အိန္ဒိယနိုင်ငံအလယ်ပိုင်း ချားတစ်စ်ဂါးပြည်နယ်မှာ ဧပြီ ၂၆ ရက်က ပေါက်ကွဲမှုတခုအတွင်း ရဲတပ်ဖွဲ့ဝင် ၁၀ ဦးနဲ့ အရပ်သားယာဉ်မောင်း ၁ ဦး သေဆုံးခဲ့ကြောင်း နယ်မြေခံရဲအရာရှိတွေက ပြောပါတယ်။

သူတို့ဟာ ပြည်နယ်အတွင်းရှိ လက်ဝဲယိမ်းပြောက်ကျားတွေကို နှိမ်နင်းတဲ့ စစ်ဆင်ရေးကနေ ပြန်လာချိန်မှာ တိုက်ခိုက်ခံရတာပါ။

ဒီတိုက်ခိုက်မှုဟာ ရဲတပ်ဖွဲ့ရဲ့ယာဉ်တွေထဲက ခရိုင်အရန်တပ်ဖွဲ့ (DRG) ရဲ့ တပ်ဖွဲ့ဝင်တွေနဲ့ အရပ်သားယာဉ်မောင်းတဦးတို့ လိုက်ပါလာတဲ့ ယာဉ်တစီးကို ပစ်မှတ်ထားခံရပြီးတော့ IED လက်လုပ်ဖောက်ခွဲရေးပစ္စည်းကို သုံးပြီး တိုက်ခိုက်ခံရတာဖြစ်ကြောင်း ဘာစ်တာခရိုင်ရဲတပ်ဖွဲ့ စစ်ဆေးရေးမှူးချုပ် ပီ ဆန်းဒါးရာ့ဂျ်က ပြောပါတယ်။

အခင်းဖြစ်တဲ့နေရာကို အင်အားဖြည့်စစ်ကူတွေအပြင် CRPF ဗဟိုအရန်ရဲတပ်ဖွဲ့နဲ့ DRG ခရိုင်အရန်တပ်ဖွဲ့တို့လည်း ရောက်လာကြပြီး အလောင်းတွေကို နေရာရွှေ့ပေးခဲ့ကြတယ်လို့ ဆိုပါတယ်။

ပြည်နယ်တွင်း ဒန်တေဝါဒါခရိုင်မှာ တိုက်ခိုက်မှုကို မော်ဝါဒီသူပုန်တွေ ပြုလုပ်ခဲ့တယ်လို့ သံသယရှိကြောင်း သူတို့ကပြောပါတယ်။ ဒီတိုက်ခိုက်မှုကို ဝန်ကြီးချုပ် နာရင်ဒြာမိုဒီက တွစ်တာမှာ ရှုတ်ချခဲ့ပါတယ်။