့တော်က ဗိုလ်ချုပ်ဒေဂါဘန် စစ်သင်တန်းစခန်း အပြင်ဘက် စစ်ဆေးရေးဂိတ်မှာ အသေခံ ဗုံးခွဲသမားက ဖောက်ခွဲခဲ့လို့ အသစ်စုဆောင်းထားတဲ့ စစ်သည်လောင်း ၁၀ ယောက် သေဆုံးပြီး တခြားလူ အယောက် ၂၀ လောက် ဒဏ်ရာရတယ်လို့ ဆိုမာလီ စစ်တပ် အရာရှိတယောက်က ပြောပါတယ်။