ရန်ကုန်တိုင်း စစ်ကြောရေးတာဝန်ခံ ဗိုလ်မှူးတယောက်နဲ့ တပ်ကြပ်ကြီးတယောက်ကို အသေဖမ်းဆီးမိပြီး လက်နက်တချို့လည်းရခဲ့တယ်လို့ ပဲခူးတိုင်း စစ်ဒေသခွဲက ဇန်နဝါရီ ၂၃ ရက် ဒီကနေ့ ထုတ်ပြန်ပါတယ်။
ရန်ကုန်၊ ပြည်လမ်း ၉ မိုင်ခွဲ North Point - Ocean စင်တာနားမှာရှိတဲ့ အမှတ်(၁) စစ်ဘက်ရေးရာလုံခြုံရေးအကူတပ် စစ်ကြောရေးတာဝန်ခံ စရက(၁) တပ်မှူး ဗိုလ်မှူးသန်းထွဋ် (ဒုဗိုလ်မှူးကြီး အစမ်းခန့်)နဲ့ တပ်ကြပ်ကြီး မြင့်အောင်တို့ကို ရန်ကုန်- မန္တလေးအမြန်လမ်းပေါ်မှာ ဇန်နဝါရီ ၂၂ ရက် မနေ့နေ့လယ် ၁ နာရီ ၄၅ မိနစ်လောက်က ပစ်ခတ်ဖမ်းဆီးခဲ့တာလို့ ဆိုပါတယ်။
သူတို့လိုက်ပါလာတဲ့ကား ထွက်ခွာလာတာကို သတင်းရလို့ တော်လှန်ရေးတပ်ဖွဲ့ဝင်တွေ ကင်းပုန်းဝပ် စောင့်ဆိုင်းနေခဲ့ပြီးနောက် ဖုန်းဆက်ပြီး ကားကိုရပ်ခိုင်းခဲ့တာလို့ ဆိုပါတယ်။
ကားရပ်တန့်ပြီးနောက် တော်လှန်ရေးတပ်ဖွဲ့ဝင်တွေက ဝိုင်းဝန်းပိတ်ဆို့ဖမ်းဆီးတုန်းမှာ အဲဒီဗိုလ်မှူးနဲ့ တပ်ကြပ်ကြီးက အသင့်ပါလာတဲ့ လက်နက်တွေနဲ့ ပြန်ခုခံလို့ တော်လှန်ရေးတပ်ဖွဲ့ဝင်တွေက ပစ်ခတ်ဖမ်းဆီးခဲ့ပြီး နေရာမှာပဲ ပွဲချင်းပြီး သေဆုံးသွားတယ်လို့ ထုတ်ပြန်ထားပါတယ်။
သူတို့ဆီကနေ ၉ မမ ပစ္စတို ၂ လက်၊ ကျည် ၁၂ တောင့်၊ ကားလိုင်စင်နဲ့ စာရွက်စာတမ်းတချို့ကို သိမ်းဆည်းရရှိခဲ့ပြီး ကားကိုတော့ မီးရှို့ဖျက်ဆီးခဲ့တယ်လို့ ဆိုပါတယ်။
စစ်ကြောရေးတာဝန်ခံ စရက(၁) တပ်မှူး ဗိုလ်မှူးသန်းထွဋ်ဟာ UG တော်လှန်ရေးရဲဘော်တွေကို အသွင်ယူစုံစမ်းဖမ်းဆီး စစ်ကြောရေးလုပ်နေသူဖြစ်တယ်လို့လည်း ဆိုပါတယ်။
အဲဒီစစ်ကောင်စီတပ်သားတွေနဲ့ အတူပါလာတဲ့ အမျိုးသား ၂ ယောက်ကို စစ်ဆေးမေးမြန်းဖို့ ခေါ်လာတုန်းမှာ လက်နက် လုယူထွက်ပြေးဖို့ ကြိုးစားတာကြောင့် ပစ်ခတ်ဖမ်းဆီးရာမှာ သူတို့ ၂ ယောက်လုံးလည်း သေဆုံးသွားတယ်လို့ ဆိုပါတယ်။
ဒီလှုပ်ရှားမှုကို တောင်ငူခရိုင် PDF တပ်ရင်း ၃၅၀၁၊ တပ်ခွဲ ၃ နဲ့ တပ်ခွဲ ၆ တို့ ပူးပေါင်းလုပ်ခဲ့တာဖြစ်ပြီး တပ်ဖွဲ့ဝင်တွေကတော့ ထိခိုက်ဒဏ်ရာမရှိဘဲ ဆုတ်ခွာနိုင်ခဲ့တယ်လို့လည်း ဆိုပါတယ်။
