အင်္ဂလန်ပရီးမီးယားလိဂ် ထိပ်သီးကလပ် မန်ချက်စတာစီးတီး တိုက်စစ်မှူး အာလင်းဟာလန်းဟာ Football Writers’ Association (FWA) က ရွေးချယ်တဲ့ 2023 FWA Men’s Footballer Of The Year ဆုကို ရရှိခဲ့ပါတယ်။

ဟာလန်းဟာ ဒီဆုကို မဲ ၈၂ ရာခိုင်နှုန်းကျော်နဲ့ အပြတ်အသတ် အသာရခဲ့ပြီး ဆာကာက ဒုတိယ၊ အိုဒီဂတ်က တတိယ၊ ဒီဘရိုင်းနဲ့ ရက်ရှ်ဖို့ဒ်တို့က စတုတ္ထနဲ့ ပဥ္စမ အသီးသီး ရပ်တည်နိုင်ခဲ့ပါတယ်။

ဟာလန်းက “ကျနော့်ကို မဲပေးတဲ့သူတွေ အားလုံးကို ကျေးဇူးတင်ပါတယ်။ ဒီဆုကိုရရှိခဲ့တဲ့အတွက် တကယ့်ကို ဂုဏ်ယူမိပါတယ်။ အခု ကျနော် ဒီရာသီကို အကောင်းဆုံး အဆုံးသတ်နိုင်ဖို့ အတွက်နဲ့ မန်စီးတီးကို ဆုဖလားတွေရအောင် ကူညီပေးနိုင်ဖို့ အာရုံစိုက်နေပါတယ်” လို့ ပြောပါတယ်။

ဟာလန်းဟာ မန်ချက်စတာစီးတီးနဲ့ ပွဲဦးထွက်ရာသီမှာပဲ အံ့ဩစရာကောင်းအောင် ခြေစွမ်းပြနေပြီး ပြိုင်ပွဲစုံ ၄၇ ပွဲကစား၊ ၅၁ ဂိုးသွင်းယူကာ ပရီးမီးယားလိဂ်နဲ့ ချန်ပီယံလိဂ် ရွှေဖိနပ်ရရှိဖို့လည်း အခြေအနေ ကောင်းနေပါတယ်။

FWA ဆုကို ၁၉၄၈ ခုနှစ်က စတင်ချီးမြှင့်ခဲ့ပြီး ဆာစတန်လေမက်သရူးက ပထမဆုံး ရရှိခဲ့ပါတယ်။

မန်ချက်စတာယူနိုက်တက်နဲ့ ဒိန်းမတ်ကစားသမား အဲရစ်ဆန်ဟာ ပြင်သစ်နိုင်ငံ ပဲရစ်မြို့မှာ မေ ၈ ရက်က ကျင်းပတဲ့ Laureus World Sports Award ကနေ ချီးမြှင့်တဲ့ World Comeback of the year ဆုကို ရရှိခဲ့ပါတယ်။

ဖင်လန်နဲ့ကစားခဲ့တဲ့ ယူရို ၂၀၂၀ ပြိုင်ပွဲတုန်းက နှလုံးရောဂါပြဿနာကြောင့် ကွင်းထဲ လဲကျခဲ့ပြီးနောက်ပိုင်း နှလုံးစက်တပ်ဆင်ခဲ့ရတာကြောင့် ဘောလုံးသမားဘဝကနေ အနားယူဖို့ နီးစပ်ခဲ့ပေမဲ့ ဘောလုံးသမားဘဝကို ပြန်လည်ဖြတ်သန်းနိုင်ခဲ့တာကြောင့် ဒီဆုကို ချီးမြှင့်ခံခဲ့ရတာ ဖြစ်ပါတယ်။

“လွန်ခဲ့တဲ့ တနှစ်ခွဲက မယုံနိုင်လောက်အောင် အတက်အကျတွေ အများကြီးပါပဲ။ အကြီးမားဆုံးကျဆင်းမှုက အဲ့ဒီအချိန်မှာရောက်လာပြီး ကျနော့်ဘဝကို အဆိုးဆုံးဖြစ်အောင် ပြောင်းလဲလိုက်ပေမဲ့ ကံကောင်းထောက်မစွာဘဲ ဆရာဝန်တွေ၊ ဆေးမှူးတွေနဲ့ ကျနော့်ရဲ့ အသင်းဖော်တွေက မြန်မြန်ဆန်ဆန်တုံ့ပြန်ပြီး ကျနော့်ကို ပြန်ရခဲ့တယ်” လို့ အဲရစ်ဆန်က ဆုပေးပွဲမှာ ပြောကြားခဲ့ပါတယ်။

Laureus World Sport Award ကို ၁၉၉၉ ခုနှစ်က စတင်ချီးမြှင့်ခဲ့ပြီး တနှစ်တာလုံး အားကစားအောင်မြင်မှုတွေနဲ့အတူ အားကစားလောကမှ ကစားသမားတဦးချင်းနဲ့ အသင်းတွေကို နှစ်စဉ် ဂုဏ်ပြုချီးမြှင့်တဲ့ ဆုပေးပွဲဖြစ်ပါတယ်။

ဝက်စ်ဟမ်းကွင်းလယ်လူ ဒက်ကလန်ရိုက်စ်ဟာ အာဆင်နယ်နဲ့ လီဗာပူးအသင်းတို့ ဝယ်ယူနိုင်စွမ်းရှိတဲ့ ကစားသမားမဟုတ်ကြောင်း အင်္ဂလန်နဲ့ အာဆင်နယ် နောက်ခံလူဟောင်း မာတီကီယွန်က သုံးသပ်ပြောပါတယ်။

အင်္ဂလန်ကွင်းလယ်လူ ရိုက်စ်အတွက် ဝက်စ်ဟမ်းအသင်းက ပေါင်သန်း ၁၀၀ ဝန်းကျင် သတ်မှတ်ထားပြီး အဲဒီပမာဏဟာ အာဆင်နယ်နဲ့ လီဗာပူးအသင်းတို့အတွက် ဈေးကြီးလွန်းနေကြောင်း ကီယွန်က ပြောပါတယ်။

ဒက်ကလန်ရိုက်စ်ဟာ အာဆင်နယ် သဘောကျတဲ့ ကစားသမားဖြစ်ပေမဲ့ သုံးစွဲရမယ့် ငွေကြေးပမာဏကို ထည့်တွက်မယ်ဆိုရင် ဈေးကြီးလွန်းနေကြောင်း အာဆင်နယ်ရဲ့ စီးပွားရေး ပေါ်လစီအရ မဖြစ်နိုင်သလို တတ်နိုင်တဲ့ ပြောင်းရွှေ့ကြေးလည်း မဟုတ်ကြောင်း မာတင်ကီယွန်က ပြောပါတယ်။

ဒါ့အပြင် လီဗာပူးအသင်းအတွက်လည်း အလားတူဖြစ်ပြီး ခေါ်ယူဖို့ တတ်နိုင်တဲ့ အသင်းမဟုတ်ကြောင်း မာတင်ကီယွန်က ပြောပါတယ်။

အာဆင်နယ်အနေနဲ့ ချန်ပီယံလိဂ်ဝင်ခွင့် ပြန်ရလာခဲ့လို့ ဝင်ငွေတိုးလာမှာမှန်ပေမဲ့ ဒက်ကလန်ရိုက်စ်အတွက် တတ်နိုင်တဲ့ငွေကြေးအင်အား မရှိနိုင်ကြောင်း မာတင်ကီယွန်က ပြောသွားပါတယ်။