ရန်ကုန်မြို့၊ ဗိုလ်တထောင်မြို့နယ်၊  ၄၄ လမ်း ဖမ်းဆီးမှုဖြစ်စဉ်မှာ တိုက်ပေါ်မှ ခုန်ချကွယ်လွန်ခဲ့တဲ့ မဝေဝေမြင့်ရဲ့ ရုပ်အလောင်းကို ဩဂုတ် ၁၂ ရက် ဒီနေ့ မွန်းလွဲပိုင်းက ကျူချောင်သုဿန်မှာ စစ်ကောင်စီက မီးသင်္ဂြိုဟ်လိုက်ပါတယ်။

စစ်တပ်က မိသားစုဝင်တွေကို ရုပ်အလောင်းခေါ်ပြပြီး ချက်ချင်းမီးသင်္ဂြိုဟ်ခဲ့တာဖြစ်ပြီး အရိုးပြာ ကောက်ခွင့်တောင်မရခဲ့ဘူးလို  မဝေဝေမြင့်ရဲ့ခင်ပွန်း ဒေါက်တာစိုးမြတ်သူက ပြောပါတယ်။ 

"ရုပ်အလောင်းကိုတော့ တွေ့လိုက်ရတယ်။ ဖြစ်စေချင်တဲ့အတိုင်း သင်္ဂြိုဟ်ခွင့်တော့မရခဲ့ဘူး။ ကျနော့်ကို ရုပ်အလောင်းထုတ်ပြတယ်။ ပြီးတော့ ချက်ချင်း သင်္ဂြိုဟ်လိုက်တယ်။ အရိုးပြာတောင်ကောက်ခွင့်မပေးပါဘူး။"

ကျူချောင်းသုဿန်မှာ မဝေဝေမြင့်ရဲ့ရုပ်အလောင်းအပါအဝင် စုစုပေါင်းရုပ်အလောင်း ၄ ခု တွေ့ခဲ့ရပေမယ့် ဘယ်သူတွေဆိုတာတော့ ကြည့်ခွင့်မရခဲ့ဘူးလို့ ဒေါက်တာစိုးမြတ်သူကပြောပါတယ်။

ရုပ်အလောင်းတွေကိုပတ်ထားတဲ့ ပိတ်ဖြူတွေမှာ သွေးစွန်းနေတာကိုပဲ တွေ့ခဲ့ရတယ်လို့ ဆိုပါတယ်။

ကျန်တဲ့ရုပ်အလောင်းတွေအတွက် မိသားစုဝင်တွေလာတာမတွေ့ရသလို ဘာကြောင့်ဘယ်လိုသေဆုံးတယ်ဆိုတာကို စစ်ကောင်စီဘက်က ရှင်းပြတာမျိုးမရှိခဲ့ပါဘူး။ 

ဒေါက်တာစိုးမြတ်သူက"ကျနော့် အမျိုးသမီးရုပ်အလောင်းနဲ့အတူ ရုပ်အလောင်းလေးခုချထားတယ်။ ကျနော့်အမျိုးသမီးက ဒုတိယရောက်တာ။ အရှေ့မှာ တစ်ယောက်ရောက်နေတယ်။ အဲ့တစ်ယောက်ရဲ့ခြေထောက်မှာတော့ သွေးစွန်းနေတာ တွေ့ရတယ်။ အဝတ်စပိတ်ဖြူစမှာ သွေးစွန်းနေတာ တွေ့ရတယ်။ ကျနော့် အမျိုးသမီးအနောက်ကနေ နောက်ရုပ်အလောင်းနှစ်ခု ထပ်ရောက်တယ်။ ဘယ်သူမှန်းတော့မသိဘူး။ သူတို့မျက်နှာတွေကို ထုတ်မပြဘူး။ အဲ့ရုပ်အလောင်းတွေအတွက် မိသားစုလည်းမတွေ့ရဘူး။ တခြားမိသားစုတွေလာတာမတွေ့ရဘူး။ ကျနော်တို့ မိသားစုတွေပဲရှိတယ်။"လို့ ပြောပါတယ်။

ဩဂုတ်လ ၁၂ ရက်နေ့၊ ကျူချောင်းသုသာန်မှာ စစ်ကောင်စီလမ်းကြောင်းတွေရှိနေပြီး ရဲသင်တန်းကျောင်းက နာရေးတွေ ဆောင်ရွက်တာမျိုးလည်းရှိနေတယ်လို့ သုသာန်နဲ့နီးစပ်သူတစ်ယောက်ကပြောပါတယ်။

သုသာန်တာဝန်ရှိသူတွေကို ဆက်သွယ်တဲ့အခါမှာလည်း ပြောဆိုခွင့်ပိတ်ပင်ထားတဲ့ အခြေအနေမျိုးဖြစ်နေတဲ့အတွက် သတင်းအချက်အလက်အတိအကျရဖို့ခက်တယ်လို့ ကျူချောင်သုသာန်နဲ့ နီးစပ်သူတစ်ဦးက ပြောပါတယ်။

သြဂုတ် ၁၀ ရက် ညနေပိုင်းက  ဗိုလ်တထောင်မြို့နယ်၊  ၄၄ လမ်း အောက်ဘလောက်က တိုက်ခန်းတစ်ခန်းကို စစ်ကောင်စီလက်နက်ကိုင်တပ်တွေက အင်အားအလုံးအရင်းနဲ့ ဝင်ရောက်ဖမ်းဆီးတဲ့အတွက် လူငယ်တွေ တိုက်ပေါ်ကနေ ထွက်ပြေး ခုန်ချခဲ့ ကြတာပါ။

ဒီဖြစ်စဉ်မှာ နှစ်ဉီးသေဆုံး၊ သုံးဉီးဒဏ်ရာရ၊ ၃ ဦးဖမ်းဆီးခံရတယ်လို့ စစ်ကောင်စီ ပြန်ကြားရေးက  ထုတ်ပြန်ခဲ့ပါတယ်။ ဆန္ဒပြလူငယ်တွေနဲ့ နီးစပ်တဲ့အသိုင်းအဝိုင်းကတော့ တိုက်ပေါ်က ခုန်ချခဲ့တဲ့ လူငယ်ငါးဉီးစလုံးသေဆုံးသွားခဲ့တယ်လို့ပြောပါတယ်။ သေဆုံးသူတွေထဲကနှစ်ယောက်ဟာ နေရာမှာတင်သေဆုံးခဲ့တာဖြစ်ပြီး ကျန်တဲ့သူတွေကတော့ မသေဆုံးခင် ရိုက်နှက်ခံခဲ့ရတယ်လို့ နီးစပ်သူတွေကပြောပါတယ်။ 

ရန်ကုန်၊ ဗိုလ်တထောင်မြို့နယ်  ၄၄ လမ်းဖြစ်စဉ်မှာ တိုက်ပေါ်က ခုန်ချသူခဲ့တဲ့ လူငယ်တွေထဲက  ၃ ယောက်ဟာ သတိကောင်းကောင်းရတဲ့ အခြေအနေနဲ့ ဆေးရုံကိုရောက်ခဲ့တယ်လို့ သူတို့ကို ကူညီခဲ့တဲ့ ပရဟိတသမားတွေက ပြောပါတယ်။

သုံးထပ်တိုက်ပေါ်ကနေ  ခုန်ချခဲ့တဲ့ ၅ ယောက်မှာ အမျိုးသမီးတယောက်နဲ့ အမျိုးသားတယောက် ပွဲချင်းပြီး သေဆုံးခဲ့ပြီး ကျန် ၃ ယောက်ကတော့ ဒဏ်ရာရခဲ့တာပါ။

“သူတို့က ခြေကျိုး လက်ကျိုးပဲ ဖြစ်တာဆိုတော့လေ။ ကျနော်တို့ သယ်တဲ့အချိန်မှာ သူတို့ ဆေးရုံအထိ အသက်ပါတယ်။ ဆေးရုံရောက်ပြီး နောက်ပိုင်း အခြေအနေတော့ မသိဘူးပေါ့။ ၃ ယောက်လုံး သတိရှိနေတယ်။ ရေတွေဘာတွေတောင်းလို့ ကျနော်တို့ တိုက်လိုက်သေးတယ်” ကူညီခဲ့သူ တယောက်က ပြောပါတယ်။ 

အခင်းဖြစ်ချိန်ဟာ ညနေ ၃ နာရီကျော်လောက်မှာ ဖြစ်ပေမဲ့ ညနေ ၅ နာရီကျော်မှ ဆေးရုံတွေကို ပို့ပေးရတာဖြစ်ပါတယ်။

"တယောက်က ခေါင်းထိထားတယ်။ ၂ ယောက်က ခြေကျိုး လက်ကျိုးပဲဖြစ်တာ။ အဲ ၂ ယောက်ကိုတော့ တပ်မတော် အရိုးအကြောဆေးရုံကို ပို့ခဲ့ရတယ်။ Dead Body (အလောင်း) တွေနဲ့ ခေါင်းထိထားသူကိုတော့ အမှတ် ၁ ခုတင် ၁၀၀၀ တပ်မတော် ဆေးရုံမှာ ထားခဲ့ရတယ်” လို့ ကူညီခဲ့သူ တယောက်က ပြောပါတယ်။

တိုက်ပေါ်က ခုန်ချခဲ့သူ ၅ ယောက်ထဲက အမျိုးသားတစ်ယောက်နဲ့  အမျိုးသမီးတစ်ယောက်ကတော့ ကူညီသူတွေ ရောက်မလာခင်ကပဲ သေဆုံးနေပြီး ဖြစ်ပါတယ်။

“၃ နာရီခွဲလောက်မှာ စဖြစ်တာ ဖြစ်မယ်။ ယောကျ်ားလေးတယောက်နဲ့ မိန်းကလေးတယောက်ကို စစ်တပ်က လိုက်ဖမ်းတာမှာ သူတို့ နေတဲ့ အိမ်လှေကားနားအရောက်မှာ မိသွားတယ်။ မိခါနီးမှာ သေနတ်နဲ့ ပစ်ဖမ်းသေးတယ်။ ဒါပေမဲ့ ထိပုံ မရဘူး။ ခဏနေတော့ စစ်သားနဲ့ ရဲ ၁၀ ယောက်လောက် အိမ်အပေါ်ထပ်ကို တက်တာပဲ။ အဘိုးကြီးနဲ့ အဘွားကြီး  နှစ်ယောက်တည်းနေတဲ့ အိမ်ထပ်ခိုးကို သူတို့က ငှားနေတာဆိုတော့ အောက်ထပ်တံခါးကို ကန်ဖွင့်နေကတည်းက တယောက်က စ ခုန်ချတယ်။ ပြီးတော့ အတွဲလိုက် ထပ်ကျကြတာ။ သူတို့ ခုန်ချပြီး တော်တော်ကြာမှ ပရဟိတသမားတွေကို လာခွင့်ပေးတာ" လို့ မျက်မြင်တွေ့ သူ တယောက်က ပြောပါတယ်။

ကျဆုံးခဲ့သူတွေထဲက မဝေဝေမြင့်ကို ဩဂုတ် ၁၁ ရက်ညနေပိုင်းက ကျူချောင်းသုသာန်မှာ မီးသင်္ဂြိုဟ်ခဲ့ပြီး  ဓာတ်ပုံရိုက်ခွင့်နဲ့ အရိုးပြာယူခွင့် မရခဲ့ဘူးလို့ ခင်ပွန်းဖြစ်သူက လူမှုကွန်ရက်ကနေ ပြောဆိုထားပါတယ်။

ဗိုလ်တထောင်မြို့နယ်၊ ၄၄ လမ်းမှာ   ဩဂုတ် ၁၀ ရက် ညနေက စစ်ကောင်စီတပ်တွေက လိုက်ဖမ်းစဉ် လူငယ်တွေ တိုက်ပေါ်က ထွက်ပြေးခုန်ချခဲ့တဲ့ ဖြစ်စဉ်မှာ  ၂ ဦးသေဆုံး ၊ ၃ ဦးဒဏ်ရာရ သွားကာ ၃ ဦးဖမ်းမိခဲ့တယ်လို့  စစ်ကောင်စီ ပြန်ကြားရေးက မနေ့က သတင်းထုတ်ပြန်ပါတယ်။

စစ်ကောင်စီက ထုတ်ပြန်တဲ့ သေဆုံး ဒဏ်ရာရသူ အရေအတွက်ဟာ လွတ်လပ်တဲ့မီဒီယာတွေက ဖော်ပြတဲ့ အရည်အတွက်နဲ့ မတူကွဲပြားမှုတွေရှိနေပါတယ်။ 

ရန်ကုန်၊ ဗိုလ်တထောင်မြို့နယ်၊ ၄၄ လမ်းမှာ စစ်ကောင်စီတပ်တွေကလိုက်ဖမ်းစဉ် တိုက်ပေါ်က ခုန်ချသေဆုံးသွားတဲ့ လူငယ်တွေရဲ့ အလောင်းကို ပြန်လည်ထုတ်ယူခွင့်မရဘူးလို့  သေဆုံးသွားတဲ့ လူငယ် တစ်ယောက်ရဲ့  မိသားစုဝင်က ဒီဗွီဘီကိုပြောပါတယ်။

သြဂုတ် ၁၀ ရက် မနေ့ညနေပိုင်းက  ဗိုလ်တထောင်မြို့နယ်၊ ၆ ရပ်ကွက်၊ ၄၄ လမ်း အောက်ဘလောက်ရှိ  တိုက်ခန်းတစ််ခန်းကို စစ်ကောင်စီလက်နက်ကိုင်တပ်တွေက  အင်အားအလုံးအရင်းနဲ့ဝင်ရောက်ဖမ်းဆီးရာမှာ လူငယ်တွေ တိုက်ပေါ်ကနေ ထွက်ပြေး ခုန်ချခဲ့ ကြတာပါ။ 

ဒီဖြစ်စဉ်မှာ သေဆုံးသွားတဲ့ လူငယ် စုစုပေါင်း ၆ ဦးရှိပြီး  ၂ ဦးဒဏ်ရာရရှိတယ်လို့ သတင်းထွက်နေပေမဲ့  NUG အစိုးရရဲ့ PVTelevision ရုပ်သံလူမှုကွန်ရက်မှာတင်ထားတဲ့ စစ်ကောင်စီလုံခြုံရေးတပ်ဖွဲ့ဝင်အချင်းချင်း သတင်းပေးပို့နေတဲ့ အသံဖိုင်မှာတော့ ဗျူဟာမှူး ဗိုလ်မှူးကြီး စိုးထွန်း ဦးဆောင်တဲ့အဖွဲ့က သွားရောက်ဖမ်းဆီးခဲ့တာမှာ ခုန်ချထွက်ပြေးသွားသူ  ၃ ဦးသေဆုံးပြီး ၂ ဦး အခြေအနေမကောင်းတော့ ကြောင်းပြောကြားထားပါတယ်။   

“နောက်ပေါက်ကနေ ခုန်ချတာ။ အလွတ်ကြီးကို ခုန်ချသွားတာပါခင်ဗျ။ ဓာတ်ပုံလေးတွေ ဆရာစိန်လှိုင်ဝင်းကို ပို့ပေးထားပါတယ်ဗျာ။ အောက်ကိုခုန်ချတာ ကျား ၄ မ ၁  ပါခင်ဗျာ။ ဝင်ဖမ်းတာ ဗျူဟာမှူး ဗိုလ်မှူးကြီး စိုးထွန်းနဲ့ပူးပေါင်းအဖွဲ့တွေပါဗျာ၊ ဗိုလ်တထောင်မြို့နယ်မှူး ပုဇွန်တောင်မြို့နယ်မှူး၊ ခရိုင်ရဲတပ်ဖွဲ့မှူး ။  အားလုံးကတော့ ၃ ယောက်ကတော့ မကောင်းဘူးတော့ဘူးဗျ။  ၂ ယောက်ကတော့ ငွေ့ငွေ့လေးပဲ။ အခုသိပ်တော့ မသေချာတော့ဘူးဗျ” လို့ လုံခြုံရေးတာဝန်ရှိသူတစ်ဦးက အထက်အရာရှိကို သတင်းပေးပို့ပြောဆိုသံကိုကြားရပါတယ်။

၄၄ လမ်းဖြစ်စဉ်နဲ့ ပတ်သက်ပြီး သေဆုံး၊ ဒဏ်ရာရ၊ ဖမ်းဆီးမှု အခြေအနေကို   သေသေချာချာသိရဖို့ ဗိုလ်တထောင်ရဲစခန်းကို ဒီဗွီဘီက ဖုန်းနဲ့ ဆက်သွယ်မေးမြန်းခဲ့ပေမယ့် ဖြေဆိုခြင်းမရှိပါဘူး။ 

အဆိုပါဖြစ်စဉ်နဲ့ ပတ်သက်ပြီး သေဆုံးသွားတဲ့ လူငယ်တစ်ဦးရဲ့ မိသားစုဝင်တစ်ဦးကတော့ “သူတို့တွေတိုက်ပေါ်ကပြုတ်ကျတော့ နှစ်ဦးကတော့ဆုံးသွားတယ်။ ကျန်တဲ့ကလေးတွေက ကျိုးပဲ့ကုန်ကျတာ။ မသေသေးတဲ့ကလေးတွေက ကူပါကယ်ပါ အော်နေတာကိုဘယ်သူမှ အကူအညီ မပေးနိုင်ခဲ့ဘူး။ နောက်ပြီး မသေသေးတဲ့ကလေးတွေကို စစ်ကောင်စီက အဲ့နားမှာပဲ ရိုက်နှက်နေတယ်။ မသေခင်ကယ်ကြပါဦးလို့တောင် အော်ခေါ်နေခဲ့တာ။ အခုလည်း Death body (အလောင်) ပြန်သယ်ခွင့်မပေးဘူး” လို့  ဒီဗွီဘီကို ပြောပါတယ်။

လိပ်စာအတိအကျနဲ့ သတင်းပေးလို့ လူငယ်တွေကို ပိတ်ပြီးဝင်ဖမ်းတာဖြစ်ပြီး ဒလန် လက်ချက်အတိအကျပဲလို့ မြို့နယ်သပိတ်ခေါင်းဆောင်တစ်ဦးကလည်း ပြောပါတယ်။

ခုလို လူငယ်တွေ အသက်မဆုံးရှုံးသင့်ဘဲ ဆုံးရှုံးခဲ့ရတာနဲ့ ပတ်သက်ပြီး ဆန္ဒပြလူငယ်တစ်ဦးက“ဒီလုပ်ရပ်ကို ကျနော်တို့ ဘယ်တော့မှမေ့မှာ မဟုတ်ပါဘူး။ ကျနော်တို့ ရဲဘော်ရဲဘက်တွေ သေသလို သူတို့ဘက်က သွေးကြေးပြန်ဆပ်ဖို့ ပြင်ဆင်ထားပါလို့ပဲ ကျနော်ပြောချင်တယ်”လို့ ပြောပါတယ်။

သေဆုံးသွားတဲ့ လူငယ်တွေရဲ့ ရုပ်အလောင်းတွေကို မိသားစုတွေက ပြန်တောင်းတာ မရတဲ့အတွက်  သင်္ဂြိုဟ်ဖို့ကိစ္စအတွက် စစ်ကောင်စီကပဲ ဆက်လက်လုပ်ဆောင်နိုင်ဖွယ်ရှိတယ်လို့လည်း မိသားစုဝင် တစ်ဦးက ပြောပါတယ်။