အကြမ်းဖက်စစ်အုပ်စုက သေဒဏ်ပေး ကွပ်မျက်ခံခဲ့ရတဲ့ ထင်ရှားတဲ့ ၈၈ မျိုးဆက် ကျောင်းသားခေါင်းဆောင် ကိုဂျင်မီရဲ့ ဇနီးဖြစ်သူ မနီလာသိန်း ဦးဆောင်တဲ့ “Project ဝရဇိန်” ကမ်ပိန်းကနေ အမေရိကန်ဒေါ်လာ ၁ သိန်း ကနဦး ရရှိထားခဲ့ပြီလို့ ထုတ်ပြန်ထားပါတယ်။

ဒီကမ်ပိန်းကတော့ အာဏာသိမ်း အကြမ်းဖက်စစ်အုပ်စုကို တုံ့ပြန်တိုက်ခိုက်နေကြတဲ့ မြေပြင်တော်လှန်ရေး ဒရုန်းတပ်ဖွဲ့တွေဆီ အဓိက ထောက်ပို့ပေးနိုင်ဖို့ ရည်ရွယ်တာဖြစ်ပြီးတော့ ပြည်သူတွေအနေနဲ့ ထောက် ပို့ပါဝင်နိုင်ကြဖို့ ဖိတ်ခေါ်ထားတာပါ။

“တစ်သိန်းနော်… တစ်သိန်း… ဒေါ်လာတစ်သိန်း… အစက မျှော်လင့်သတ်မှတ်ထားတာ ၂ ပတ်မှာမှ ဒေါ်လာတစ်သိန်း… ခုတော့ ၇ ရက်နဲ့တင် ပထမအဆင့် တားကတ်ဖြစ်တဲ့ ဒေါ်လာတစ်သိန်း ပြည့်ပါပြီ… ကဲ… ဒုတိယအဆင့်ကို ဆက်သွားကြပါမယ်… 💪🏼💪🏼💪🏼”လို့ ဒို့ကမ်ပိန်းအဖွဲ့က နှိုးဆော်ထားပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

ဒါ့အပြင် မြေပြင် ဒရုန်းတပ်ဖွဲ့တွေအနေနဲ့ အကြမ်းဖက်စစ်အုပ်စုရဲ့ လေကြောင်းကနေ တိုက်ခိုက်မှုတွေကို ရရာနည်းလမ်းနဲ့ တိုက်ခိုက်ဖို့ရာမှာလည်း လိုအပ်ချက်တွေ ရှိနေသလို တပ်အင်အားတိုးချဲ့မှုလုပ်ငန်းတွေ၊ တိုက်ခိုက်ရေး မစ်ရှင်တွေမှာလည်း အာဏာရှင်ကို ဆန့်ကျင်တဲ့ တော်လှန်ပြည်သူတွေဘက်က တတ်အားသမျှ ထောက်ပံ့ကူညီနိုင်ရေးဟာလည်း အရေးပါနေပါတယ်။

ပါဝင်ထောက်ပို့ပါဝင်လိုသူတွေ အနေနဲ့ ဖော်ပြပါ နိုင်ငံအလိုက် ဖေ့စ်ဘွတ်ခ်လင့်ခ်တွေကတဆင့် ဆက်သွယ်နိုင်မှာ ဖြစ်ပါတယ်။

Myanmar (MMK & DMMK)

Asia & Australia, Newzeland ((AUD, BND, JPY, SGD, MYR, NZD, TWD, THB)

Europe, America (CAD, EUR, GBP, USD)

အင်းစိန်ထောင်မှာ ဖမ်းဆီးခံထားရတဲ့ ၈၈ မျိုးဆက်ကျောင်းသားခေါင်းဆောင် တယောက်ဖြစ်တဲ့ ဦးမြအေးကို  စစ်ကောင်စီထောင်တွင်းတရားရုံးက မတ်လ ၁၀ ရက် ဒီကနေ့မှာ  ပုဒ် ၅၀၅(ဂ)နဲ့ ထောင်ဒဏ် ၂ နှစ် အမိန့်ချလိုက်ပါတယ်။  

ဦးမြအေးရဲ့ သမီးဖြစ်သူက “ဒီနေ့က အဖေ့ရဲ့ ၅၆ နှစ်မြောက်မွေးနေ့ဖြစ်သလို၊ မတရားဖမ်းဆီးချုပ်နှောင်ခံနေတာ ၁နှစ်နဲ့ ၁၀ ရက်ကြာခဲ့တဲ့နေ့လဲဖြစ်တယ်။ စစ်ခုံရုံးနဲ့အသွင်မကွာလှတဲ့ အင်းစိန်ထောင်ထဲကတရားရုံးမှာ လပေါင်းများစွာ ရုံးထုတ်ပြီးတော့ ဒီနေ့အမိန့်ချလိုက်တာပါ။”လို့သူ့ရဲ့ လူမှုကွန်ရက်မှာ ရေးသားထားပါတယ်။ 

အကြမ်းဖက်စစ်ကောင်စီ အာဏာသိမ်းစသိမ်းတဲ့ ဖေဖော်ဝါရီလ ၁ ရက်နေ့မှာပဲ ဖမ်းဆီးခြင်းခံခဲ့ရတဲ့ ၈၈ မျိုးဆက်ကျောင်းသားခေါင်းဆောင်တစ်ဦးဖြစ်တဲ့ ဦးမြအေးကို  စစ်ကောင်စီက မင်္ဂလာတောင်ညွန့်မြို့နယ် တရားရုံးထုတ်မှာ ပုဒ်မ ၅၀၅(ဂ) နဲ့ အမှုဖွင့်ထားတာဖြစ်ပါတယ်။

ပုဒ်မ ၅၀၅(ဂ)ဆိုတာကတော့ လူအမျိုးအစားအချင်းချင်းဖြစ်စေ၊ လူအမျိုးစုအချင်းချင်းဖြစ်စေ၊ တဘက်နှင့် တဘက်ပြစ်မှု ကျူးလွန်အောင် လှုံ့ဆော်ရန်အကြံရှိလျှင်၊ သို့တည်းမဟုတ် အဆိုပါ လှုံ့ဆော်ခြင်းကို ဖြစ်စေတန်ရာသည့် အကြောင်းရှိလျှင် ထိုသူ့ကို ၂ နှစ်ထိ ထောင်ဒဏ် တမျိုးမျိုး ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေချမှတ်နိုင်တယ်လို့ ဥပဒေမှာဖော်ပြထားပါတယ်။

ဦးမြအေးဟာ လက်ရှိမှာ ဖက်ဒရယ် ဒီမိုကရက်တစ်အင်အားစု (FDF) ရဲ့ နိုင်ငံရေး ဦးဆောင်အဖွဲ့ဝင်လည်း ဖြစ်ပါတယ်။

၁၉၈၈  ဒီမိုကရေစီအရေးတော်ပုံမှာ ပါဝင်ခဲ့တာနဲ့ပတ်သက်ပြီး ကျောင်းသားခေါင်းဆောင် ဦးမြအေးကို ၁၉၈၉ ခုနှစ်မှာ စစ်အုပ်စုက ပထမအကြိမ်ဖမ်းဆီး ထောင်ဒဏ် ၈ နှစ်ချမှတ်ခဲ့ပြီး ၂၀၀၇ ရွှေဝါရောင်တော်လှန်ရေးမှာ ဒုတိယအကြိမ် နှစ်ရှည်ထောင်ဒဏ် ၆၅ နှစ်ခွဲချမှတ်ခဲ့ကာ အခုနွေဦးတော်လှန်ရေးမှာတော့  တတိယအကြိမ် ထောင်ဒဏ် ၂ နှစ် ချမှတ်ခဲ့တာဖြစ်ပါတယ်။