စစ်တပ်ပိုင် မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေးကော်ပိုရေးရှင်း (MEC) တို့ကို အမျိုးသားညီညွတ်ရေးအစိုးရ (NUG) က အကြမ်းဖက်အုပ်စုအဖြစ် ကြေညာလိုက်ပေမဲ့ ထိရောက်ဖို့လိုတယ်လို့ စီးပွားရေးသုတေသီတွေက သုံးသပ်ပြောပါတယ်။

NUG အစိုးရရဲ့ အကြမ်းဖက်မှုတိုက်ဖျက်ရေး ဗဟိုအဖွဲ့အနေနဲ့ အကြမ်းဖက်မှုတိုက်ဖျက်ရေး ဥပဒေပုဒ်မ ၆၊ ပုဒ်မခွဲ (င) နဲ့ ပုဒ်မ ၇၂၊ ပုဒ်မခွဲ (ခ) ပါ လုပ်ပိုင်ခွင့်ကို ကျင့်သုံးကာ ပြည်ထောင်စုအစိုးရအဖွဲ့ရဲ့ သဘောတူညီချက်နဲ့  ဒီဇင်ဘာ ၆ ရက်က ထုတ်ပြန်ခဲ့တာ ဖြစ်ပါတယ်။

အမျိုးသားညီညွတ်ရေးအစိုးရ (NUG) က မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေးကော်ပိုရေးရှင်းတို့ဟာ စစ်ကောင်စီခေါင်းဆောင် မင်းအောင်လှိုင် ဦးဆောင်တဲ့ အကြမ်းဖက်စစ်အုပ်စု သက်ဆိုးရှည်စေဖို့အတွက် စီးပွားရေးလုပ်ငန်းပေါင်းစုံကို လက်ဝါးကြီးအုပ် ခြယ်လှယ်ထားပြီး နှစ်စဉ် ဘဏ္ဍာရန်ပုံငွေများစွာ ရှာဖွေထောက်ပံ့နေတာကို စိစစ်တွေ့ရှိရတယ်လို့ ဆိုပါတယ်။

ဒါ့အပြင် ရရှိလာတဲ့ အကျိုးအမြတ်တွေကို အသုံးပြုပြီးတော့ အကြမ်းဖက်စစ်အုပ်စုဟာ နေ့စဉ်နဲ့အမျှ နိုင်ငံတဝန်းက အပြစ်မဲ့ပြည်သူတွေအပေါ် လူမဆန်စွာ အကြမ်းဖက်တိုက်ခိုက် သတ်ဖြတ်မှုတွေ ကျူးလွန်နေတာကြောင့် အဲဒီအကြမ်းဖက်အဖွဲ့အစည်းရဲ့ ပိုင်ဆိုင်မှုအားလုံးကို အကြမ်းဖက်မှုတိုက်ဖျက်ရေး ဥပဒေအရ အကြမ်းဖက်အုပ်စုပိုင် ပစ္စည်းတွေအဖြစ် သတ်မှတ်ထားပြီး ဥပဒေနဲ့အညီ ထိန်းချုပ်စီမံခန့်ခွဲသွားမယ်လို့ ထုတ်ပြန်ထားပါတယ်။

ဒါပေမဲ့ အမျိုးသားညီညွတ်ရေးအစိုးရရဲ့ ထုတ်ပြန်ချက်ဟာ အကြမ်းဖက်အုပ်စုပိုင် စီးပွားရေးလုပ်ငန်းတွေအပေါ် ထိရောက်မှုရှိဖို့က နိုင်ငံတကာရဲ့ အမြင်တွေကို စွဲဆောင်နိုင်ဖို့ လိုတယ်လို့ သုတေသီတွေက ထောက်ပြပြောပါတယ်။

စီးပွားရေးသုတေသီတဦးက “ထိရောက်မှု ရှိ၊ မရှိ ဆိုတာကို ကျနော်တို့က ဘာနဲ့ကြည့်ရမလဲ ဆိုတော့ နိုင်ငံတကာက NUG ကို ဘယ်လောက်အသိအမှတ်ပြုထားပြီလဲ။ ပြီးတော့ အဲ့ဒီ ကြေညာချက်တွေကိုကော နိုင်ငံတကာက ဘယ်လောက်ထိ အလေးထားသလဲ ဆိုတာတွေနဲ့ တိုင်းတာဖို့တော့ လိုတာပေါ့။ ပြောရရင် သူတို့ရဲ့ ကြေညာချက်က ဘယ်လောက်ထိ ထိရောက်မှု ရှိသလဲ။ နိုင်ငံတကာအပေါ် ဘယ်လောက်ထိ စွဲဆောင်မှုရှိသလဲ။ တကယ်လို့ပေါ့ နိုင်ငံတကာအပေါ် စွဲဆောင်မှုရှိတယ် ဆိုရင်တော့ သူတို့ကြေညာချက်က ထိရောက်မှုရှိတယ်လို့ ပြောလို့ရတယ်။ အဲ့လိုမဟုတ်ဘဲ စွဲဆောင်မှုလည်းမရှိ၊ ဟိုဘက်ကလည်း အလေးမထားဘူး ဆိုရင်တော့ ဘာမှဖြစ်မှာမဟုတ်ဘူး။ ဒါက စီးပွားရေးရှုထောင့်ကနေ ကျနော့်အမြင် ပြောတာပါ” လို့ ဒီဗွီဘီကို ပြောပါတယ်။

မြန်မာပြည်မှာ အရပ်သားဒီမိုကရေစီအစိုးရလက်ထက်မှာ စစ်ဗိုလ်ချုပ်ကြီးတွေပိုင်တဲ့ စီးပွားရေးဆိုင်ရာ အကျိုးစီးပွားတွေ ထိခိုက်လာမှာကို စိုးရိမ်စိတ်နဲ့ စစ်တပ်က အာဏာသိမ်းခဲ့တဲ့ အကြောင်းရင်းတွေထဲမှာ တခုအပါအဝင် ဖြစ်ပါတယ်။

နိုင်ငံရေးနဲ့ စီးပွားရေးလေ့လာသုံးသပ်သူတဦးကတော့ “စစ်အုပ်စုတွေအနေနဲ့က ဦးပိုင်နဲ့ မြန်မာ့စီးပွားရေးကော်ပိုရှင်းဟာ သူတို့အတွက် နောက်ခံကျောရိုးပေါ့။ ဒါပေမဲ့ အဲ့နှစ်ခုတည်းကို ကျနော်တို့က ကြည့်လို့မရဘူး။ ဘာလို့လဲဆို အမည်မခံဘဲနဲ့ စစ်ဗိုလ်ချုပ်အဟောင်းတွေ အသစ်တွေရဲ့ သားသမီးတွေက လုပ်နေတဲ့ စီးပွားရေးတွေ အများကြီးရှိတယ်။ ဒါပေမဲ့ ပြဿနာက ဘာလဲဆို အရပ်သားအစိုးရလက်ထက်မှာ ဒီမိုကရေစီ အစစ်အမှန်နဲ့သွားရင် ဦးပိုင်နဲ့ မြန်မာ့စီးပွားရေးကော်ပိုရေးရှင်းက သူတို့ရပိုင်ခွင့်တွေ လုပ်ပိုင်ခွင့်တွေက ကျဆင်းလာတော့မှာလေ။ အဲ့လို ကျဆင်းလာမှာကို စိုးရိမ်စိတ်နဲ့ စစ်တပ်က အာဏာသိမ်းရတဲ့အထဲမှာ ပါတယ်။ တကယ်လို့သာ စစ်တပ်က အုပ်ချုပ်မယ်ဆိုရင် ဒီလို စိုးရိမ်စိတ် ရှိလာစရာမလိုဘူးလေ။ စစ်တပ်က သူတို့ ဆက်ပြီး အုပ်ချုပ်မယ်ဆိုရင် သူတို့အတွက်လည်း အခွင့်အလမ်းက ပိုကောင်းလာမယ်။ အဲ့လိုမဟုတ်ဘဲ ဒီမိုကရေစီ အစိုးရကသာ အုပ်ချုပ်မယ်ဆိုရင် သူတို့ရဲ့အခွင့်အလမ်းတွေ ပိတ်လာတော့မှာလေ” လို့ ဒီဗွီဘီကို ပြောပါတယ်။

လက်ရှိမှာတော့ အာဏာသိမ်းစစ်ကောင်စီဟာ နိုင်ငံတော်အာဏာကို မတရားသိမ်းယူထားပြီး အပြစ်မဲ့ပြည်သူတွေကို အကြမ်းဖက် ပစ်ခတ်သတ်ဖြတ်မှုတွေ ကျူးလွန်နေတာကြောင့် မြန်မာစစ်အုပ်စုရဲ့ ဘဏ္ဍာရေးဆိုင်ရာ ပင်မရင်းမြစ်ကြီးတခုဖြစ်တဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) အပါအဝင် စစ်အုပ်စုကို ငွေကြေးအထောက်အပံ့ပေးနေတဲ့ Total၊ Chevron နဲ့ နိုင်ငံတကာကုမ္ပဏီကြီးတွေကို အရေးယူ ပိတ်ဆို့ဖို့ တောင်းဆိုတဲ့ ကမ်ပိန်းတွေ လုပ်ဆောင်နေပါတယ်။

ကြေးနီစီမံကိန်းတွေ ပြန်စဖို့လုပ်တဲ့ ဘယ်လုပ်ရပ်၊ အဖွဲ့အစည်း၊ ပုဂ္ဂိုလ်ကိုမဆို တိုက်ခိုက်ရှင်းလင်း ဖယ်ရှားပြီး ကြေးနီစီမံကိန်းကို တိုက်ဖျက်သွားမယ်လို့ ဆားလင်းကြီးနဲ့ ယင်းမာပင်ဒေသခံ ပြည်သူ့ကာကွယ်ရေးတပ်တွေက ကြေညာပါတယ်။

စစ်အုပ်စုပိုင် ကုမ္ပဏီတွေမှာ လုပ်ကိုင်နေကြတဲ့ မိဘပြည်သူတွေအနေနဲ့လည်း မေ ၅ ရက်နေ့ နောက်ဆုံးထား CDM ဝင်ပေးကြဖို့ အဖွဲ့ ၁၆ ခု ဒီနေ့ ပူးပေါင်းထုတ်ပြန်ချက်မှာ တိုက်တွန်းထားပါတယ်။

စစ်အာဏာရှင်စနစ် သက်ဆိုးရှည်ရေးအတွက် ဘဏ္ဍာရေသောက်မြစ် လက်တက်တခုကို ဆွဲနုတ်ဖယ်ရှားဖို့အတွက် ဘယ်လိုတိုက်ခိုက်ရေး နည်းလမ်းကိုမဆို စတင်ကျင့်သုံးတော့မယ်လို့ ဒေသတွင်း ကြေးနီစီမံကိန်းတွေနဲ့ ပတ်သက်သူ အားလုံးကိုလည်း အသိပေးလိုက်ပါတယ်။

ဒေသတွင်း ကြေးနီစီမံကိန်းတွေဟာ ဟိုအရင်ကပဲ ဒေသခံပြည်သူတွေနဲ့ တရားမျှတမှုကို တောင်းဆိုကြတဲ့ အင်အားစုတွေရဲ့ နှစ်ရှည် ဆန့်ကျင်ခံခဲ့ရတဲ့ သမိုင်းကြောင်းလည်း ရှိခဲ့ပြီးဖြစ်တယ်လို့ ဆိုပါတယ်။

‌ဒေသတွင်း ကြေးနီစီမံကိန်းတွေရဲ့ ပင်ကိုယ်စရိုက်လက္ခဏာတွေဟာ စစ်အာဏာရှင်တို့ရဲ့ ကိုယ်ကျိုးစီးပွား သက်သက်ကိုပဲကြည့်ပြီး တိုင်းပြည်အကျိုးနဲ့ ဒေသခံပြည်သူတွေရဲ့ လူမှုဘဝ တိုးတက်ရေးကို ကိုယ်စားပြုတာ မရှိဘူးလို့ ထုတ်ပြန်ပါတယ်။

ဒီလုပ်ငန်းဟာ စစ်အာဏာရှင်စနစ်ရဲ့ ဘဏ္ဍာရေသောက်မြစ်ထဲက တခုဖြစ်တာ၊ အာဏာရှင် ထိပ်သီးတွေနဲ့ စစ်ခရိုနီတွေရဲ့ ခါးပိုက်ဆောင်စီမံကိန်းဖြစ်တာ၊ ကြေးနီမံကိန်းတွေဟာ တိုင်းပြည်အကျိုး၊ ဒေသခံပြည်သူတွေ အကျိုးရှိတယ်ဆိုတာကို ရှင်းရှင်းလင်းလင်း မပြနိုင်တာတို့ကြောင့် ဆက်လက်ဆန့်ကျင်သွားမယ်လို့လည်း ဆိုပါတယ်။

ဒီအချိန်ဟာ စစ်အာဏာရှင်စနစ်ကို အမြစ်ဖြတ်ဖယ်ရှားဖို့အတွက် ပြည်သူတွေ လက်နက်စွဲကိုင် တိုက်ပွဲဝင် ဆင်နွှဲနေချိန်ဖြစ်ပြီး တော်လှန်စစ်ဒေသ စစ်နယ်ဝန်းဟာ ဆားလင်းကြီးမြို့နယ် ဒေသတွင်း ကြေးနီစီမံကိန်းဒေသတွေ အပါအဝင် ဖြစ်သလို စစ်အုပ်စုပိုင် ဦးပိုင်-ယန်စီကုမ္ပဏီလီမိတက်နဲ့ ယန်စီ၊ ဝမ်ပေါင်ကုမ္ပဏီတို့ ပူးတွဲ လုပ်ဆောင်တဲ့ ဒေသတွင်း စီမံကိန်းတွေကို ဘယ်အကြောင်းပြချက်နဲ့မှ တော်လှန်ရေးကာလအတွင်း လုပ်ငန်းလည်ပတ်ခွင့် မပြုနိုင်ဘူးလို့ ဆင်ခြင်ဆုံးဖြတ်ကြောင်းလည်း ပြည်သူ့ကာကွယ်ရေးအဖွဲ့တွေက ဆိုပါတယ်။

စစ်ကောင်စီရဲ့ ဝင်ငွေရလမ်းတွေကို ပြည်သူတွေအနေနဲ့လည်း မကူညီ၊ မထောက်ပံ့ဘဲ တော်လှန်ရေးကို ကူညီပေးကြဖို့လည်း မေတ္တာရပ်ခံထားပါတယ်။