၂၀၂၁ ခုနှစ်မှာ ကဘူးလ် နိုင်ငံတကာလေဆိပ်ကို အသေခံဗုံးခွဲတိုက်ခိုက်မှုနောက်ကွယ်က အိုင်အက်စ်စစ်သွေးကြွတဦးကို တာလီဘန်တို့က သတ်ဖြတ်ခဲ့ပြီလို့ အမေရိကန် တာဝန်ရှိသူတွေက ဧပြီ ၂၅ ရက်မှာ ပြောလိုက်ပါတယ်။

အာဖဂန်ကို တာလီဘန်တို့ သိမ်းပိုက်မှုအပြီး အမေရိကန်တပ်တွေနဲ့ အာဖဂန်နစ္စတန် နိုင်ငံသားတွေ ထွက်ပြေးလွတ်မြောက်စေဖို့ အမေရိကန်တပ်တွေက ကြိုးစားနေတုန်း သြဂုတ် ၂၆ ရက်က ဒီအသေခံတိုက်ခိုက်မှုကြောင့် အမေရိကန်တပ်ဖွဲ့ဝင် ၁၃ ဦးနဲ့ အရပ်သား အများအပြား သေဆုံးခဲ့ရပါတယ်။

အိမ်ဖြူတော် ပြောရေးဆိုခွင့်ရှိသူ ဂျွန်ကာဘီက “သူဟာ အဘ်ဘေး ဝင်ပေါက်လိုမျိုး စစ်ဆင်ရေးတွေကို ကြံစည်မှုမှာ တိုက်ရိုက်ပါဝင်ပတ်သက်နေတဲ့ ခိုရာစန်ပြည်နယ်အခြေစိုက် အိုင်အက်စ် စစ်သွေးကြွအဖွဲ့ ISIS-K ရဲ့ အဓိကအရာရှိဖြစ်ပြီး အခုတော့ တိုက်ခိုက်မှုတွေကို ကြံစည်လုပ်ဆောင်တာတွေ မလုပ်နိုင်တော့ဘူး”လို့ ကြေညာချက်မှာ ပြောပါတယ်။

ဗုံးပေါက်ကွဲမှုဖြစ်ပွားရာ ကဘူးလ်လေဆိပ်က Abbey Gate ဝင်ပေါက်ရဲ့ တရားဝင်နာမည်ကိုတော့ မဖော်ပြခဲ့ပါဘူး။

အာဖဂန်နစ္စတန်ထဲက အစ္စလာမ္မစ်နိုင်ငံတော်အဖွဲ့ (အိုင်အက်စ်) တွေဟာ တာလီဘန်တွေရဲ့ ရန်သူပါ။ အိုင်အက်စ်တွေကို သစ္စာခံတဲ့ တိုက်ခိုက်ရေးသမားတွေဟာ ၂၀၁၄ ခုနှစ်မှာ အာဖဂန်နစ္စတန် အရှေ့ပိုင်းမှာ ပထမဆုံး ပေါ်လာခဲ့ပြီး နောက်ပိုင်း တခြားနေရာတွေအထိပါ နယ်မြေချဲ့ထွင်ခဲ့ပါတယ်။

ပါကစ္စတန်နိုင်ငံ အနောက်တောင်ပိုင်းမှာ နိုဝင်ဘာ ၃၀ ရက်က ပိုလီယိုကာကွယ်ဆေးထိုး အဖွဲ့အတွက် စောင့်ကြပ်လိုက်ပါလာတဲ့ ရဲတပ်ဖွဲ့ဝင်တွေကို တာလီဘန် အသေခံဗုံးခွဲသမားက အကြမ်းဖက် တိုက်ခိုက်ခဲ့တာကြောင့် လူ ၄ ဦး သေဆုံးပြီး ၃၀ ကျော် ဒဏ်ရာရရှိခဲ့ကြောင်း ရဲတပ်ဖွဲ့က ပြောပါတယ်။

စစ်သွေးကြွတွေ အပစ်အခတ်ရပ်စဲပြီး ၂ ရက်အကြာမှာပဲ ခုလိုတိုက်ခိုက်ခံရတာလို့ ဆိုပါတယ်။

တယ်ရိခ် အီ တာလီဘန် ပါကစ္စတန် (TTP) အဖွဲ့က ဘာလိုချီစတန်ပြည်နယ်ရဲ့ မြို့တော် ကူအက်တာအနီးက တိုက်ခိုက်မှုအတွက် သူတို့လက်ချက်ဖြစ်ကြောင်း ပြောဆိုထားပါတယ်။

အသေခံဗုံးခွဲသမားကြောင့် သေဆုံးသွားရသူတွေထဲမှာ ရဲသားတဦး၊ အမျိုးသမီးတဦးနဲ့ ကလေးတဦးလည်း ပါဝင်ပြီး ဒဏ်ရာရရှိသူတချို့မှာ စိုးရိမ်ရတဲ့အခြေအနေမှာရှိကြောင်း ရဲအရာရှိ အဗ္ဗဒူလ် ဟတ်ခ်က ရိုက်တာသတင်းဌာနကို ပြောကြားခဲ့ပါတယ်။

ဒဏ်ရာရရှိသူတဦးဟာ ဆေးရုံမှာ သေဆုံးသွားကြောင်း အရာရှိ ဝါဆင်မ် ဘိုက်ဂ်က ပြောပါတယ်။ ဒဏ်ရာရရှိသူတွေထဲမှာ ရဲအရာရှိ ၁၅ ဦးလည်း ပါဝင်တယ်လို့ ဆိုပါတယ်။

ပါကစ္စတန်ရှိ အစ္စလာမ္မစ်စစ်သွေးကြွတွေဟာ ပိုလီယိုကာကွယ်ဆေးထိုးအဖွဲ့တွေကို ပစ်မှတ်ထားလေ့ရှိပြီး ကာကွယ်ဆေးထိုးခြင်းဟာ သူတို့ကို စုံစမ်းထောက်လှမ်းဖို့နဲ့ မွတ်ဆလင်တွေကို မျိုးမအောင်စေတဲ့ အနောက်တိုင်းကိရိယာတခုဖြစ်ကြောင်း ကောလာဟလတွေကို ဖြန့်ဖြူးထားပါတယ်။