အမေရိကန်စတော့ဈေးကွက်မှာ ဖေဖော်ဝါရီ ၃ ရက်က ဖေ့စ်ဘွတ်ခ်ပိုင်ရှင် Meta ကုမ္ပဏီရဲ့ အစုရှယ်ယာ ၂၀ ရာခိုင်နှုန်းထိ ထိုးစိုက်ကျဆင်းသွားတဲ့သတင်းက နိုင်ငံတကာဈေးကွက်မှာ အတော့်ကို ဂယက်ရိုက်ခဲ့ပါတယ်။
ပြိုင်ဘက်ကုမ္ပဏီတွေဖြစ်တဲ့ Apple နဲ့ Amazon တို့ အမြတ်တွေ ကြီးကြီးမားမား ရရှိနေချိန်မှာ Meta က သူ့ရဲ့ဈေးကွက်တန်ဖိုး ၅ ပုံ ၁ ပုံ၊ ဒေါ်လာ ၂၀၀ ဘီလီယံ ဆုံးရှုံးခဲ့တာပါ။
Wall Street စတော့ဈေးကွက်မှာ ဖေ့စ်ဘွတ်ခ်စတင်ခဲ့တဲ့ ၂၀၁၂ ကတည်းဆိုရင် တရက်အတွင်း အကြီးမားဆုံး ဆုံးရှုံးမှုပါ။ Meta ရှယ်ယာတန်ဖိုး ကျဆင်းမှုက ဥရောပ နည်းပညာစတော့ဈေးကွက်တွေကိုလည်း အများကြီး ရိုက်ခတ်ခဲ့ပါတယ်။
Meta ကုမ္ပဏီရဲ့ အစီရင်ခံချက်ကတော့ ပြိုင်ဘက် တရုတ် ByteDance ကုမ္ပဏီပိုင်ဆိုင်တဲ့ TikTok ဗီဒီယိုတွေကို ကမ္ဘာတဝန်းက လူငယ်တွေ ပိုမိုအသုံးပြုလာတာကြောင့် ပြီးခဲ့တဲ့သုံးလအတွင်း ဖေ့စ်ဘွတ်ခ် အသုံးပြုသူဦးရေ ကျဆင်းခဲ့မှု၊ Apple ကုမ္ပဏီ ရဲ့ privacy မူဝါဒအပြောင်းအလဲ လုပ်ဆောင်မှုနဲ့ ဖေ့စ်ဘွတ်ခ်လုပ်ငန်းအပေါ် အမေရိကန်ဗဟိုဘဏ်ရဲ့ တင်းကျပ်ထားမှုတို့ကြောင့်လို့ အပြစ်တင်ထားပါတယ်။
ကမ္ဘာ့ ဈေးကွက်သုတေသနကုမ္ပဏီ Vanda ကတော့ ပြီးခဲ့တဲ့နှစ် အောက်တိုဘာမှာ ဖေ့စ်ဘွတ်ခ်ကနေ Meta ကုမ္ပဏီနာမည်ပြောင်းပြီးကတည်းက ရှယ်ယာတွေ တဖြည်းဖြည်း ထိုးဆင်းသွားခဲ့တယ်လို့ သုံးသပ်ပါတယ်။
စစ်ကိုင်းတိုင်း ခန္တီးမြို့မှာ ဇန်နဝါရီ ၂၈ ရက်က အသံတိတ်သပိတ် (Silent Strike) သပိတ်ပါဝင်ဖို့ Facebook လူမှုကွန်ရက်မှာ ရေးသားထားတဲ့စာအား ပြန်လည်မျှဝေထားသူ လူငယ်တစ်ယောက် မတရားဖမ်းဆီးခံခဲ့ရပါတယ်။
ဖမ်းဆီးခံရသူဟာ ကိုထွန်းလင်း ဆိုသူဖြစ်ပြီး ခန္တီးမြို့ မြို့မရပ်မှာ နေထိုင်ကာ စစ်ကောင်စီတပ်သားတွေက နေအိမ်မှာ လာရောက်ဖမ်းဆီးသွားတာလို့ သိရပါတယ်။
“အခုညနေ ၆ နာရီလောက်က သူအိမ်ကို စစ်ကောင်စီတပ်တွေဝင်ရောက်ဖမ်းဆီးသွားတယ်။ သူက က Silent Strike သပိတ်မှာပါဝင်ဖို့ ရေးသားထားတာတွေမရှိဘူး။ တခြားလူတင်တဲ့စာကို ပြန်လည်မျှဝေထားတာပဲ ရှိတယ်” လို့ ဖမ်းဆီးခံရတဲ့ ကိုထွန်းလင်းရဲ့ သူငယ်ချင်းက ပြောပါတယ်။
‘ပြည်တော်ဝင်ဖို့ ရုန်းကြစို့’ ဆိုတဲ့ အသံတိတ် အာဏာဖီဆန်ရေး လှုပ်ရှားမှုကို ဖေဖော်ဝါရီ ၁ ရက်နေ့ မနက် ၁၀ နာရီကနေ ညနေ ၄ နာရီအထိ နိုင်ငံတဝန်း ပြုလုပ်မှာဖြစ်ပါတယ်။
ရန်ကုန်နဲ့ မန္တလေး အပါအဝင် မြို့ကြီးအချို့မှာလည်း ဖေဖော်ဝါရီ ၁ ရက်နေ့ အသံတိတ်လှုပ်ရှားမှု ပါဝင်ပြီး ဆိုင်ပိတ်မယ့်အကြောင်း လူမှုကွန်ရက်မှာ ရေးတင်တဲ့ ဆိုင်တချို့ကို စစ်ကောင်စီတပ်တွေက မတရားဝင်ရောက်ဖမ်းဆီးတာနဲ့ ဆိုင်တွေကို ချိပ်ပိတ်တာတွေ လုပ်နေပါတယ်။
