မကွေးတိုင်း၊ စလင်းမြို့နယ်မှာ ဇန်နဝါရီ ၁၃ ရက် နေလယ်ပိုင်းက CDM ကျောင်းဆရာ တယောက်နဲ့ ဒေသခံပြည်သူ တယောက်ကို စစ်ကောင်စီတပ်သားတွေက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။
သရက်ကုန်းကျေးရွာက အသက် ၄၃ နှစ်အရွယ် CDM ကျောင်းဆရာ ဦးအောင်ကိုဝင်းနဲ့ အသက် ၃၈ နှစ်အရွယ် ဦးအောင်အောင်တို့ကို မနေ့ နေ့လယ်ပိုင်းမှာ စစ်ကောင်စီတပ်သားအင်အား ၅၀ လောက်က လာဖမ်းသွားတာလို့ သရက်ကုန်းရွာ ဒေသခံတယောက်က ပြောပါတယ်။
“အဲဒီစစ်သားတွေ ဖမ်းတုန်းကတော့ ၃ ယောက်အဖမ်းခံရတာ။ တယောက်ကတော့ လမ်းတဝက် လောက်မှာပြန်လွှတ်ပေးခဲ့လို့ ပြန်လွတ်လာတယ်။ အဖမ်းခံရတဲ့ ၂ ယောက်ကိုတော့ ကန်းပြား ရဲစခန်းဘက်ကို ခေါ်သွားကြတယ်”
ရွာထဲကို ဝင်တဲ့ အချိန်မှာလည်း လမ်းမှာတွေ့တဲ့ လူငယ်တွေကို ရိုက်နှက်ခဲ့ပြီး ဖမ်းဆီးခံရတဲ့ CDM ကျောင်းဆရာနဲ့ ပြည်သူတယောက်ကတော့ လက်ရှိအချိန်ထိ ပြန်မလွှတ်ပေးသေးလို့ စစ်ကြောရေးမှာ ရိုက်နှက်နှိပ်စက်ခံရမှာကို မိသားစုဝင်တွေ စိုးရိမ်နေကြတယ်လို့ ပြောပါတယ်။
စစ်တပ်အာဏာသိမ်းခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ ၂၀၂၃ ခုနှစ် ဇန်နဝါရီ ၁၃ ရက်အထိ နိုင်ငံတဝန်း ဖမ်းဆီးချုပ်နှောင်ခံထားရသူ ၁၃၄၉၅ ယောက်ရှိပြီး အဲဒီထဲက ၂၀၅၇ ယောက်ဟာ ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း AAPP ကထုတ်ပြန်ထားပါတယ်။
ဧရာဝတီတိုင်း၊ ဇလွန်မြို့မှာ အောက်တိုဘာ ၁၇ ရက် ညပိုင်းက CDM ကျောင်းဆရာတယောက် နေအိမ်မှာ အသတ်ခံခဲ့ရတယ်လို့ ဒေသခံတွေဆီက သိရပါတယ်။
CDM ပြုလုပ်ထားတဲ့ ကျောင်းဆရာ ဦးစောရဲသီဟ နေအိမ်မှာ တယောက်တည်းရှိနေချိန် အမည်မသိလူသတ်သမားက သတ်ဖြတ်ပြီး ငွေနဲ့ပစ္စည်းတွေ ယူဆောင်သွားတာလို့ ဒေသခံတွေက ပြောပါတယ်။
ဒေသခံတယောက်က “ဆရာက အိမ်မှာ တယောက်တည်းနေတဲ့အချိန် အနုကြမ်းစီးခံရတာ၊ ကတ်ကြေးနဲ့ ၂၆ ချက်ထိုးပြီး သတ်သွားတာ။ ဖုန်းတွေ ဆိုင်ကယ်နဲ့ ငွေတွေယူသွားတယ်” လို့ ပြောပါတယ်။
CDM ကျောင်းဆရာ ဦးစောရဲသီဟဟာ စစ်အာဏာမသိမ်းမီက ဇလွန်မြို့နယ်၊ ဒေါင့်ကြီးအထက်တန်းကျောင်းမှာ အထက်တန်းပြဆရာအဖြစ် တာဝန်ထမ်းဆောင်ခဲ့သူလည်း ဖြစ်တယ်လို့ ဆိုပါတယ်။
အာဏာသိမ်းပြီးနောက်ပိုင်း စစ်အာဏာရှင်ကို ဆန့်ကျင်ကာ CDM မှာ ပါဝင်ခဲ့ပြီးနောက်ပိုင်း အခမဲ့ ပညာဒါန စာသင်ကျောင်းမှာ အွန်လိုင်းကနေ စာဆက်လက်သင်ကြားပေးခဲ့သူလည်း ဖြစ်တယ်လို့ CDM ပညာရေးအသိုင်းအဝိုင်းက သိရပါတယ်။
