တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ အောက်ရေဖြူကျေးရွာအုပ်စုကို ဒီဇင်ဘာ ၁၁ ရက် ည ၁၀ လောက်မှာ စစ်ကောင်စီတပ်က  သေနတ်ပစ်ဖောက် ဝင်ရောက်ကာ ဒေသခံတွေကို ရိုက်နှက်ဖမ်းဆီးပြီး ဆိုင်ကယ်တွေကို သိမ်းယူသွားကြတယ်လို့ ဒေသခံတွေက ပြောပါတယ်။

“မနေ့ညက အင်အား ၁၀ ဦးလောက်နဲ့ သေနတ်တွေ ပစ်ပြီး ကဒက်ငယ်ထိန်ကို ဝင်လာတယ်။ သုံး လေးအိမ်လောက်ကို ဝင်စစ်တယ်။ ဆိုင်ကယ်လိုင်စင် စစ်တယ်။ လိုင်စင်မရှိရင် သိမ်းသွားတယ်။ ၅ စီးလောက် ပါသွားတယ်”လို့ အောက်ရေဖြူအုပ်စုနေ ကဒက်ငယ်ထိန်ရွာခံတစ်ဦးက ပြောပါတယ်။

ဒါ့အပြင် ကဒက်ငယ်ထိန်ရွာနေ နေအိမ်တလုံးကိုလည်း ဝင်ရောက်စီးနင်းရှာဖွေကာ ဖုန်းထဲ နိုင်ငံရေးနဲ့ပတ်သက်တာ တွေ့တယ်ဆိုပြီး အိမ်ရှင်ဖြစ်သူအမျိုးသမီးရဲ့ ဆံပင်အား ကတ်ကြေးနဲ့ ညှပ်ပစ်ခဲ့ကြတယ်လို့ ဆိုပါတယ်။

ကဒက်ငယ်ထိန်ရွာအဝင် ဆိုင်ကယ်ပြင်ဆိုင်က ကို​သားသားနဲ့ သူငယ်ချင်းဖြစ်သူ ကိုဖြိုးဝေယံသိန်းတို့ကိုလည်း နေအိမ်တွေကနေ ရိုက်နှက်ဖမ်းဆီးပြီး တပ်စွဲထားတဲ့ ဂေါ့အင်းစာသင်ကျောင်းကို ခေါ်ဆောင်သွားခဲ့တယ်လို့ ဒေသခံတွေက ပြောပါတယ်။

ဒီနေ့မနက်ပိုင်းမှာတော့ သူတို့ ၂ ဦးလုံးကို မိသားစုဝင်တွေက တပ်စွဲရာနေရာမှာ ၁ ဦးကို  ကျပ် ၃ သိန်းစီပေးကာ ပြန်ရွေးခဲ့ရပြီး လူငယ် ၂ ဦးလုံး  ဖူးရောင်ဒဏ်ရာတွေ ရရှိကြတယ်လို့ ဆိုပါတယ်။ 

အဓမ္မသိမ်းယူသွားတဲ့ ဆိုင်ကယ်တွေကိုတော့ လိုင်စင်မဲ့ တစီး ၁ သိန်း၊ လိုင်စင်ရှိ ဆိုင်ကယ်တစီး ၅ သောင်း၊ ထော်လာဂျီကတော့ တစ်စီးကို ၂ သိန်းနဲ့ ပြန်ရွေးနေရတယ်လို့ သိရပါတယ်။

တနင်္သာရီတိုင်း ထားဝယ်ခရိုင် လောင်းလုံးမြို့နယ်အတွင်းမှာ စစ်ကောင်စီက ရိုက်နှက် ဖမ်းဆီးတာတွေ ပြုလုပ်နေပေမယ့် စစ်အာဏာရှင်အလိုမရှိကြောင်း နေ့စဉ်လိုလို ဆန္ဒပြနေကြပါတယ်။

တနင်္သာရီတိုင်းဒေသကြီး၊ လောင်းလုံးမြို့နယ်၊ အောက်ရေဖြူကျေးရွာအုပ်စုမှာ  စက်တင်ဘာ ၁၇ ရက်မနက်ပိုင်းက အကြမ်းဖက်စစ်ကောင်စီတပ်က အသက်မပြည့်သေးတဲ့ အမျိုးသမီးငယ် အပါအဝင် ဒေသခံပြည်သူ  ၁၂ ယောက် လောက်ကို ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

စစ်ကောင်စီတပ် အင်အား ၇၀ လောက်ဟာ အချုပ်ကား တစ်စီးနဲ့အတူ မနက် ၈ နာရီလောက် ရောက်ရှိလာပြီး ကျေးရွာအုပ်စုအတွင်း သေနတ်နဲ့လိုက်လံပစ်ခတ်တပြီး လမ်းသွားလမ်းလာတွေကို ဖမ်းဆီးသွားခဲ့တာပါ။ 

အပြစ်မဲ့ဖမ်းဆီးခံရတဲ့ ပြည်သူတွေကို အချုပ်ကားနဲ့ စစ်ကောင်စီလက်အောက်ခံ လောင်းလုံးမြို့မရဲစခန်းကို ခေါ်ဆောင်သွားတယ်လို့ ဒေသခံတွေက ပြောပါတယ်။ 

ရေဖြူကျေးရွာဒေသခံ ရွာသားတစ်ဦးက" အပြစ်မရှိဘဲ သေနတ်နဲ့ လိုက်လံပစ်ခတ်ဖမ်းဆီးတာ။ လက်နက်အားကိုးနဲ့ လူရမ်းကားတွေ။ မင်းမဲ့စရိုက်ဆန်ဆန် လိုက်ပစ်ခတ်ပြီး လူတွေကို အကြောင်းမဲ့ ဖမ်းဆီးသွားတယ်"လို့ ပြောပါတယ်။ 

အဆိုပါကျေးရွာနဲ့ အနီးအနားက ဂေါ့အင်း၊ ကဒက်ငယ်ထိန်၊ ဝံတွင်း၊ ကျောက်ဖြူကျေးရွာတွေမှာပါ အကြမ်းဖက်စစ်ကောင်စီတပ်ဖွဲ့တွေက ကင်းပုန်းဝပ်ပြီး လမ်းသွားလမ်းလာတွေကို စောင့်ကြည့်တာတွေရှိတယ်လို့ ဒေသခံတွေက ဆိုပါတယ်။ 

မိဘပြည်သူများအနေနဲ့ အောက်ရေဖြူကျေးရွာအုပ်စုဘက်ကို ဖြတ်သန်းသွားလာတာ လုံးဝမပြုလုပ်ကြဖို့ ဒီမိုကရေစီအရေးလှုပ်ရှားမှု သပိတ်ကော်မတီ(ထားဝယ်ခရိုင်)မေတ္တာရပ်ခံ အသိပေးထားပါတယ်။