ရှမ်းပြည်မြောက်ပိုင်း၊ မဘိမ်းမြို့နယ်၊ ခိုတာရွာနားမှာ စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို ကချင်လွတ်မြောက်ရေးတပ်မတော် (KIA) နဲ့ PDF ပူးပေါင်းအဖွဲ့တွေက ဧပြီ ၃ ရက် ညနေပိုင်းက အသင့်စောင့်ဆိုင်း ပစ်ခတ်တိုက်ခိုက်ခဲ့ပြီး လက်နက်ကြီးတချို့နဲ့ ရိက္ခာတွေ သိမ်းဆည်းရမိခဲ့တယ်လို့ KIA တပ်ရင်း ၁၂ က ပြောပါတယ်။
မဘိမ်းမြို့မှာရှိတဲ့ ခိုတာရွာကို စစ်ကောင်စီတပ်တွေက အင်အား ၁၀၀ လောက်နဲ့ စစ်ကြောင်းထိုး ဖို့လာတဲ့အချိန် KIA အမှတ် (၁၂) တပ်ရင်း နဲ့ PDF ပူးပေါင်းအဖွဲ့တွေက အသင့်စောင့်ပြီး ပစ်ခတ်ခဲ့ကြတာဖြစ်ကာ တိုက်ပွဲဖြစ်ပွားတဲ့နေရာကို စစ်ကောင်စီ အခြေစိုက်စခန်းတွေဘက်ကနေ ဧပြီ ၄ ရက်နေ့အထိ လက်နက်ကြီးတွေနဲ့ ဆက်တိုက်ပစ်ခတ်ခဲ့တယ်လို့ KIA တပ်ရင်း ၁၂ တာဝန်ရှိသူက ပြောပါတယ်။
လက်နက်ကျသံတွေက အဆက်မပြတ် ကြားနေရပြီး ဒေသခံတွေက ဘာမှယူချိန်မရဘဲ ဘေးလွတ်ရာကိုထွက်ပြေးခဲ့ရကာ အင်အား ၈၀ လောက်ရှိတဲ့ စစ်ကောင်စီစစ်ကြောင်းက ၁၇ ယောက်လောက်ပဲ အကောင်းတိုင်း ကျေးရွာထဲကနေ ပြန်လည်ဆုတ်ခွာသွားတာ မြင်လိုက်ရတယ်လို့ ခိုတာရွာမှာ နေထိုင်တဲ့ ဒေသခံ အမျိုးသမီးတစ်ဦးက ပြောပါတယ်။
မဘိမ်းမြို့နယ်မှာ စစ်ကောင်စီတပ်တွေနဲ့ ဒေသကာကွယ်ရေးအဖွဲ့တွေအကြား မကြာခဏ တိုက်ပွဲဖြစ်ပွားလေ့ရှိပြီး အခု တိုက်ပွဲဖြစ်ပွားတဲ့နေရာက အိမ်ခြေ ၁၀၀ ကျော်ရှိတဲ့ ခိုတာရွာ ဖြစ်ကာ မဘိမ်းမြို့နဲ့ ၄ မိုင်သာကွာဝေးပြီး လက်ရှိမှာတော့ ဒေသခံတွေက ဘေးလွတ်ရာမှာ ထွက်ပြေးတိမ်းရှောင်နေကြတယ်လို့ သိရပါတယ်။
အခုတိုက်ခိုက်မှုနဲ့ပတ်သက်လို့ စစ်ကောင်စီဘက်က ထိခိုက်သေဆုံးတဲ့အခြေနေကိုတော့ သီးခြားအတည်မပြုနိုင်သလို စစ်ကောင်စီဘက်ကလည်း သတင်းထုတ်ပြန်လေ့မရှိပါဘူး။
ကချင်လွတ်မြောက်ရေးတပ်မတော်(ကေအိုင်အေ) တပ်မဟာ (၉)၊ တပ်ရင်း (၆) ဒေသ ဆိုင်းတောင်၊ စဘော်မှော်ကျေးရွာနားမှာ နိုဝင်ဘာ ၂၃ ရက် နေ့လယ် ၁ နာရီဝန်းကျင်လောက်က စစ်ကောင်စီ တပ်သားတွေ မော်တော်ယာဉ်နဲ့ ဖြတ်သန်းလာတဲ့အချိန် မိုင်းဆွဲတိုက်ခိုက်ခိုက်ရတယ်လို့ ကေအိုင်အေ ရှေ့တန်းသတင်းရင်းမြစ်ကနေ သိရပါတယ်။
စစ်ကောင်စီတပ်သား ၈ ဦးပါတဲ့ ကားတစီးဟာ စဘော်မှော်နား သွားလာနေတဲ့အချိန် ကေအိုင်အေက မိုင်းခွဲ တိုက်ခိုက်လိုက်တာကြောင့် ကားမောင်းတဲ့ စစ်ကောင်စီတပ်သား တယောက် သေဆုံးပြီး ငါးယောက် ထိခိုက်ဒဏ်ရာရရှိခဲ့တယ်လို့ ရှေ့တန်းသတင်းရင်းမြစ်က ပြောပါတယ်။
မိုင်းဆွဲတိုက်ခိုက်ခံရတာကြောင့် ဖားကန့် စစ်ကောင်စီတပ်စခန်းကနေ လက်နက်ကြီးပစ်ခတ်ခဲ့သလို ခ.မ.ရ (၁၁၁) တပ်သားတွေကလည်း စဘော်မှော်ကျေးရွာနားမှာ သွားလာလှုပ်ရှားနေတာကြောင့် တိုက်ပွဲတွေ ဖြစ်ပွားနိုင်တယ်လို့ ဒေသခံတွေထံက သိရပါတယ်။
နိုဝင်ဘာ ၂၂ ရက် ညနေကလည်း ဆိုင်းတောင် စစ်ကောင်စီတပ်စခန်းကို ကချင်လွတ်မြောက်ရေးတပ်သားတွေ သွားရောက်ပစ်ခတ်ခဲ့ပြီး စစ်ကောင်စီတပ်သားတွေ ထိခိုက်ဒဏ်ရာရခဲ့ပါတယ်။
