၂၀၂၁-၂၀၂၂ ပညာသင်နှစ်အတွက် နိုင်ငံတဝန်း အခြေခံပညာစာသင်ကျောင်းတွေမှာ  ကျောင်းအပ်နှံနေရာမှာ   ဇွန် ၁ ရက်ရက်အထိ  ကျောင်းအပ်နှံတဲ့ ကျောင်းသား ကျောင်းသူပေါင်း  ၅ ဒသမ ၂ သန်းကျော်ရှိပြီး ဧရာဝတီတိုင်းကအများဆုံးဖြစ်တယ်လို့ စစ်ကောင်စီ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက ပြောပါတယ်။

ဇွန် ၁ ရက်က နေပြည်တော်မှာ  ပြုလုပ်တဲ့ စစ်ကောင်စီ သတင်းစာရှင်းလင်းပွဲအတွင်း ပြောကြားခဲ့တာဖြစ်ပြီး အရင်ပညာသင်နှစ်က ကျောင်းအပ်နှံသူစုစုပေါင်း ၅ ဒသမ ၃ သန်းရှိခဲ့ပေမဲ့ အခုနှစ် ကျောင်းအပ်နှံသူ ၅ ဒသမ ၂ သန်းကျော် ရှိတယ်လို့ ဆိုပါတယ်။

"ယခင်နှစ်က အပ်နှံမှု ၅ ဒသမ ၃ သန်း ရှိပါတယ်။ ဒီနှစ်မှာတော့ ကျောင်းအပ်နှံမှုက ဇွန်လ ၁ ရက်နေ့အထိ အပ်နှံပြီးသူ ၅ ဒသမ ၂ သန်းရှိပြီး ၉၉ ဒသမ ၂၄ ရာခိုင်နှုန်း အပ်နှံပြီးပြီ ဖြစ်ပါတယ်" လို့ ဗိုလ်ချုပ်ဇော်မင်းထွန်းက ပြောပါတယ်။

ကျောင်းအပ်နှံမှုစာရင်း ကောက်ယူရာမှာ မနှစ်က ကျောင်းအပ်နှံတဲ့စာရင်း အပေါ်မှာသာ အခြေခံတွက်ချက်တာ ဖြစ်တယ်လို့လည်း ဆိုပါတယ်။

တိုင်းဒေသကြီး/ပြည်နယ် အကုန်လုံးနီးပါးမှာ ကျောင်းအပ်နှံသူအရေအတွက်က မနှစ်ကထက် မြင့်တက်လာနေပြီး ဧရာဝတီတိုင်းက ၉၁၇,၇၂၁ ဦးနဲ့ အများဆုံးဖြစ်ကာ  ချင်းပြည်နယ်မှာတော့ ၂၀,၀၀၀ ကျော်နဲ့ အနည်းဆုံး ကျောင်းအပ်နှံထားတယ်လို့ စစ်ကောင်စီ ပြောခွင့်ရသူက ဆိုပါတယ်။

စစ်ကောင်စီ ဖွင့်လှစ်တဲ့ ကျောင်းတွေကို မတက်ဖို့ စစ်ကျွန်ပညာရေးဆန့်ကျင်တဲ့ လှုပ်ရှားမှုတွေ လည်း ရှိနေပြီး NUG အစိုးရ အစီအစဉ်နဲ့ ဖွင့်လှစ်တဲ့ ကျောင်းတွေမှာလည်း တက်ရောက်တဲ့ ကျောင်းသူ ကျောင်းသားတွေ အများအပြားရှိနေပါတယ်။

ကျောင်းဖွင့်ချိန်မှာ စစ်ကောင်စီတပ်တွေက  စစ်ကိုင်းတိုင်းနဲ့ မကွေးတိုင်းအပါဝင် ပြည်နယ်တချို့မှာ စာသင်ကျောင်းတွေအပါအဝင် လူနေအဆောက်အအုံတွေကို စစ်ကောင်စီတပ်တွေက  မီးရှို့ဖျက်ဆီး တာတွေလည်း ရှိနေပါတယ်။

စစ်ကောင်စီက စီစဉ်ကျင်းပတဲ့ ၂၀၂၁-၂၂ ခုပညာသင်နှစ်အတွက် တက္ကသိုလ်ဝင်စာမေးပွဲတွေကို မတ်လ ၃၁ ရက် ဒီနေ့မနက်က မြန်မာနိုင်ငံတဝန်း အခြေခံပညာစာသင်ကျောင်းတွေမှာ ရဲနဲ့ စစ်သား လုံခြုံရေးတွေ တင်းကျပ်ချထားပြီး  စတင်ကျင်းပနေပါတယ်။

ဒီနှစ်မှာဖြေဆိုတဲ့ တက္ကသိုလ်ဝင်စာမေးပွဲကို တစ်နိုင်ငံလုံးအတိုင်းအတာနဲ့ စာစစ်ဌာနပေါင်း ၁၂၀၀ ကျော်ဖွင့်လှစ်ဖြေဆိုမယ်လို့ စစ်ကောင်စီရဲ့ ပညာရေးဌာနက ကြေညာခဲ့ပေမဲ့ ရန်ကုန်မှာတော့ စာစစ်ဌာနအရေအတွက်က သိသိသာသာလျော့နည်းသွားပါတယ်။

ပုံမှန်ဖွင့်လှစ်နေကျဖြစ်တဲ့ စာစစ်ဌာနတွေက ဖွင့်လှစ်နိုင်ခြင်းမရှိတော့ဘဲ ကျောင်း ၁၀ ကျောင်းကို တစ်ကျောင်းတည်းပေါင်းပြီး စာစစ်ဌာနတစ်ခုအဖြစ်သာ ဖွင့်လှစ်ထားရပါတယ်။

အရင်က စာမေးပွဲဖြေတဲ့နေ့မှာ မီးသတ်၊ ရပ်ကွက်ကျေးရွာအုပ်ချုပ်ရေးအဖွဲ့တွေလောက်သာ လုံခြုံရေးရယူပေးခဲ့ရပေမဲ့ ဒီနှစ်မှာတော့ ရဲ၊ စစ်သား၊ယာဥ်ထိန်းရဲ ၊ စစ်တပ်ကခန့်ထားတဲ့ ရပ်ကျေးအဖွဲ့ အင်အားအများအပြားနဲ့ လုံခြုံရေးတင်းကျပ်ထားပါတယ်။

စာမေးပွဲလာရောက်ဖြေဆိုတဲ့ ကျောင်းသားကျောင်းသူတွေကိုလည်း ကျောင်းအကြိုအပို့ကားတွေနဲ့ လိုက်လံစုစည်းပြီး စာစစ်ဌာနရှိရာကို ပို့ဆောင်ပေးနေရသလို ၊ကျောင်းရှေ့ အဝင်တံခါးမကြီးတွေ ကနေ မဝင်ရဘဲ  ကျောင်းအနောက်ပေါက်တွေကနေသာ ကျောင်းထဲကို ဝင်ကြရပါတယ်။

ကျောင်းသားကျောင်းသူ အများစုက ဒီနှစ် ၁၀ တန်းစာမေးပွဲကို ဝင်ရောက်မဖြေဆိုဘဲ စစ်ကျွန်ပညာရေးကိုသပိတ်မှောက်ခဲ့တာကြောင့် ဒီနှစ်မှာ တနိုင်ငံလုံးအတိုင်းအတာနဲ့ ကျောင်းသားကျောင်းသူ သုံးသိန်းကျော်သာ ဝင်ရောက်ဖြေဆိုကြပါတယ်။

ရန်ကုန်တိုင်းအနေနဲ့ကတော့ ကျောင်းသူ ကျောင်းသား ၃၇၀၀၀ လောက်သာ ဝင်ရောက်ဖြေဆိုကြတယ်လို့ စစ်ကောင်စီရဲ့ပညာရေးဌာနကနေ သိရပါတယ်။

ရခိုင်ပြည်နယ်မှာ ဖြေဆိုမယ့်သူအများဆုံးရှိနေပြီး စစ်ကောင်စီလက်အောက်ခံဌာနတွေက စာရင်းတွေအရ ဖြေဖို့စာရင်းပေးထားသူဦးရေ ၄၅၀၀၀ ကျော်ရှိပါတယ်။

ဧရာဝတီတိုင်းမှာတော့ ဒုတိယအများဆုံး စာရင်းသွင်းထားပြီး ကျောင်းသား ၄၀၀၀၀ ကျော်ရှိပါတယ်။ တိုက်ပွဲတွေဖြစ်ပွားနေတဲ့ ကယားပြည်နယ်မှာတော့ အယောက် ၇၈၀ ပဲရှိပြီး တနိုင်ငံလုံးမှာတော့ ၃၁၀၀၀၀ ကျော်ရှိပါတယ်။

ပြီးခဲ့တဲ့နှစ်က စစ်တပ်ကအာဏာသိမ်းတာနဲ့ ကိုဗစ်ကြောင့် စာမေးပွဲတွေ မရှိခဲ့ဘဲ အဲဒီမတိုင်ခင် ၂၀၁၉- ၂၀၂၀ ပညာသင်နှစ် ၊ အန်အယ်လ်ဒီအစိုးရလက်ထက်မှာတော့ ဖြေဆိုသူ ၉၁၀၀၀၀ ကျော်ရှိခဲ့တာပါ။

အခု စာမေးပွဲကို မြို့နယ် ၃၂၁ မြို့နယ်၊ စာစစ်ဌာန ၁၂၅၆ ခုမှာ ကျင်းပမယ်လို့ စစ်ကောင်စီလက်အောက်ခံပညာရေးဌာနက ထုတ်ပြန်ထားပါတယ်။

တက္ကသိုလ်ဝင်စာမေးပွဲတွေကို နိုင်ငံတဝန်း စာစစ်ဌာနတွေမှာ မတ်လ ၃၁ ရက် ဒီနေ့ကနေ ဧပြီ ၉ ရက်အထိ၊ မနက် ၉ နာရီကနေ မွန်းတည့် ၁၂ နာရီအထိ ကျင်းပတာဖြစ်ပါတယ်။

Photo-နေပြည်တော်ကောင်စီ