မြန်မာပြည်တွင်းရှိ ပုဂ္ဂလိက ကိုယ်ပိုင်ကျောင်းတွေမှာ အနောက်တိုင်း ဒီမိုကရေစီ ယဥ်ကျေးမှုတွေ သင်ကြားရင် အရေးယူနိုင်ဖို့ ဥပဒေရေးဆွဲ ပြဋ္ဌာန်းရမယ်လို့ အာဏာသိမ်း စစ်ခေါင်းဆောင်က ညွှန်ကြားထားကြောင်း ပညာရေးဝန်ကြီးဌာနရဲ့ ရုံးစာတစောင် လူမှုကွန်ရက်မှာ ပျံ့နှံ့နေပါတယ်။

ပြီးခဲ့တဲ့ ဇန်နဝါရီ ၆ ရက်က စစ်ကောင်စီဥက္ကဋ္ဌရုံးမှာ ကျင်းပခဲ့တဲ့ ညှိနှိုင်းအစည်းဝေးအတွင်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က  ပုဂ္ဂလိက ကိုယ်ပိုင်ကျောင်းတွေမှာ အနောက်တိုင်းဒီမိုကရေစီ ယဥ်ကျေးမှုတွေ သင်ကြားရင် အရေးယူနိုင်ဖို့ ဥပဒေရေးဆွဲ ပြဋ္ဌာန်းရမယ်လို့ ညွှန်ကြားခဲ့တဲ့အကြောင်း ကရင်ပြည်နယ် ပညာရေးမှူးရုံးက လက်အောက်ခံ ခရိုင်၊ မြို့နယ် ပညာရေးမှူးရုံးတွေ အားလုံးကို လိုက်နာဆောင်ရွက်ဖို့ ညွှန်ကြားချက်တွေ ထည့်သွင်း ရေးသားထားပါတယ်။

ဒီရုံးစာရဲ့ စစ်မှန်မှုနဲ့ပတ်သက်ပြီး စစ်ကောင်စီ ပညာရေးဌာနထံ ဆက်သွယ်မေးမြန်းအတည်ပြုနိုင်ခြင်းတော့ မရှိသေးပါဘူး။

ဒီညွန်ကြားချက်နဲ့ပတ်သက်ပြီး နိုင်ငံရေးလေ့လာသုံးသပ်သူ ကိုစိုးဝင်းဆွေက “ဒါက သူ့ဆရာကြီး ဦးနေဝင်းလုပ်ခဲ့တဲ့ မြန်မာ့နည်းမြန်မာ့ဟန် ဆိုရှယ်လစ်ဆိုတာမျိုးပဲ သူလည်း မြန်မာ့နည်းမြန်မာ့ဟန် ဒီမိုကရေစီလုပ်ဖို့ ကြိုးစားနေတာပါ။ သူကသာ ခွဲပြောနေတာ၊ တကယ်တော့ ဒီမိုကရေစီမှာက ရှင်းပါတယ်။ ပြည်သူရွေးချယ်တဲ့လူ အုပ်ချုပ်တဲ့စနစ်ပါပဲ။ ပါးစပ်က ဘယ်လို ဒီမိုကရေစီပဲပြောပြော အာဏာရှင်ဆန်ဆန် ပုံစံကိုပဲ သွားနေတာပါ။ ပြည်သူတွေပြောတဲ့ မင်းအောင်လှိုင်နိုင်ရင် မြောက်ကိုရီးယားလိုဖြစ်သွားမှာဆိုတဲ့စကားက တကယ်မှန်လာပြီ”လို့ ပြောပါတယ်။

ဒါ့အပြင် CDM ကျောင်းသားတဦးရဲ့ မိဘကလည်း “ကျမတို့က ကျောင်း မထားတဲ့အတွက် အဲဒါတွေ စိတ်မပူဘူး။ CDM မလုပ်တဲ့သူတွေသာ ဦးနှောက်အဖျက်ခံရဦးမှာပဲ” လို့ ဒီဗွီဘီကို ပြောပါတယ်။

အာဏာသိမ်းစစ်ကောင်စီဟာ အခုလို လူငယ်ပိုင်းတွေကို ဒီမိုကရေစီနဲ့ပတ်သက်လို့ နားလည်မှုလွဲအောင်၊ အသိဉာဏ် ဖျက်ဆီးနေတာဟာ သူတို့ရဲ့ အာဏာတည်တံ့မှုကို အရှည်ကြာဆုံး ရယူထားနိုင်ဖို့ ကြိုးစားနေတဲ့ ခြေလှမ်းတွေဖြစ်တယ်လို့ ရန်ကုန် CDM ဆရာအသိုင်းအဝိုင်းမှ ဆရာတဦးက ပြောပါတယ်။

စစ်ခေါင်းဆောင်ဟာ  မြန်မာပြည်တွင်း ဒေသတချို့ကိုခရီးလှည့်ပြီး တွေ့ဆုံပွဲတွေကျင်းပကာ ယခင် အစိုးရ စီမံအုပ်ချုပ်မှု မကောင်းကြောင်းတွေလည်း ဝေဖန်ပြောကြားနေတာဖြစ်ပါတယ်။

ဘရာဇီးနိုင်ငံက အဂတိလိုက်စားမှုတိုက်ဖျက်ရေး အရာရှိတွေဟာ သမ္မတဟောင်း လူဝစ် အင်တာစီယို လူလာ ဒီ ဆေးဗားနဲ့ ပတ်သက်တဲ့အမှုကို ကိုင်တွယ်ဆောင်ရွက်တဲ့နေရာမှာ ဥပဒေနဲ့ မညီတာ တွေ့ရှိရတယ်လို့ ကုလသမဂ္ဂ လူ့အခွင့်အရေးကော်မတီက ဧပြီ ၂၈ ရက်မှာ ပြောပါတယ်။

ဥပဒေ လုပ်ထုံးလုပ်နည်းတွေနဲ့ မညီဘဲ ဆောင်ရွက်ခဲ့တာကြောင့် သမ္မတဟောင်း လူလာဟာ ထောင်ဒဏ်ချမှတ်ခံရရုံမက ၂၀၁၈ ခုနှစ်တုန်းက ရွေးကောက်ပွဲ ဝင်ရောက်ယှဉ်ပြိုင်ခွင့်ပါ ဆုံးရှုံးခဲ့ရတယ်လို့ ဆိုပါတယ်။

တရားရုံး လုပ်ထုံးလုပ်နည်းတွေနဲ့ ဆန့်ကျင်တဲ့ လုပ်ငန်းစဉ်ကြောင့် လူလာအတွက် နိုင်ငံရေး အခွင့်အရေး ဆုံးရှုံးခဲ့ရတယ်လို့ လွတ်လပ်တဲ့ ပညာရှင်တွေ ပါဝင်တဲ့ ကုလသမဂ္ဂ ကော်မတီရဲ့ ထုတ်ပြန်ချက်က ဆိုပါတယ်။

မနှစ်တုန်းက ဘရားဇီးနိင်ငံရဲ့ အမြင့်ဆုံး တရားရုံးက သမ္မတဟောင်းကို အဂတိမှုကနေ ကွင်းလုံးကျွတ် လွှတ်ပေးလိုက်ပြီး လာမယ့် အောက်တိုဘာ ရွေးကောက်ပွဲမှာ ဝင်ရောက်ယှဉ်ပြိုင်ခွင့် ပြန်ပေးလိုက်တဲ့ ဆုံးဖြတ်ချက်ကို အခု ကုလသမဂ္ဂ တွေ့ရှိချက်က ပြန်ပြီး ထင်ဟပ်လိုက်တာပါ။

ထောင်ထဲမှာ တနှစ်ခွဲ နေခဲ့ရတဲ့ သမ္မတဟောင်း လူလာက ကုလသမဂ္ဂရဲ့ ဒီဆုံးဖြတ်ချက်ဟာ သူ့ကို လိပ်ပြာလုံစေတယ်လို့ ပြောပါတယ်။

သမ္မတဟောင်း လူလာဟာ အောက်တိုဘာ ရွေးကောက်ပွဲကျရင် လက်ယာစွန်းဝါဒီ လက်ရှိသမ္မတ ဘိုလ်ဆိုနာရိုနဲ့ အပြိုင် ရွေးကောက်ခံဖို့ ပြင်ဆင်နေပါတယ်။အကြိုစစ်တမ်းတွေမှာတော့ လက်ဝဲယိမ်း သမ္မတဟောင်း လူလာက လက်ရှိသမ္မတထက် အသာစီးရနေတာ တွေ့ရပါတယ်။

လူလာဟာ ၂၀၀၃ ခုနှစ်ကနေ ၂၀၁၀ အထိ ဘရာဇီးသမ္မတ ဖြစ်ခဲ့ပြီး သူ့လက်ထက်မှာ တိုင်းပြည်စီးပွားရေး ကောင်းမွန်ခဲ့သလို ပြည်သူတွေ သန်းပေါင်းများစွာ ဆင်းရဲတွင်းကနေ လွတ်မြောက်အောင် နိုင်ငံကို ဦးဆောင်မှုပေးခဲ့သူ ဖြစ်ပါတယ်။