မန်ယူအသင်းအနေနဲ့ တိုက်စစ်မှူး မာစီယယ်ကို အလိုက်ပေးပြီး စပါးတိုက်စစ်မှူးဟာရီကိန်းကို ခေါ်ယူဖို့ လုပ်ဆောင်သင့်ကြောင်း အီရန်ရိုက်က တိုက်တွန်းပါတယ်။
မန်ယူအသင်းဟာ တိုက်စစ်မှူးကောင်းမရှိတာကြောင့် အာဆင်နယ်နဲ့ပွဲမှာ အခက်အခဲရှိခဲ့ကြောင်း အာဆင်နယ်ဂန္ထဝင် အီရန်ရိုက်က ပြောပါတယ်။
ဒီလိုအခြေအနေတွေကြောင့် စပါးတိုက်စစ်မှူးဟာရီကိန်းကို ခေါ်ယူသင့်ပြီး အသင်းရှိ တိုက်စစ်မှူးမာစီယယ်နဲ့အတူ ပေါင်သန်း ၆၀ လောက်နဲ့ ကမ်းလှမ်းမယ်ဆိုရင် စပါးအသင်းဘက်က စဉ်းစားလာနိုင်ကြောင်း အီရန်ရိုက်ကဆိုပါတယ်။
“စာချုပ်တစ်နှစ်ပဲကျန်ရှိတော့တဲ့ ဟာရီကိန်းအတွက် ပေါင်သန်း ၆၀ လောက်ပေးပြီး မာစီယယ် ဒါမှာမဟုတ် တခြားတစ်ယောက်ယောက်ကို အလိုက်ပေးမယ်ဆိုရင် အလွန်ကောင်းမွန်တဲ့ ကမ်းလှမ်းမှုဖြစ်လာနိုင်တယ်။ မန်ယူနိုက်တက်အနေနဲ့ လိုအပ်နေတဲ့ တိုက်စစ်မှူးနေရာကို သေချာမကိုင်တွယ်ခဲ့ဘူးဆိုရင် ဦးနှောက်မရှိရာကျသွားလိမ့်မယ်။ အဲဒီအတွက် ဟာရီကိန်းက သူတို့ခေါ်ယူသင့်တဲ့သူပါပဲ” လို့ အီရန်ရိုက်ကပြောပါတယ်။
ဟာရီကိန်းအနေနဲ့လည်း ဖလားတစ်လုံးမှရယူနိုင်ခြင်းမရှိသေးတာကြောင့် မန်ယူအသင်းဆီကို ပြောင်းရွှေ့သင့်ကြောင်း အီရန်ရိုက် တိုက်တွန်းသွားခဲ့ပါတယ်။
အင်္ဂလန်လက်ရွေးစင်နည်းပြဆောက်ဂိတ်ရဲ့ လူရွေးချယ်ရေးပေါ်လစီအပေါ် အင်္ဂလန်နဲ့ အာဆင်နယ် ကစားသမားဟောင်း အီရန်ရိုက်က ဝေဖန်လိုက်ပါတယ်။
နည်းပြဆောက်ဂိတ်ဟာ အယ်ဘေးနီးယား၊ ဆန်မာရီနိုအသင်းတွေနဲ့ ကစားရမယ့် အင်္ဂလန်အသင်းလူစာရင်းကို ထုတ်ပြန်ခဲ့ရာမှာ ခြေစွမ်းပြနေတဲ့ လူသစ်ကစားသမားတချို့ကို ချန်လှပ်ခဲ့ပြီး လူဟောင်း ကစားသမားအများစုကိုပဲ ပြန်ခေါ်ခဲ့တာပါ။
ဆောက်ဂိတ်ဟာ ကစားသမားတချို့ကို ပုံသေရွေးချယ်ထားပြီး ခြေစွမ်းပြနေတဲ့ ကစားသမားတချို့ကို လျစ်လျူရူခဲ့တယ်လို့ အီရန်ရိုက်က တွစ်တာကနေဝေဖန်ခဲ့တာပါ။
အေစီမီလန်နောက်ခံလူ တိုမောရီ၊ ဝက်စ်ဟမ်းက ခရစ်ဝဲလ်နဲ့ ဘိုဝင်၊ အာဆင်နယ်က ဘမ်ဝိူက်နဲ့ ခရစ္စတယ်ပဲလေ့က ဂေါ်လဟာ တို့ကို ဘာကြောင့် ချန်လှပ်ခဲ့သလဲဆိုတာ နားမလည်နိုင်ကြောင်း အီရန်ရိုက်က ဝေဖန်ပါတယ်။
အင်္ဂလန် နည်းပြဆောက်ဂိတ်ဟာ ဆန်ချို၊ ဂရင်းဝုဒ်နဲ့ လင်ဂတ်တို့ကို ချန်လှပ်ခဲ့ပေမဲ့ ရက်ရှ်ဖို့ဒ်၊ စတာလင်၊ မက်ဂွိုင်းယား၊ တိုင်ရုန်မင်စ်နဲ့ ဝက်စ်ပရောက်တို့လို ခြေစွမ်းမပြနိုင်ခဲ့တဲ့သူတွေကို ဆက်ပြီးရွေးချယ်ခဲ့တဲ့ အပေါ်မှာလည်း အီရန်ရိုက်က ဝေဖန်သွားခဲ့ပါတယ်။
