လီဆိုသိုနိုင်ငံမှာ အောက်တိုဘာ ၇ ရက်က ပါလီမန်ရွေးကောက်ပွဲမှာ လီဆိုသိုနိုင်ငံသားများ မဲပေးခဲ့ကြပြီး နိုင်ငံရေးလေ့လာသုံးသပ်သူတွေကတော့ အာဏာရပါတီဟာ ရှုံးနိမ့်သွားနိုင်ကြောင်း ပြောကြပါတယ်။ 

မဲဆန္ဒတွေဟာ အစိုးရအပြောင်းအလဲကို လွှမ်းမိုးနိုင်မယ်လို့ မျှော်လင့်ကြောင်း မဲရုံကို စောစောလာရောက်တဲ့ မဲဆန္ဒရှင်တချို့က ပြောပါတယ်။ 

တောင်အာဖရိက တောင်တန်းနိုင်ငံတော် လီဆိုသိုမှာ လွှတ်တော်အမတ်တွေ ဖြေရှင်းဖို့ ပျက်ကွက်ခဲ့တဲ့ နိုင်ငံရေး မတည်ငြိမ်မှုတွေကို နှစ်ပေါင်းများစွာ ကြုံခဲ့ကြရတာပါ။ 

လီဆိုသိုရဲ့ ပရမ်းပတာဖြစ်နေတဲ့ နိုင်ငံရေးကို ပြန်တည်ငြိမ်စေမယ့် မဲပေးပွဲ မတိုင်ခင်မှာ ပြဋ္ဌာန်းဖို့ဖြစ်တဲ့ အဓိက အခြေခံဥပဒေဆိုင်ရာ ပြုပြင်ပြောင်းလဲမှုတွေ တစုံလုံး လွှတ်တော်တွင်း ပိတ်ဆို့နေပေမယ့်လည်း ရွေးကောက်ပွဲက ခရီးရောက်နေပါပြီ။ 

ဘာဆိုသို ကွန်ဗင်းရှင်း (ABC) ပါတီဟာ ၂၀၁၇ ခုနှစ်မှာ စတင်ပြီး လူဦးရေ ၂ ဒသမ ၁၄ သန်း ရှိ တဲ့နိုင်ငံကို စီမံအုပ်ချုပ်ခဲ့ပေမယ့် ပါတီအတွင်း သဘောထားကွဲလွဲမှုတွေကြောင့် ၅ နှစ်တာကာလ အတွင်း ဝန်ကြီးချုပ် ၂ ဦး အပြောင်းအလဲ ရှိခဲ့ပါတယ်။ 

အဲဒီအချိန်မှာ (ABC) ပါတီရဲ့ အတိုက်အခံ ပြိုင်ဘက်တွေဖြစ်တဲ့ ဒီမိုကရက်တစ်ကွန်ဂရက် (DC) နဲ့ စီးပွားရေးသမား Sam Matekane ဦးဆောင်တဲ့ သာယာဝပြောရေး တော်လှန်ရေးအသစ် (RFP) ပါတီ ၂ ခုတို့ကို ဘက်ပြောင်းမှုတွေကြောင့် (ABC) မှာ အင်အားချည့်နဲ့သွားခဲ့ပါတယ်။

ပြုပြင်ပြောင်းလဲမှုတွေဟာ လီဆိုသိုမှာ နိုင်ငံရေးလှုပ်ရှားမှုတွေ နည်းပါးစေဖို့ ရည်ရွယ်တာ ဖြစ်ပေမဲ့ တဖွဲ့နဲ့တဖွဲ့ တွက်ကပ်နေကြတာလည်း ဖြစ်ပါတယ်။ 

ပြီးခဲ့တဲ့လက လီဆိုသိ်ရဲ့ အမြင့်ဆုံးတရားရုံးဟာ အရေးပေါ်အခြေအနေကို ဖွဲ့စည်းပုံ အခြေခံဥပဒေနဲ့ မညီဘဲ စီရင်ဆုံးဖြတ်ခဲ့ပါတယ်။

အင်ဂိုလာနိုင်ငံရဲ့ ပါလီမန်ရွေးကောက်ပွဲတွေမှာ မဲအများစုကို ရေတွက်ထားပြီး ယာယီ ရလဒ်တွေအရ လက်ရှိအာဏာရ MPLA ပါတီက အများစု ၅၂ ရာခိုင်နှုန်း ရရှိထားကြောင်း နိုင်ငံရဲ့ ရွေးကောက်ပွဲကော်မရှင်က သြဂုတ် ၂၅ ရက်မှာ ပြောကြားခဲ့ပါတယ်။

သူတို့ရဲ့ အဓိကအတိုက်အခံ ပြိုင်ဘက်တွေကတော့ ၄၂ ရာခိုင်နှုန်း ရထားတယ်လို့ ဆိုပါတယ်။

အခုချိန်ထိ မဲတွေရဲ့ ၈၆ ရာခိုင်နှုန်း ရေတွက်ပြီးဖြစ်ပြီး လက်ရှိအာဏာရပါတီဟာ နှစ် ၅၀ ကျော်နီးပါး အာဏာသက်တမ်း တိုးနိုင်ဖွယ်ရှိကြောင်းနဲ့ သမ္မတ ဂျဝေါင်း လိုရန်းကိုဟာ နောက်ထပ် ဒုတိယသက်တမ်း ၅ နှစ် ထပ်အုပ်ချုပ်နိုင်ကြောင်း ကော်မရှင်က ပြောပါတယ်။

ကော်မရှင်ရဲ့ ပြောကြားချက်ကို အဒဲလ်ဘာတို ကော်စ်တာ ဂျူနီယာ ဦးဆောင်တဲ့ အတိုက်အခံ ပါတီဖြစ်တဲ့ UNITA က ချက်ချင်း မတုံ့ပြန်ခဲ့ပါဘူး။

ဩဂုတ် ၂၅ ရက် အစောပိုင်းက ကော်မရှင်မှ ထုတ်ပြန်ခဲ့တဲ့ ပထမဆုံး ယာယီရလဒ်တွေကို ယုံကြည်ရဖွယ်မရှိဆိုပြီး ပယ်ချခဲ့ပါတယ်။ လူအန်းဒါမြို့တော်မှ လူငယ်တွေကတော့ ယာယီရလဒ်တွေကို ဒေါသထွက်ခဲ့ကြပါတယ်။

မြို့တော်ဟာ UNITA ကို ထောက်ခံမဲအများအပြား မဲပေးခဲ့ကြကြောင်း ရွေးကောက်ပွဲ ကော်မရှင်က ဆိုပါတယ်။

လက်ရှိသမ္မတ လိုရန်းကိုဟာ ၂၀၁၇ ခုနှစ် ရွေးကောက်ပွဲမှာ အနိုင်ရခဲ့တုန်းက အပြောင်းအလဲနဲ့ ကျယ်ပြန့်တဲ့ အခြေခံကြွယ်ဝမှုကို ကတိပြုခဲ့တာပါ။

ဒါပေမဲ့ အဂတိလိုက်စားမှုကို တိုက်ဖျက်ရာမှာ အပြုသဘောဆောင်တဲ့ ရလဒ်တချို့ ရှိနေပေမဲ့ ဆင်းရဲမွဲတေမှု လျှော့ချမယ့် ကတိကဝတ်ကိုတော့ မတည်နိုင်သေးပါဘူး။