ချက်သမ္မတနိုင်ငံမှာကျင်းပတဲ့ ရွေးကောက်ပွဲမှာ သမ္မတလောင်းကိုယ်စားလှယ်အဖြစ်ဝင်ပြိုင်တဲ့ ဗိုလ်ချုပ်ကြီးဟောင်း ပက်တာပါဗယ်က ပြိုင်ဘက် ဘီလီယံနာ စီးပွားရေးသမား ဝန်ကြီးချုပ်ဟောင်း အန်ဒရေး ဘားဘိစ်ကို မဲရလဒ်အသာနဲ့ ဦးဆောင်နေပါတယ်။
ပါဗယ်ဟာ မဲပေးခွင့်ရှိတဲ့ ခရိုင်အားလုံးနီးပါးမှာ ဆန္ဒမဲ ရလဒ် ၅၈ ရာခိုင်နှုန်းနဲ့ အထက် ရရှိနေတာကြောင့် လက်ရှိ သမ္မတရွေးကောက်ပွဲကို အနိုင်ရရှိဖို့ သေချာသလောက်ရှိနေတာပါ။
မဲရုံတွေ ပိတ်အပြီး နှစ်နာရီမပြည့် ခင်မှာပဲ ပါဗယ်က သူ့ကိုဆန္ဒမဲပေးခဲ့သူတွေနဲ့ မဲရုံကို လာရောက်မဲထည့် ပေးခဲ့သူ အားလုံးကို ကျေးဇူးတင်ကြောင်း ဇန်နဝါရီ ၂၈ ရက်က မဲဆွယ်စည်းရုံးရေးဌာနချုပ် စင်မြင့်ထက်ကနေ ပြောခဲ့ပါတယ်။
"ဒီလူတွေဟာ ဒီမိုကရေစီအရေးနဲ့ နိုင်ငံမှာဘာတွေ ဖြစ်ပျက်နေလဲ ဆိုတာကို ဂရုတစိုက်ရှိကြတယ် ဆိုတာ ရှင်းပါတယ်”လို့ ပါဗယ်က ပြောပါတယ်။
အသက် ၆၁ နှစ်အရွယ် အငြိမ်းစား ဗိုလ်ချုပ်ကြီး ပါဗယ်က ပထမဆုံးအကြိမ်အဖြစ် သမ္မတ ရာထူးအတွက် ဝင်ရောက်ယှဉ်ပြိုင်ခဲ့တာလည်း ဖြစ်ပါတယ်။
သူဟာ တသီးပုဂ္ဂအနေနဲ့ မဲဆွယ်စည်းရုံးခဲ့တာဖြစ်ပြီး ၂၀၂၁ ခုနှစ်၊ ပါလီမန်ရွေးကောက်ပွဲမှာ ဘားဘိစ်ကို ရာထူးအာဏာကနေ ဖြုတ်ချနိုင်ခဲ့တဲ့ ဗဟိုလက်ယာဝါဒီအစိုးရရဲ့ ထောက်ခံမှုကိုလည်း ပါဗယ်က ရရှိထားပါတယ်။
လက်ရှိစလိုဗားကီးယားသမ္မတ ဇူဇားနား ကပ်ပူတိုဗာကလည်း အနာဂတ်မှာ ချက်သမ္မတ အဖြစ် တာဝန်ယူတော့မယ့် ပက်တာပါဗယ်ကို မဲဆွယ်စည်းရုံးရေးဌာနချုပ်နေရာမှာ ချီးကျူးဂုဏ်ပြု ခဲ့ပါတယ်။
အာဆင်နယ်အသင်းဟာ ဒီကနေ့ မနက်ပိုင်းက ဝုဗ်အသင်းနဲ့ပွဲစဉ်မှာ ၂ ဂိုး ဂိုးမရှိနဲ့ အနိုင်ရပြီး အနီးဆုံးပြိုင်ဘက် မန်စီးတီးကို ၅ မှတ်ဖြတ် ဦးဆောင်နိုင်ခဲ့ပါတယ်။
အစောပိုင်းပွဲစဉ်မှာ မန်စီးတီးက ဘရန့်ဖို့ဒ်ကို ၂ ဂိုး ၁ဂိုးနဲ့ ရှုံးနိမ့်ခဲ့တာကြောင့် အာဆင်နယ်က ဝုဗ်အသင်းကို ဖိဖိစီးစီးကစားခဲ့ပြီး လိုအပ်တဲ့ အနိုင်သုံးမှတ်ကို အမှားအယွင်းမရှိ ရယူနိုင်ခဲ့တာပါ။
အာဆင်နယ်ဟာ ပထမပိုင်းမှာ ဂိုးရဖို့ ရုန်းကန်ခဲ့ရပေမဲ့ ဒုတိယပိုင်းမှာ အသင်းခေါင်းဆောင် အိုဒီဂတ်က ၂ ဂိုးဆက်တိုက် သွင်းယူပေးခဲ့တာပါ။
ဒီနိုင်ပွဲကြောင့် စုစုပေါင်း ၁၄ ပွဲ ကစားအပြီးမှာ ၁၂ ပွဲနိုင်၊ ၁ ပွဲသရေ၊ ၁ ပွဲ ရှုံးရလဒ်နဲ့ ၃၇ မှတ် ရရှိ ထားတဲ့ အာဆင်နယ်အသင်းဟာ ၃၂ မှတ်ရရှိထားတဲ့ မန်စီးတီးအပေါ် ၅ မှတ်ဖြတ်ပြီး အသာစီးရယူနိုင်ခဲ့ပါတယ်။
ကမ္ဘာ့ဖလားပြိုင်ပွဲကြောင့် ပရီးမီးယားလိဂ်ပြိုင်ပွဲအပါအဝင် ကလပ်အသင်းပွဲစဉ်တွေကို တလနီပါး ရပ်ဆိုင်းထားမှာပါ။
အာဆင်နယ်ဟာ ခရစ္စမတ်ကာလအလွန်အထိ အမှတ်ပေးဇယားနံပါတ် ၁ နေရာ ဆက်ပြီး ရပ်တည်ဖို့ သေချာသွားခဲ့ပါတယ်။
