ရုရှားနိုင်ငံခြားရေးဝန်ကြီးဆာဂီလာ့ဗရော့ဗ်နဲ့ အစ္စလာမ္မစ် ပူးပေါင်းဆောင်ရွက်ရေးအဖွဲ့ (OIC) ရဲ့ အထွေထွေအတွင်းရေးမှူး ဟူစိန်အီဗရာဟင်မ်တာဟာတို့ ရုရှားမြို့တော် မော်စကိုမှာ အောက်တိုဘာ ၂၄ ရက်က တွေ့ဆုံဆွေးနွေးခဲ့ပါတယ်။
လာ့ဗ်ရော့ဗ်က အစ္စလာမ်ကမ္ဘာဟာ သူ့ရဲ့ လွတ်လပ်ရေးကို အလျှော့မပေးဘူး၊ အချုပ်အခြာ အာဏာပိုင်တဲ့ နိုင်ငံတွေရဲ့ တန်းတူညီမျှရေးမူကို နိုင်ငံတကာဥပဒေ အပေါ်အခြေခံပြီး နိုင်ငံတကာ ဆက်ဆံရေးကို ဖွံ့ဖြိုးတိုးတက်စေရေးနဲ့ ကမ္ဘာ့ယဉ်ကျေးမှု မတူကွဲပြားမှုများကို လေးစားလိုက်နာ ဖို့ ကတိပြု ထားတယ်လို့ တာဟာကို ပြောပါတယ်။
ရုရှားဟာ "မိတ်ဆွေ" ဖြစ်ပြီး အစ္စလာမ္မစ်နိုင်ငံတွေက ရုရှားရဲ့ ထောက်ခံမှုကို အားကိုးတယ်လို့ တာဟာက ပြောခဲ့ပါတယ်။
ရုရှာအစိုးရနဲ့ အိုအိုင်စီတို့ဟာ ပူးပေါင်းဆောင်ရွက်မှုကို မြှင့်တင်ဖို့နဲ့ အားကောင်းစေဖို့ သဘောတူ ခဲ့ကြပါတယ်။
ရုရှားနိုင်ငံဟာ အိုအိုင်စီအတွက် လေ့လာသူနိုင်ငံဖြစ်သလို အိုအိုင်စီကလည်း သူ့ကိုယ်သူ "မွတ်စလင်ကမ္ဘာရဲ့ စုပေါင်းအသံ" လို့ ခေါ်ပြီး နိုင်ငံတကာ ငြိမ်းချမ်းရေး မြှင့်တင်ရေးကို သူ့ရဲ့အဓိကပန်းတိုင်တွေထဲက တစ်ခုအဖြစ် ထည့်သွင်းထားပါတယ်။
ရုရှားအစိုးရဟာ ဖေဖော်ဝါရီ ၂၄ ရက်က ယူကရိန်းကို ကျူးကျော်တိုက်ခိုက်ခဲ့ရာမှာ လူထောင်ပေါင်း များစွာ သေဆုံးခဲ့ရပါတယ်။
ရိုဟင်ဂျာတွေရဲ့ အခွင့်အရေး ချိုးဖောက်ခံရမှုတွေအတွက် မြန်မာနိုင်ငံက မျက်ကွယ်ပြုထားဆဲဖြစ်ပြီး ရိုဟင်ဂျာတွေ မွေးရပ်မြေဆီ ဘေးကင်းပြီး ဂုဏ်သိက္ခာရှိရှိ ပြန်နိုင်ရေးအတွက် ပတ်ဝန်းကျင်တခု ဖန်တီးပေးရမယ့် နိုင်ငံတကာ တာဝန်ဝတ္တရားတွေကို မဖြည့်ဆည်းပေးခဲ့ဘူးလို့ အိုအိုင်စီ အထွေထွေအတွင်းရေးမှူး Hissein Brahim Taha က ပြောကြားလိုက်ပါတယ်။
ဂျဒ်ဒါးမြို့အခြေစိုက် အစ္စလာမ္မစ် ပူးပေါင်းဆောင်ရွက်ရေးအဖွဲ့ (အိုအိုင်စီ) က မတ် ၂၂ ရက် အစ္စလာမာဘတ်မြို့မှာ ကျင်းပတဲ့ နိုင်ငံခြားရေးဝန်ကြီးများကောင်စီရဲ့ ၄၈ ကြိမ်မြောက် အစည်းအဝေး ပြင်ပအချိန်မှာ အခုလို ပြောဆိုလိုက်တာပါ။
ရိုဟင်ဂျာကိစ္စဟာ အိုအိုင်စီရဲ့ အစီအစဉ်မှာ ထိပ်တန်းဦးစားပေးတွေထဲကတခုဖြစ်ပြီး အဖွဲ့အစည်းအနေနဲ့ ဆယ်စုနှစ် နှစ်ခုကျော်ကြာ လုပ်ဆောင်ခဲ့တဲ့ ကိစ္စတခုလည်း ဖြစ်ကြောင်း အိုအိုင်စီ အတွင်းရေးမှူးချုပ်က ပြောကြားခဲ့ပါတယ်။
ဒီကိစ္စဟာ ရိုဟင်ဂျာလူမျိုးတွေကို ကူညီထောက်ပံ့ဖို့အတွက် အိုအိုင်စီရဲ့ စုပေါင်းညှိနှိုင်း ဆောင်ရွက်မှုအကြောင်းအပြင် လူ့အခွင့်အရေး ချိုးဖောက်မှုတွေအတွက် တရားမျှတမှုနဲ့ တာဝန်ခံမှုဆိုင်ရာ ကမ္ဘာ့စံနှုန်းတွေနဲ့ ခိုင်မာတဲ့ ကတိကဝတ်တွေအကြောင်းကို နိုင်ငံတကာ အသိုင်းအဝိုင်းဆီကို အားကောင်းတဲ့ သတင်းစကား ပေးပို့တာဖြစ်ကြောင်း သူက ထောက်ပြပါတယ်။
အိုအိုင်စီနဲ့ နိုင်ငံတကာ အသိုင်းအဝိုင်းရဲ့ ကြိုးပမ်းအားထုတ်မှုတွေနဲ့ တောင်းဆိုမှုတွေ ရှိနေပေမယ့်လည်း ရိုဟင်ဂျာတွေရဲ့ အခြေအနေက မတိုးတက်လာဘူးလို့ အတွင်းရေးမှူးချုပ်က မှတ်ချက်ပြု ပြောဆိုပါတယ်။
ရိုဟင်ဂျာ မွတ်စလင်တွေအပေါ် ကျူးလွန်ခဲ့တဲ့ ရက်စက်ယုတ်မာမှုတွေအတွက် မြန်မာနိုင်ငံက တာဝန်ရှိကြောင်း သေချာစေတဲ့ နိုင်ငံတကာစင်မြင့်မှာ အဖွဲ့အစည်းရဲ့ ကြိုးပမ်းအားထုတ်မှုတွေကို ဦးဆောင်ပြီး ကော်မတီဥက္ကဋ္ဌအဖြစ် တာဝန်ထမ်းဆောင်ခဲ့တဲ့ ဂမ်ဘီယာနိုင်ငံရဲ့ အဓိကအခန်းကဏ္ဍကို အိုအိုင်စီ အထွေထွေအတွင်းရေးမှူးချုပ်က ချီးကျူးခဲ့ပါတယ်။
ရိုဟင်ဂျာဒုက္ခသည် ၁ သန်းကျော်ကို လက်ခံပြီး ခိုလှုံခွင့်ပေးခဲ့တဲ့ ဘင်္ဂလားဒေ့ရှ်ကိုလည်း ချီးကျူးခဲ့ပါတယ်။
