အာရှခြေစစ်ပွဲ နောက်ဆုံးပွဲစဉ်တွေကို ဇွန် ၁၅ ရက်က ယှဉ်ပြိုင်ကစားခဲ့ရာမှာ မြန်မာအသင်းက စင်ကာပူအသင်းကို ၆ ဂိုး ၂ ဂိုးနဲ့ ဂိုးပြတ်ရှုံးနိမ့်သွားပါတယ်။
ပထမပိုင်းကတည်းက စင်ကာပူအသင်းက ၃ ဂိုးပြတ်နဲ့ ဦးဆောင်နေခဲ့ပြီး ဒုတိယပိုင်းမှာ ၃ ဂိုး ထပ်သွင်းခဲ့တာပါ။
မြန်မာအသင်းအတွက် ချေပဂိုး ၂ ဂိုးကိုတော့ လူစားဝင်တိုက်စစ်မှူး ဝင်းနိုင်ထွန်းက ၅၃ မိနစ်မှာတဂိုး၊ အောင်ကောင်းမာန်က ၆၆ မိနစ်မှာတဂိုး သွင်းခဲ့တာပါ။
အာရှခြေစစ်ပွဲစဉ်တွေအပြီးမှာ မြန်မာအသင်းက ၃ ပွဲကစား ၃ ပွဲစလုံးရှုံးနိမ့်ကာ အုပ်စုအောက်ဆုံးမှာ ရပ်တည်ခဲ့လို့ ခြေစစ်ပွဲလည်း မအောင်မြင်ခဲ့ပါဘူး။
အာဆီယံဒေသတွင်း အသင်းတွေထဲမှာတော့ ထိုင်း၊ မလေးရှားနဲ့ အင်ဒိုနီးရှားအသင်းတွေက အကောင်းဆုံးအုပ်စုဒုတိယ ၅ သင်းထဲ ပါဝင်ခဲ့လို့ ခြေစစ်ပွဲ အောင်မြင်ခဲ့ပါတယ်။
ဖိလစ်ပိုင်က အုပ်စုဒုတိယရပေမဲ့ အကောင်းဆုံး ၅ သင်းစာရင်းထဲမဝင်ဘဲ ကပ်လွဲခဲ့ရတာပါ။ ဗီယက်နမ်အသင်းကတော့ ဒုတိယအဆင့်မှာကတည်းက ခြေစစ်ပွဲ အောင်မြင်ထားခဲ့တာပါ။ စင်ကာပူကလည်း မြန်မာကို ဂိုးပြတ်အနိုင်ရပေမဲ့ အုပ်စုတတိယနေရာမှာပဲ ရပ်တည်ခဲ့လို့ ခြေစစ်ပွဲအောင်မြင်တဲ့ အာဆီယံအသင်း ၄ သင်းပဲ ရှိခဲ့ပါတယ်။
မြန်မာ့လက်ရွေးစင်အမျိုးသမီးဘောလုံးအသင်းဟာ ဒီကနေ့မွန်းလွဲပိုင်းမှာ ကစားခဲ့တဲ့ ယူအေအီးနဲ့ အုပ်စုနောက်ဆုံးပွဲစဉ်မှာ ၂ ဂိုး ဂိုးမရှိနဲ့အနိုင်ရခဲ့ပြီး အာရှဖလားခြေစစ်ပွဲကို ၅ ကြိမ်မြောက် အောင်မြင်ခဲ့ပါတယ်။
မြန်မာအမျိုးသမီးအသင်းဟာ အာရှခြေစစ်ပွဲစဉ်တွေကို ကာဂျစ္စတန်နိုင်ငံ ဘီရှက်မြို့မှာ သွားရောက်ကစားနေတာပါ။
အောက်တိုဘာ ၁၈ ရက်က လက်ဘနွန်နဲ့ပွဲမှာ ၄ ဂိုးဂိုးမရှိနဲ့အနိုင်ရခဲ့သလို အောက်တိုဘာ ၂၁ ရက်ကလည်း ဂူအမ်ကို ၈ ဂိုး ဂိုးမရှိနဲ့ အနိုင်ရခဲ့ပါတယ်။ အုပ်စုပွဲစဉ်တွေအပြီးမှာ ၃ ပွဲကစား ၃ ပွဲနိုင်ရလဒ်နဲ့ အုပ်စုပထမရခဲ့ပြီး ခြေစစ်ပွဲအောင်မြင်ခဲ့တာဖြစ်ပါတယ်။
အမျိုးသမီးအာရှဖလား ခြေစစ်ပွဲစဉ်တွေမှာ အုပ်စု ၈ ခု ခွဲကာယှဉ်ပြိုင်ကစားခဲ့ပြီး အုပ်စုပထမ ၈ သင်းက အိမ်ရှင် အိန္ဒိယ၊ လက်ရှိချန်ပီယံ ဂျပန်၊ ဒုတိယရ ဩစတြေးလျ၊ တတိယရ တရုတ်အသင်းတွေနဲ့အတူ စုစုပေါင်း ၁၂ သင်းက နောက်ဆုံးအဆင့်ပွဲတွေ ယှဉ်ပြိုင်ကြမှာပါ။
အဲဒီနောက်ဆုံးအဆင့်ပွဲစဉ်တွေကို ၂၀၂၂ ခုနှစ် ဇန်နဝါရီ ၂၀ ရက်ကနေ ဖေဖော်ဝါရီ ၆ ရက်အထိ အိန္ဒိယနိုင်ငံမှာ ယှဉ်ပြိုင်ရမှာဖြစ်ပါတယ်။
မြန်မာအမျိုးသမီးအသင်းဟာ အာရှဖလားနောက်ဆုံးအဆင့်ကို ၂၀၀၃၊ ၂၀၀၆၊ ၂၀၁၀ နဲ့ ၂၀၁၄ ခုနှစ်ပြိုင်ပွဲတွေမှာလည်း ခြေစစ်ပွဲအောင်မြင်ပြီး ယှဉ်ပြိုင်ခွင့်ရခဲ့ဖူးပါတယ်။
