အီတလီနိုင်ငံဝန်ကြီးချုပ် ဂျော်ဂျီယာ မယ်လိုနီဟာ ယူကရိန်းကို လက်နက်တွေဆက်ပေးပို့မယ့် သူ့ဆုံးဖြတ်ချက်အပေါ် ဝေဖန်မှုတွေကို ဖေဖော်ဝါရီ ၁၀ ရက်က ပယ်ချခဲ့ပြီး ကိယက်ဗ်ကို ထောက်ပံ့ပေးနေသူတွေဟာ ငြိမ်းချမ်းရေးအတွက် အလုပ်လုပ်နေကြတာဖြစ်ကြောင်း ပြောဆိုလိုက်ပါတယ်။ 

“ယူကရိန်းကို မကူညီသင့်ဘူးလို့ ပြောဆိုနေသူတွေဟာ နိုင်ငံတခုရဲ့ အချုပ်အခြာအာဏာနဲ့ လွတ်လပ်မှုကို ဆန့်ကျင်လုပ်ဆောင်နေတာ” လို့ အီးယူအစည်းအဝေးအပြီး သတင်းစာရှင်းလင်းပွဲ တခုမှာ မယ်လိုနီ က ပြောခဲ့တာပါ။ 

ပြင်သစ်နိုင်ငံနဲ့အတူ ပူးပေါင်းပို့ဆောင်မယ့် SAMP/T ဒုံးကျည်ကာကွယ်ရေးစနစ်ကို ယူကရိန်းအတွက် ထောက်ပံ့ပေးဖို့ အဆင်သင့် ဖြစ်နေပြီဆိုတာကို လာမယ့်ရက်တွေအတွင်း ကြေညာနိုင်ဖို့ မျှော်လင့်ထားကြောင်းလည်း ဝန်ကြီးချုပ်က ပြောပါတယ်။ 

အီးယူနဲ့နေတိုး အဖွဲ့ဝင် လစ်သူယေးနီးယားစစ်တပ်ကလည်း Bofors L70 လေယာဉ်ပစ်အမြှောက် ဒါဇင်ပေါင်းများစွာကို ယူကရိန်းဆီ ပို့ဆောင်ပေးဖို့ ပြင်ဆင်နေကြောင်း နိုင်ငံရဲ့ ကာကွယ်ရေး ၀န်ကြီးဌာနက ဆိုရှယ်မီဒီယာပို့စ်တစ်ခုမှာ အတည်ပြုထုတ်ပြန်ပါတယ်။ 

လစ်သူယေးနီးယား စစ်တပ်ရဲ့ ပြောရေးဆိုခွင့်ရှိသူ ဂျာဂစ် နော်ဗေဆာက ဒီသေနတ်ကြီးတွေဟာ မောင်းသူမဲ့ ဒရုန်းတွေအပြင် မောင်းသူပါ လေယာဉ်တွေအပါအဝင် လေကြောင်းကနေ ခြိမ်းခြောက်မှုတွေကို ဖျက်ဆီးပစ်ဖို့ ယူကရိန်းစစ်တပ်အတွက် အကူအညီပေးမှာဖြစ်ပြီး ဒီအမြောက်တွေကို အသုံးပြုမယ့် ယူကရိန်းစစ်သားတွေကိုလည်း လစ်သူယေးနီးယားက လေ့ကျင့်ပေးထားပြီးပြီ လို့ ဆိုပါတယ်။ 

လက်နက်ထုတ်လုပ်ရေးကုမ္ပဏီတစ်ခုဖြစ်တဲ့ Bofors က ဒီ L-70 လေယာဉ်ပစ်လက်နက်တွေကို ဆွီဒင်နိုင်ငံမှာ တီထွင်ထုတ်လုပ်ခဲ့တာဖြစ်ပြီး ဒီလက်နက်တွေဟာ အကွာအဝေး ၃ မိုင်ကျော်က ပစ်မှတ်တွေကို အလိုအလျောက် ချိန်ရွယ်ကာ ပစ်ချနိုင်တယ်လို့ သိရပါတယ်။

လစ်သူယေးနီးယားဟာ ယူကရိန်းအတွက် ယူရိုငွေ ၁၂၅သန်းတန်ဖိုးရှိတဲ့ စစ်ရေးအကူအညီ ပေးသွားဖို့ ကတိပြုထားကြောင်း ပြီးခဲ့တဲ့ဇန်နဝါရီလမှာ ကာကွယ်ရေး၀န်ကြီးဌာန ပြောရေးဆိုခွင့်ရှိသူ တစ်ဦးက ရိုက်တာစ်သတင်းဌာနကို ဖြေဆိုပါတယ်။

အီတလီနိုင်ငံရဲ့ ကြီးမားတဲ့ ကုန်သွယ်‌ရေးသမဂ္ဂနှစ်ခုဖြစ်တဲ့ (CGIL နဲ့ UIL) တို့က အစိုးရရဲ့ စီးပွားရေးနဲ့ ဘတ်ဂျက်မူဝါဒတွေကို ဆန့်ကျင်ဆန္ဒပြခဲ့ကြပြီး လုပ်အားခနိမ့်လုပ်သားတွေကို ပိုအကူညီပေးဖို့ မနေ့က တောင်းဆိုပါတယ်။ 

အဲဒီသပိတ်က ဝန်ကြီးချုပ် ‘မာရီယို ဒရက်ဂီ’ ရဲ့ ညွန့်ပေါင်းအစိုးရကို တိုက်ရိုက်စိန်ခေါ်မှုဖြစ်ပေမဲ့ အီတလီရဲ့ ဒုတိယအကြီးဆုံးသမဂ္ဂက အခု အလုပ်သမားသပိတ်မှာ မပါဝင်ခဲ့တာက ဝန်ကြီးချုပ်ကို စိတ်သက်သာရ ရစေပါတယ်။

ဆန္ဒပြသူ ထောင်ပေါင်းများစွာဟာ အနီနဲ့အပြာ သမဂ္ဂအလံတွေ ဝှေ့ယမ်းချီတက်ခဲ့ပြီး စွမ်းအင်ဈေးနှုန်းတွေ မြင့်တက်နေချိန်မှာ လုပ်အားခနည်းသူတွေ အခက်အခဲရင်ဆိုင်နေရတာတွေ ကို လျစ်လျူရှုနေတယ်လို့ အစိုးရကို စွပ်စွဲကြပါတယ်။

ဆန္ဒပြသူတဦးဖြစ်တဲ့ ဆီမွန်နက်တာ အက်စ်ကာလီ က “ ကျမတို့ ဒီကိုရောက်နေတာဟာ တိုင်းပြည် ပြဿနာတွေကို ဒီမိုကရေစီချည်းကပ်နည်းနဲ့ အမှန်တကယ်ဖြေရှင်းဖို့လိုအပ်တယ်လို့ ယုံကြည်လို့ပါ။ ကမ္ဘာ့ကပ်ဘေးကြောင့် ပြီးခဲ့တဲ့နှစ်နှစ် ဒုက္ခရောက်နေတဲ့ အလုပ်သမားတွေရဲ့ အသံကို အစိုးရ ကြားစေချင်လို့ ပါဝင်လာရတာပါ” လို့ ပြောပါတယ်။

ဆန္ဒပြမှုကြောင့် ရောမမြို့တွင်း ပြေးဆွဲနေတဲ့ မက်ထရိုရထားခရီးစဉ်တွေ ရပ်နားခဲ့ရပါတယ်။

ဆန္ဒပြသူတဦးဖြစ်တဲ့ စတက်ဖန်နို ရာဘဲလီက “ ဝန်ကြီးချုပ်ရဲ့ ဘတ်ဂျက်အစီအစဉ်ကြောင့် အလုပ်သမားနဲ့ ပင်စင်စား ၈၅ ရာခိုင်နှုန်း ဒုက္ခ‌ရောက်ရတယ်။ ပင်စင်ဥပဒေ အပြောင်းအလဲလုပ်ဖို့ လိုနေပြီ။ အသက် ၆၇/ ၆၈ နှစ်ကျမှ အငြိမ်းစားယူခိုင်းတာ မတရားဘူး၊ ဥပဒေမပြောင်းရင် ကျနော်တို့ မျိုးဆက်အလှည့်ကျ အသက် ၇၁ နှစ်မှ ပယ်စင်ရမယ်”  လို့ ပြောပါတယ်။

ပင်စင်စား ဖရန်ကို ဖာရဲယာကလည်း “ကျနော်တို့  အခွန်အများကြီး ပေးနေရတယ်။ အများကြီး အဖြတ်ခံနေရတယ်။ ကျနော်တို့ ပင်စင်ငွေ ပိုလိုချင်တယ်” လို့ ပြောပါတယ်။

CGIL နဲ့ UIL သမဂ္ဂနှစ်ခုမှာ အဖွဲ့ဝင် ၇ သန်းကျော် ရှိပါတယ်။  ဝေဖန်သူတွေကတော့ အဲဒီအဖွဲ့ဝင်အများစုဟာ လက်ရှိလုပ်ငန်းထဲက အလုပ်သမားတွေမဟုတ်ဘဲ ပင်စင်စားသက်သက်တွေလို့ ထောက်ပြပါတယ်။