အီကွေဒေါနိုင်ငံ၊ အန်ဒီယမ်ဒေသမှာ မိုးသည်းထန်စွာရွာသွန်းမှုကြောင့် ဖြစ်လာတဲ့ မြေပြိုမှုကြောင့် လူ ၇ ဦး ထက် မနည်းသေဆုံးသွားပြီး ဒဏ်ရာရသူ ၂၃ ဦး ပျောက်ဆုံးနေသူ ၅၀ နီးပါး ရှိကြောင်း နိုင်ငံရဲ့ ဘေးအန္တရာယ်ဆိုင်ရာ အေဂျင်စီက မတ် ၂၇ ရက်က ပြောပါတယ်။
အီကွေဒေါနိုင်ငံ ချင်မ်ဘိုရာဇိုပြည်နယ်ရှိ အလောက်စီမြို့မှာ မြေပြိုမှုကြောင့် လူ ၁၆ ဦး သေဆုံးခဲ့ကြောင်း အစောပိုင်းက အေဂျင်စီက သတင်းထုတ်ပြန်ခဲ့တာ ပြန်လည်ပြင်ဆင်ထားတာ ဖြစ်ပါတယ်။
မတ် ၂၆ ရက်ညပိုင်းက အလောက်စီမြို့ရဲ့ နေရာတချို့မှာ မြေကြီးအမြောက်အမြား ပြိုကျပြီး နောက် လူ ၃၂ ဦးကို ကယ်ဆယ်နိုင်ခဲ့တယ်ကာ သဘာဝဘေးကြောင့် စုစုပေါင်း လူ ၅၀၀ နဲ့ အိမ်ခြေ ၁၆၃ လုံး ထိခိုက်ခဲ့ကြောင်း အေဂျင်စီက ပြောပါတယ်။
မြေပြိုမှုအတွင်း ပျောက်ဆုံးသွားသူတွေရဲ့ ဆွေမျိုးတွေနဲ့ ဒေသခံတစ်ဦးဖြစ်သူ လူးဝစ္စ် အန်ဂျယ်လ် ဂွန်ဇာလေ့ဇ်က သူပိုင်ဆိုင်သမျှ အရာအားလုံးကို ဆုံးရှုံးခဲ့ရကြောင်း မျက်ရည်တွေကို ထိန်းပြီး ပြောပြပါတယ်။
ကယ်ဆယ်ရေးသမားတွေဟာ အပျက်အစီးတွေအတွင်း အသက်ရှင် ကျန်ရစ်သူတွေကို ခွေးတွေ အကူအညီနဲ့ ရှာဖွေခဲ့ကြပါတယ်။ တချို့နေရာတွေမှာ အိမ်အများစုဟာ မြေကြီးထဲ မြုပ်သွားကုန်ကြောင်း ရိုက်တာ မျက်မြင်သက်သေ တစ်ဦးက ပြောပြပါတယ်။
အလောက်စီ မြို့တော်ဝန် ရိုဒရီဂိုရီယာရဲ့ ပြောကြားချက်အရ ထိခိုက်ဒဏ်ရာရသူ အများစုဟာ အစောပိုင်းက သူတို့ကို အရင်ကယ်ထုတ်ဖို့ ကြိုးစားခဲ့ပေမယ့် တညလုံးနေလိုက်ရတယ်လို့ ဆိုပါတယ်။
မိုးသည်းထန်စွာ ရွာသွန်းမှုကြောင့် အီကွေဒေါနိုင်ငံတဝန်းရှိ လမ်းတွေ၊ တံတားတွေနဲ့ တခြားအခြေခံ အဆောက်အဦတွေလည်း ပျက်စီးခဲ့ပါတယ်။
သမ္မတ ဂီလာမိုလာ့ဆိုဟာ အခုလအစောပိုင်းမှာ ပြင်းထန်တဲ့ ရာသီဥတုနဲ့ အားပြင်း ငလျင်ဒဏ် ကြောင့် အဆိုးရွားဆုံး ဘေးဒဏ်ခံရတဲ့ ပြည်နယ် ၁၄ ခုမှာ အရေးပေါ်အခြေအနေ ကြေညာခဲ့ ပါတယ်။
အီကွေဒေါနိုင်ငံရှိ သတင်းဌာနအသီးသီးက သတင်းထောက်တွေဆီကို ဖောက်ခွဲရေးပစ္စည်းတွေ တပ်ဆင်ထားတဲ့ အီလက်ထရွန်းနစ်ပစ္စည်းတွေပါရှိတဲ့ စာအိတ်တွေကို ပေးပို့ထားကြောင်း အမျိုးသားရဲတပ်ဖွဲ့က မတ် ၂၀ ရက်မှာ ပြောပါတယ်။
သတင်းထောက်တွေဆီ ပေးပို့ထားတဲ့ စာအိတ်တွေဟာ ပုံစံလက္ခဏာနဲ့ ပါဝင်တဲ့ အကြောင်းအရာတွေ တူညီနေတာကြောင့် အဲဒါတွေကို တပူးတပေါင်းတည်း စုံစမ်းစစ်ဆေးသွားမယ်လို့ ရှေ့နေချုပ်ရုံးရဲ့ ထုတ်ပြန်ချက်မှာ ဖော်ပြထားပါတယ်။
ဒီဖြစ်ရပ်တွေကြုံရတဲ့ မီဒီယာအဖွဲ့အစည်းတွေကိုတော့ နာမည်မဖော်ပြထားပါဘူး။
ဂွါယာကီးလ်မြို့တော်ရှိ Ecuavisa ရုပ်မြင်သံကြားဌာနမှာ ဂျာနယ်လစ် Lenin Artieda ဟာ သူ့ရဲ့ကွန်ပျူတာထဲကို စက်ပစ္စည်း ထည့်သွင်းလိုက်ချိန်မှာ စက်ပစ္စည်းတွေထဲက တစိတ်တပိုင်း ပေါက်ကွဲသွားပြီး အသေးစား ဒဏ်ရာရခဲ့တယ်လို့ ရဲတပ်ဖွဲ့က ပြောပါတယ်။
Ecuavisa ကို ပေးပို့တဲ့ စစ်တပ်သုံး ဖောက်ခွဲရေးပစ္စည်းဟာ RDX ဖြစ်တယ်လို့ ယူဆကြောင်း မှုခင်းဆေးပညာဆိုင်ရာ အမျိုးသားအကြီးအကဲ Xavier Chango က ပြောပါတယ်။
ရဲတပ်ဖွဲ့ဟာ ဂွါယာကီးလ်မြို့တော်မှာပဲရှိတဲ့ TC ရုပ်မြင်သံကြားရဲ့ သတင်းဌာနကို ပေးပို့လာတဲ့ ထိန်းချုပ်မှုရှိ ဖောက်ခွဲရေးကိရိယာတခုကိုလည်း ဖြေရှင်းဆောင်ရွက်ခဲ့ရကြောင်း အစိုးရရှေ့နေတွေက မတ် ၂၀ ရက်မှာ ပြောပါတယ်။
မြို့တော် ကီးတိုရှိ တတိယမြောက် ရုပ်မြင်သံကြားဌာနနဲ့ ရေဒီယိုအသံလွှင့်ဌာနမှာလည်း ဖောက်ခွဲရေးပစ္စည်းတွေ ပါရှိတဲ့ စာအိတ်တွေကို လက်ခံရရှိခဲ့ကြောင်း ဒေသတွင်း လွတ်လပ်စွာ ထုတ်ဖော်ပြောဆိုခွင့် ထောက်ခံအားပေးရေးအဖွဲ့ Fundamedios က ပြောပါတယ်။
တယ်လီ အယ်မဇွန်နာ့စ် ရုပ်မြင်သံကြားလိုင်းရဲ့ သတင်းထောက်တဦးကလည်း မတ် ၁၆ ရက်က အမည်မသိ စာအိတ်တခု လက်ခံရရှိခဲ့ပြီး ဖွင့်လိုက်တာနဲ့ စက်ပစ္စည်းတခုကို တွေ့ရှိခဲ့ရကြောင်းနဲ့ အဲဒီပစ္စည်းကို ရဲတပ်ဖွဲ့က ဖောက်ခွဲရေးပစ္စည်းလို့ အတည်ပြုထားပြီးကြောင်း အဲဒီ တီဗီချန်နယ်က ပြောပါတယ်။
အစိုးရကတော့ နိုင်ငံတွင်း လွတ်လပ်စွာ ထုတ်ဖော်ပြောဆိုခွင့်ကို အကာအကွယ်ပေးမယ်လို့ ပြောပါတယ်။
