အိန္ဒိယ-မြန်မာနယ်စပ် ချင်းပြည်နယ်၊ ပလက်ဝမြို့နယ်၊ ရွှေလိုက်ဝကျေးရွာမှာ မတ်လ ၁၃ ရက် နေ့လယ်ပိုင်းက အိန္ဒိယနယ်ခြားစောင့်စစ်တပ် (အာသံ) တပ်ဖွဲ့ဝင် ၁၀ ယောက်လောက် လာရောက်စုံစမ်းမေးမြန်းခဲ့တယ်လို့ ဒေသခံတွေက ပြောပါတယ်။

အိန္ဒိယနယ်ခြားစောင့် စစ်သားတွေက မြန်မာဘက်ခြမ်းက ကျေးရွာထဲကို ရောက်လာပြီး မြန်မာစစ်သားတွေရှိလားလို့ မေးမြန်းခဲ့ကြောင်းနဲ့ သူတို့နဲ့ တွေ့ဆုံဆွေးနွေးလိုတယ်လို့ ပြောဆိုပြီး အိန္ဒိယနိုင်ငံဘက်ကို ပြန်ဝင်သွားတယ်လို့ ဒေသခံရွာသားတယောက်က ဆိုပါတယ်။

ဘာကိစ္စနဲ့ တွေ့ဆုံဆွေးနွေးလိုတယ် ဆိုတာကိုတော့ ပြန်လည်ဖြေကြားတာမျိုး မရှိခဲ့ဘဲ အဆိုပါဒေသက ချင်းနယ်မြေကာကွယ်ရေးတပ်ဖွဲ့ CDF - ပလက်ဝရဲ့ ထိန်းချုပ်နယ်မြေ ဖြစ်တယ်လို့လည်း သိရပါတယ်။

အရင်တုန်းကတော့ မြန်မာပိုင်နက်ထဲကို အိန္ဒိယ နယ်ခြားစောင့်တပ်ဖွဲ့အနေနဲ့ အခုလို ဝင်ရောက်လာတာမျိုး မရှိခဲ့ပါဘူး။

စစ်တပ်အာဏာသိမ်းပြီးနောက်ပိုင်းမှာ ပြည်တွင်း မငြိမ်းချမ်းမှုတွေကြောင့် အိန္ဒိယနိုင်ငံ မီဇိုရမ်ပြည်နယ်တခုတည်းမှာတင် ချင်းပြည်နယ်ထဲကနေ ထွက်ပြေးခိုလှုံနေသူ ၂၀,၀၀၀ ကျော်ရှိတယ်လို့ စစ်ဘေးရှောင်စခန်း တာဝန်ရှိသူတွေရဲ့ မှတ်တမ်းတွေအရ သိရပါတယ်။

အိန္ဒိယနိုင်ငံ အရှေ့မြောက်ပိုင်းက အာသံနဲ့ မီဇိုရမ် ပြည်နယ် ၂ ခုကြား နယ်စပ်မှာ အရင်လက စတဲ့ အခြေအနေ တင်းမာမှုက ပိုဆိုးလာပြီး ဇူလိုင် ၂၆ ရက်မှာ ပဋိပက္ခ ဖြစ်ခဲ့ပါတယ်။

ဒါကြောင့် ရဲအရာရှိ ၆ ယောက်အပါအဝင် လူ ၇ ယောက်ထက်မနည်း အသတ်ခံရပြီး လူအယောက် ၇၀ ကျော် ဒဏ်ရာရခဲ့တယ်လို့ အကြီးတန်း နိုင်ငံရေးသမားတယောက်က ပြောပါတယ်။

မီဇိုရမ်ပြည်နယ်က ဥပဒေ ဆန့်ကျင်သူတွေက သေနတ်နဲ့ပစ်ခတ်ချိန်မှာ အာသံနဲ့ မီဇိုရမ် နယ်စပ်တလျှောက်က ရဲတပ်ဖွဲ့ဝင် ၆ ယောက်နဲ့ အရပ်သား ၁ ယောက် အသက်ဆုံးရှုံးခဲ့တယ်လို့ အာသံပြည်နယ် ဝန်ကြီးချုပ်က ရိုက်တာသတင်းဌာနဆီ ကြေညာချက် ပေးပို့ခဲ့တာပါ။

အာသံရဲတွေက တောင်ထူထပ်တဲ့ လိုင်လာပူရ်ဒေသကို ထိန်းချုပ်ထားတယ်လို့ စွပ်စွဲခံရသလို မီဇိုရမ်ကလည်း ပိုင်နက်ကို ကျူးကျော်ထိပါးတယ်လို့ စွပ်စွဲခဲ့တာပါ။

အာသံနဲ့ အိမ်နီးချင်းပြည်နယ်တွေကြား ဒေသတွင်းက ပြည်နယ် နယ်စပ်တွေနဲ့ ပတ်သက်တဲ့ ကာလကြာရှည် အငြင်းပွားမှုတွေကို ဒီအကြမ်းဖက်မှုက ထင်ရှားစေတယ်လို့ ရိုက်တာ သတင်းဌာနက ဖော်ပြပါတယ်။

မီဇိုရမ် ပြည်ထဲရေးဝန်ကြီးကလည်း အာသံရဲတွေက မီဇိုရမ်ပြည်နယ်ပိုင်နက်ကို ထိပါး ကျူးကျော်ခဲ့လို့ တနင်္လာနေ့က အကြမ်းဖက်မှု စခဲ့တာဖြစ်ပြီး နှစ်ဘက်စလုံးက အသေအပျောက်တွေဟာ ဝမ်းနည်းစရာပဲလို့လည်း သူက ပြောပါတယ်။

အကြမ်းဖက်မှုအတွက် အာသံနဲ့ မီဇိုရမ် ပြည်နယ်ခေါင်းဆောင် နှစ်ယောက်စလုံးက အပြန်အလှန် အပြစ်တင်ခဲ့ကြပြီး ပြည်ထောင်စုအစိုးရ ပြည်ထဲရေးဝန်ကြီး အမစ်ရှားက ကြားဝင် ဆုံးဖြတ်ပေးဖို့ တွစ်တာ လူမှုကွန်ရက်ပေါ်ကနေ မေတ္တာရပ်ခံခဲ့ကြပါတယ်။

အိန္ဒိယ ပြည်ထောင်စုအစိုးရ ပြည်ထဲရေးဝန်ကြီးက နိုင်ငံအရှေ့မြောက်ပိုင်းက ပြည်နယ် ၇ ခုက ဝန်ကြီးချုပ်တွေနဲ့ တွေ့ပြီး ၂ ရက်အကြာမှာ ဒီအကြမ်းဖက်မှု ပေါ်ပေါက်ခဲ့တာပါ။

နယ်စပ်အရေး ဖြေရှင်းကြဖို့ အခင်းဖြစ်ရာ ပြည်နယ် ဝန်ကြီးချုပ် ၂ ယောက်ကို ရှားက ပြောခဲ့တယ်လို့ ဒေသခံ မီဒီယာတွေက ဖော်ပြပါတယ်။