ထိုင်းနိုင်ငံတဝန်း လူနာတွေရဲ့ ၇၀ ရာခိုင်နှုန်းလောက်ဟာ ကူးစက်မြန်ဗီဇပြောင်း Delta ကိုဗစ်-၁၉ ဗိုင်းရပ်စ် ကူးစက်ခံထားရတယ်လို့ ရောဂါဗေဒပညာရှင်တဦးရဲ့ အဆိုကို ကိုးကားပြီး နေးရှင်းသတင်းမှာ ဖော်ပြပါတယ်။

ဒါဟာ ပြီးခဲ့တဲ့ဇွန်လအတွင်း ရောဂါကူးစက်မှုနမူနာ ၇၀၀ ကျော်ကို အခြေခံပြီး တွက်ချက်ရယူထားတာဖြစ်ပြီး Delta ကိုဗစ်-၁၉ ဗိုင်းရပ်စ်ဟာ ကူးစက်မှု မြန်ဆန်ကာ ကူးစက်မှုဇာစ်မြစ်ကို လိုက်ဖို့ ခက်ခဲတယ်လို့ ဒေါက်တာယုံဖူဗိုရာဝမ်က ဆိုပါတယ်။

လတ်တလော ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ ထိုင်းနိုင်ငံမှာ တရက်တည်း ကိုဗစ်-၁၉ ကြောင့် သေဆုံးသူ ၄၁ ယောက်နဲ့ ကူးစက်မှုအသစ် ၆၂၃၀ ယောက်ရှိခဲ့တယ်လို့ ကျန်းမာရေးတာဝန်ရှိသူတွေက ပြောပါတယ်။

ဒါကြောင့်မို့ လက်ရှိအချိန်ထိ နိုင်ငံတဝန်း ကိုဗစ်-၁၉ ကြောင့် သေဆုံးသူပေါင်း ၂,၁၈၂ ယောက်နဲ့ ကူးစက်ခံရသူပေါင်း ၂၇၇,၁၅၁ ယောက်အထိ ရှိလာခဲ့ပြီ ဖြစ်ပါတယ်။

       ကူးစက်မှုအသစ်တွေထဲမှာတော့ အကျဉ်းထောင်တွေက ၂၉၄ ယောက် ပါဝင်တယ်လို့ ဆိုပါတယ်။

       အာဆီယံနိုင်ငံတွေထဲမှာတော့ ကိုဗစ်-၁၉ သန်းချီကူးစက်ခံ အင်ဒိုနီးရှား၊ ဖိလစ် ပိုင်နိုင်ငံတွေပြီးရင် မလေးရှားနိုင်ငံက ရောဂါကူးစက်ခံရသူပေါင်း ၇ သိန်း ၆ သောင်းကျော်၊ သေဆုံးသူပေါင်း ၅,၀၀၀ ကျော်နဲ့ ရှိနေပြီး ထိုင်းနိုင်ငံကတော့ အမှတ်စဉ် ၄ နေ ရာမှာ ရှိနေပါတယ်။

ဒေသတွင်း ကူးစက်မှုအမြင့်ဆုံး ထိပ်တန်း ၅ နိုင်ငံထဲမှာတော့ လတ်တလော ကိုဗစ်-၁၉ ရောဂါကူးစက်မှုတွေ မြင့်တက်နေတဲ့ မြန်မာနိုင်ငံက ကူးစက်ခံရသူပေါင်း ၁ သိန်း ၆ သောင်းကျော်နဲ့ ပါဝင်လာခဲ့ပါတယ်။

       ကမ္ဘာတဝန်းလုံးမှာတော့ ကိုဗစ်-၁၉ ရောဂါကူးစက်ခံရသူ စုစုပေါင်း ၁၈၃ ဒသမ ၈၅ သန်းကျော်၊ သေဆုံးသူပေါင်း ၃ ဒသမ ၉၈ သန်းကျော်နဲ့ ရောဂါပြန်လည်ပျောက်ကင်း သက်သာလာသူပေါင်း ၁၆၈ ဒသမ ၂၈ သန်းကျော် ရှိနေတယ်လို့ Worldometers ဝက်ဘ်ဆိုက်ဒ်မှာ ဖော်ပြပါတယ်။