အိန္ဒိယနိုင်ငံအလယ်ပိုင်း ချားတစ်စ်ဂါးပြည်နယ်မှာ ဧပြီ ၂၆ ရက်က ပေါက်ကွဲမှုတခုအတွင်း ရဲတပ်ဖွဲ့ဝင် ၁၀ ဦးနဲ့ အရပ်သားယာဉ်မောင်း ၁ ဦး သေဆုံးခဲ့ကြောင်း နယ်မြေခံရဲအရာရှိတွေက ပြောပါတယ်။

သူတို့ဟာ ပြည်နယ်အတွင်းရှိ လက်ဝဲယိမ်းပြောက်ကျားတွေကို နှိမ်နင်းတဲ့ စစ်ဆင်ရေးကနေ ပြန်လာချိန်မှာ တိုက်ခိုက်ခံရတာပါ။

ဒီတိုက်ခိုက်မှုဟာ ရဲတပ်ဖွဲ့ရဲ့ယာဉ်တွေထဲက ခရိုင်အရန်တပ်ဖွဲ့ (DRG) ရဲ့ တပ်ဖွဲ့ဝင်တွေနဲ့ အရပ်သားယာဉ်မောင်းတဦးတို့ လိုက်ပါလာတဲ့ ယာဉ်တစီးကို ပစ်မှတ်ထားခံရပြီးတော့ IED လက်လုပ်ဖောက်ခွဲရေးပစ္စည်းကို သုံးပြီး တိုက်ခိုက်ခံရတာဖြစ်ကြောင်း ဘာစ်တာခရိုင်ရဲတပ်ဖွဲ့ စစ်ဆေးရေးမှူးချုပ် ပီ ဆန်းဒါးရာ့ဂျ်က ပြောပါတယ်။

အခင်းဖြစ်တဲ့နေရာကို အင်အားဖြည့်စစ်ကူတွေအပြင် CRPF ဗဟိုအရန်ရဲတပ်ဖွဲ့နဲ့ DRG ခရိုင်အရန်တပ်ဖွဲ့တို့လည်း ရောက်လာကြပြီး အလောင်းတွေကို နေရာရွှေ့ပေးခဲ့ကြတယ်လို့ ဆိုပါတယ်။

ပြည်နယ်တွင်း ဒန်တေဝါဒါခရိုင်မှာ တိုက်ခိုက်မှုကို မော်ဝါဒီသူပုန်တွေ ပြုလုပ်ခဲ့တယ်လို့ သံသယရှိကြောင်း သူတို့ကပြောပါတယ်။ ဒီတိုက်ခိုက်မှုကို ဝန်ကြီးချုပ် နာရင်ဒြာမိုဒီက တွစ်တာမှာ ရှုတ်ချခဲ့ပါတယ်။

ပြီးခဲ့တဲ့ ၅ ရက်အတွင်း အိန္ဒိယရူပီး ၂၃ သိန်းခန့် တန်ဖိုးရှိတဲ့ ဘိန်းဖြူတွေနဲ့အတူ မီဇိုရမ်ပြည်နယ်မှာ ဖမ်းဆီးရရှိခဲ့တဲ့ ၁၁ ယောက်ထဲမှာ မြန်မာနိုင်ငံသား ၃ ယောက် ပါဝင်ကြောင်း မတ်လ ၂၈ ရက်မှာ အိန္ဒိယရဲက ပြောပါတယ်။

ပြီးခဲ့တဲ့ သောကြာနေ့က စတင်ကာ အိုင်ဇောနဲ့ ဆာချိပ်ခရိုင်တွေအတွင်းက နေရာ ၇ နေရာမှာ စီးနင်းရှာဖွေခဲ့ပြီးနောက် ၉၁၃ ဒသမ ၈ ဂရမ် အလေးချိန်ရှိတဲ့ ဘိန်းဖြူတွေကို မီဇိုရမ်ပြည်နယ်၊ စိတ်ကိုပြောင်းလဲစေတတ်သော ဆေးဝါးများနှင့် အခွန်စည်းကြပ်ရေးဌာနက ဖမ်းဆီးရရှိခဲ့တယ်လို့ ဆိုပါတယ်။

ဆာချိပ်ခရိုင်အတွင်းက မူးယစ်နှိမ်နင်းရေး စီးနင်းရှာဖွေမှုတွေအတွင်း ဘိန်းဖြူ ၄၃၄ ဂရမ်နဲ့အတူ ဒေသခံ ၇ ယောက်ကို ဖမ်းဆီးရရှိခဲ့ပြီး အိုင်ဇောခရိုင်အတွင်းက စီးနင်းရှာဖွေမှုတွေမှာတော့ ဘိန်းဖြူ ၃၄၆ ဂရမ်နဲ့အတူ မြန်မာနိုင်ငံသား ၃ ယောက် အပါအဝင် ၄ ယောက်ကို ဖမ်းဆီးရရှိခဲ့တယ်လို့ ဆိုပါတယ်။

ဖမ်းဆီးခံရတဲ့ မြန်မာနိုင်ငံသား ၃ ယောက်နဲ့ပတ်သက်တဲ့ အသေးစိတ် အချက်အလက်တွေကိုတော့ မသိရသေးပါဘူး။

ဖမ်းဆီးရရှိထားသူတွေကို မူးယစ်ဆေးနဲ့ စိတ်ကိုပြောင်းလဲစေတတ်သော ဆေးဝါးများဥပဒေနဲ့ တရားစွဲဆိုထားတယ်လို့ သက်ဆိုင်ရာကပြောကြောင်း အိန္ဒိယအခြေစိုက် Outlook သတင်းမှာ ဖော်ပြထားပါတယ်။