အစ္စရေးပါလီမန် လေ့လာသုံးသပ်ရေးအဖွဲ့ဟာ ဝန်ကြီးချုပ် ဘန်ဂျမင် နေတန်ယာဟု အကြိတ်အနယ် တင်သွင်းခဲ့တဲ့ တရားစီရင်ရေး ပြုပြင်ပြောင်းလဲမှုထဲက အဓိကဥပဒေကြမ်း ဖြစ်တဲ့ ဖြစ်နိုင်ခြေရှိတဲ့ သဘောတူညီချက်ကို မတ်လ ၂၇ ရက်က အတည်ပြုခဲ့ပါတယ်။

ဘာသာရေး-အမျိုးသားရေး ညွန့်ပေါင်းအဖွဲ့တွေကို တရားသူကြီးတွေ ခန့်အပ်မှုအပေါ် ပိုပြီးထိန်းချုပ်နိုင်ခွင့်တွေ ပေးအပ်မယ့် ဥပဒေကြမ်းအပေါ်  အပြင်းအထန်ကန့်ကွက်နေတဲ့ လွှတ်တော် ဖွဲ့စည်းပုံအခြေခံဥပဒေကော်မတီ အစည်းအဝေးအတွင်း အတိုက်အခံ လွှတ်တော်အမတ်အသီးသီးက စားပွဲခုံဝိုင်းတွေပေါ် လက်တွေနဲ့ ရိုက်တီးပြီး “ရှက်စရာကြီး” လို့ ဝိုင်းအော်ကြသလို တချို့ကိုလည်း ခန်းမအပြင်ဘက်ကို ခေါ်ထုတ်သွားကြပါတယ်။

ဖွဲ့စည်းပုံအခြေခံဥပဒေနဲ့ တရားမျှတမှုဆိုင်ရာကော်မတီ အကြီးအကဲကတော့ ကော်မတီမှာ ဥပဒေပြုရေးကိစ္စတွေကို ပုံမှန်အတိုင်း ဆက်လက်ဆောင်ရွက်သွားမှာဖြစ်ပြီး ညွန့်ပေါင်းအဖွဲ့က အားကောင်းနေဆဲပဲလို့ ပြောပါတယ်။

“အစ္စရေးမှာ ရွေးကောက်ပွဲရလဒ်ကို တချို့အဖွဲ့တွေက လက်မခံတဲ့အတွက် ဥပဒေပြဋ္ဌာန်းတာကို ရပ်ဖို့ ပြည်သူတွေက တောင်းဆိုနေတာဟာ ဒီမိုကရေစီမဆန်ဆုံး ကိစ္စတခုလို့ ထင်မြင်ကြောင်း” လည်း ကော်မတီရဲ့ အကြီးအကဲ လက်ယာယိမ်းအမတ် ဆင်မ်ချာ ရို့သ်မန်က ရိုက်တာကို ပြောပါတယ်။

တရားစီရင်ရေးကဏ္ဍကို ပြန်လည်ပြင်ဆင်ဖို့ ခါးခါးသီးသီး ပြိုင်ဆိုင်နေတဲ့ အစီအစဉ်တွေကို ရပ်တန့်ဖို့ အစိုးရကို ဖိအားပေးခဲ့တဲ့ အစ္စရေးကာကွယ်ရေးဝန်ကြီး ယိုအာ့ဗ် ဂလာ့ထ်ကို ထုတ်ပယ်လိုက်တဲ့အပေါ် တုံ့ပြန်တဲ့အနေနဲ့ လူအစုလိုက်အပြုံလိုက် တညလုံး ဆန္ဒပြခဲ့ကြပြီး နောက်တရက်အကြာမှာ လွှတ်တော်အမတ်တွေက အခုလို ပါလီမန်အတွင်း အော်ဟစ်ဆူညံ ဆန္ဒပြခဲ့ကြတာပါ။

တိုင်းပြည်ကိုတုန်လှုပ်သွားစေတဲ့ လူထုဆန္ဒပြပွဲတွေနဲ့အတူ အတိုက်အခံခေါင်းဆောင် ယာယစ် လာဖျု(ထ်) က နိုင်ငံရေးမတည်ငြိမ်မှုကို ‘ရူးနေတာ’ လို့ ပြောကြားလိုက်ပြီး ကာကွယ်ရေးဝန်ကြီး ယိုအာ့ဗ် ဂလာ့ထ်ကို ထုတ်ပယ်လိုက်တာကို ပြန်ပယ်ဖျက်လိုက်ဖို့ နေတန်ယာဟုကို တောင်းဆိုခဲ့ပါတယ်။

“အခုချိန်က နယ်ပယ်အားလုံးမှာ ခြိမ်းခြောက်မှုတွေ ရှိနေတဲ့ကြားမှာ အစ္စရေးနိုင်ငံဟာ ကာကွယ်ရေးဝန်ကြီးကို ပြောင်းလဲဖို့က မဖြစ်နိုင်သေးကြောင်း” အတိုက်အခံခေါင်းဆောင် ယာယစ် လာဖျု(ထ်) က ထုတ်ပြန်ချက်တခုမှာ ပြောပါတယ်။

ဂျော်ဂျီယာနိုင်ငံမှာ ကြီးမားတဲ့ ပြည်တွင်းနိုင်ငံရေးအကျပ်အတည်းကိုဖြစ်ပေါ်စေပြီး ဥရောပနဲ့ ပိုမိုနီးကပ်မယ့် ဆက်ဆံရေးအတွက် ကော့ကေးဆပ်နိုင်ငံရဲ့ ကြိုးပမ်းမှုကို နှောင့်နှေးစေမယ့် ခြိမ်းခြောက်မှုဖြစ်တဲ့ “နိုင်ငံခြားအေးဂျင့်များ” ဥပဒေကြမ်းအတွက် အစီအစဉ်တွေကို ဂျော်ဂျီယာပါလီမန်က မတ် ၁၀ ရက် မှာ ပယ်ချခဲ့ပါတယ်။

အာဏာရ ဂျော်ဂျီယာ ဒရင်းမ်ပါတီဟာ ဒီဥပဒေကြမ်းကို ထောက်ခံပြခဲ့ပြီးနောက်မှာ လွှတ်တော်ကိုယ်စားလှယ်တွေဟာ ဒုတိယမြောက်ဖတ်ကြားတဲ့ ဥပဒေကြမ်းကို ကန့်ကွက်မဲပေးခဲ့ကြကြောင်း သိရပါတယ်။ 

လွှတ်တော်အပြင်ဘက်မှာ စုဝေးစောင့်ဆိုင်းနေတဲ့ လူအုပ်ကြီးဟာ တချို့ကလည်း မိုဘိုင်းလ်ဖုန်းတွေကနေ မဲပေးကြတဲ့လုပ်ငန်းစဉ်တွေကို စောင့်ကြည့်ခဲ့ကြပြီး ရလဒ်ကြောင့် ကျေနပ်ပျော်ရွှင်ခဲ့ကြပါတယ်။ 

လူအုပ်စုကြီးထဲက အက်ကာ အက်စ်တီယာနီက သူ့ဘဝရဲ့ "အပျော်ရွှင်ဆုံးအခိုက်အတန့်" လို့ ရိုက်တာကို ပြောပါတယ်။ 

ဒါပေမဲ့ဂျော်ဂျီယာပြည်သူတွေဟာ "ဥရောပသမဂ္ဂအဖွဲ့ဝင်ဖြစ်လာအောင် တိုက်ပွဲဝင်ဖို့ ခရီးရှည်ကြီးရှိနေပြီ" လို့လည်း ပြောဆိုပါတယ်။

“ဒီနေ့ လူငယ်တွေရဲ့ ရွေးချယ်မှုက ဥရောပပဲ။ ရုရှားကို ဘယ်တော့မှ ပြန်သွားမှာ မဟုတ်ဘူး” လို့ ဂျော်ဂျာမြို့တော် တီဘလစ်စီက ပွဲတွေမှာ ဝင်ပါဖို့ ဆုံးဖြတ်ခဲ့တဲ့ နီညာ မာတီယာ့ရှ်ဗီလီက ပြောပါတယ်။ 

“ကျနော်တို့ရဲ့ အနာဂတ်က ဥရောပဖြစ်ပြီး ဒါကို လာစိန်ခေါ်လို့ မရဘူး”လို့ ဂျော်ဂျာလူငယ် ကာဒါဂစ်ဒ်ဇဲက ရိုက်တာကို ပြောပါတယ်။ 

ဒီဥပဒေမူကြမ်းအရ နိုင်ငံရပ်ခြားမှ ရန်ပုံငွေရဲ့ ၂၀ ရာခိုင်နှုန်းကျော် ရရှိတဲ့ အစိုးရမဟုတ်တဲ့ အဖွဲ့အစည်းတွေကို နိုင်ငံခြားအေးဂျင့်အဖြစ် နိုင်ငံရဲ့ တရားရေးဌာနမှာ မှတ်ပုံတင်ဖို့ လိုအပ်ပါတယ်။ 

ဒါကြောင့် ဂျော်ဂျီယာပြည်သူတွေက အစိုးရဟာ အာဏာရှင်ဆန်တဲ့ ရည်ရွယ်ချက်နဲ့ နိုင်ငံကို သိမ်းယူဖို့ ကြိုးစားနေကြောင်း ပြောဆိုပြီး ပြည်သူထောင်ပေါင်း များစွာဟာ မြို့တော် တီဘလစ်စီ မှာ ပြီးခဲ့တဲ့ သုံးည ဆက်တိုက် ဆန္ဒပြခဲ့ကြတာပါ။ 

ရဲတွေကလည်း တီဘလစ်စီ ပါလီမန်အပြင်ဘက်မှာ စုဝေးနေကြတဲ့ ဆန္ဒပြသူတွေကို မျက်ရည်ယိုဗုံးတွေ၊ စတန့်ပစ်ဗုံးတွေနဲ့ မီးသတ်ပိုက်တွေသုံးပြီး လူစုခွဲပြီး ဒါဇင်နဲ့ချီတဲ့ လူတွေကိုလည်း ဖမ်းဆီးခဲ့ပါတယ်။