ဝက်စ်ဟမ်းကွင်းလယ်လူ ဒက်ကလန်ရိုက်စ်ဟာ အာဆင်နယ်နဲ့ လီဗာပူးအသင်းတို့ ဝယ်ယူနိုင်စွမ်းရှိတဲ့ ကစားသမားမဟုတ်ကြောင်း အင်္ဂလန်နဲ့ အာဆင်နယ် နောက်ခံလူဟောင်း မာတီကီယွန်က သုံးသပ်ပြောပါတယ်။

အင်္ဂလန်ကွင်းလယ်လူ ရိုက်စ်အတွက် ဝက်စ်ဟမ်းအသင်းက ပေါင်သန်း ၁၀၀ ဝန်းကျင် သတ်မှတ်ထားပြီး အဲဒီပမာဏဟာ အာဆင်နယ်နဲ့ လီဗာပူးအသင်းတို့အတွက် ဈေးကြီးလွန်းနေကြောင်း ကီယွန်က ပြောပါတယ်။

ဒက်ကလန်ရိုက်စ်ဟာ အာဆင်နယ် သဘောကျတဲ့ ကစားသမားဖြစ်ပေမဲ့ သုံးစွဲရမယ့် ငွေကြေးပမာဏကို ထည့်တွက်မယ်ဆိုရင် ဈေးကြီးလွန်းနေကြောင်း အာဆင်နယ်ရဲ့ စီးပွားရေး ပေါ်လစီအရ မဖြစ်နိုင်သလို တတ်နိုင်တဲ့ ပြောင်းရွှေ့ကြေးလည်း မဟုတ်ကြောင်း မာတင်ကီယွန်က ပြောပါတယ်။

ဒါ့အပြင် လီဗာပူးအသင်းအတွက်လည်း အလားတူဖြစ်ပြီး ခေါ်ယူဖို့ တတ်နိုင်တဲ့ အသင်းမဟုတ်ကြောင်း မာတင်ကီယွန်က ပြောပါတယ်။

အာဆင်နယ်အနေနဲ့ ချန်ပီယံလိဂ်ဝင်ခွင့် ပြန်ရလာခဲ့လို့ ဝင်ငွေတိုးလာမှာမှန်ပေမဲ့ ဒက်ကလန်ရိုက်စ်အတွက် တတ်နိုင်တဲ့ငွေကြေးအင်အား မရှိနိုင်ကြောင်း မာတင်ကီယွန်က ပြောသွားပါတယ်။

မနှစ်ကဘောလုံးရာသီမှာ နယူးကာဆယ်အသင်းအပေါ် ရှုံးကြွေးတင်ခဲ့တဲ့ ဗီဒီယိုဖိုင်ကို ပွဲမတိုင်ခင် မှာပြသခဲ့ကြောင်း အာဆင်နယ် နည်းပြအာတေတာက ပြောပါတယ်။

အာဆင်နယ်အသင်းဟာ မနေ့ညက ကစားခဲ့တဲ့ နယူးကာဆယ်အသင်းနဲ့ အဝေးကွင်းပွဲစဉ်မှာ ၂ ဂိုး ဂိုးမရှိရလဒ်အတိုင်း ပြန်လည်အနိုင်ရရှိခဲ့တာပါ။

အာဆင်နယ်ဟာပြီးခဲ့တဲ့ရာသီက နယူးကာဆယ်အိမ်ကွင်းမှာ ၂ ဂိုးဂိုးမရှိနဲ့ ရှုံးနိမ့်ခဲ့ပြီး ချန်ပီယံလိဂ် ဝင်ခွင့်ဆုံးရူံးစေခဲ့တာပါ။

နည်းပြအာတေတာဟာ အာဆင်နယ်အသင်းရဲ့ All or Nothing Documentary မှာပါဝင်တဲ့ အဲဒီရှုံးပွဲအကြောင်း ဗီဒီယိုဖိုင်ကို ကစားသမားတွေ စိတ်ဓာတ်တက်ကြွစေဖို့ ပြန်လည် ပြသခဲ့တာပါ။

အဲဒီအချိန်ကရှုံးပွဲနဲ့ ပတ်သက်ပြီး ကစားသမားတွေဟာ စိတ်ခံစားမှုပြင်းထန်ခဲ့ရပြီး  အခွင့်အရေးပြန်ရတဲ့ မနေ့ကပွဲစဉ်မှာ တိုက်ပွဲဝင်စိတ်ဓာတ်နဲ့ ကစားနိုင်ခဲ့ကြောင်း၊ မတူညီတဲ့ နည်းလမ်းတွေ၊ စိတ်ဆန္ဒပြင်းပြမှုတွေ၊ အရည်အသွေးကောင်းတွေနဲ့ ယှဉ်ပြိုင်ကစားပြနိုင်ခဲ့ကြောင်း နည်းပြအာတေတာကပြောပါတယ်။ 

နယူးကာဆယ်အသင်းဟာ အာဆင်နယ်ကို ရှုံးနိမ့်ခဲ့တာကြောင့် ချန်ပီယံလိဂ်ဝင်ခွင့်အတွက် အမှားမခံတော့တဲ့ အခြေအနေဖြစ်လာခဲ့ပါတယ်။