ယူဂန်ဒါနိုင်ငံမှာ LGBTQ ကို ရာဇ၀တ်မှု လို့ သတ်မှတ်တဲ့ ဥပဒေတရပ်ကို ပြီးခဲ့တဲ့သီတင်းပတ်က အတည်ပြုလိုက်တာကို ဆန့်ကျင်ကန့်ကွက်ဖို့အတွက် တောင်အာဖရိကပြည်သူတွေဟာ မတ် ၃၁ ရက်က ပရီတိုရီးယားနဲ့ ကိပ်တောင်း မြို့တွေရဲ့လမ်းတွေပေါ် ထွက်လာခဲ့ကြပါတယ်။
ပရီတိုးရီးယားရှိ ကုလသမဂ္ဂ သတင်းအချက်အလက်စင်တာ အပြင်ဘက်မှာ လူ ၁၀၀ လောက် ဆန္ဒပြခဲ့ကြပါတယ်။
အလံတွေဝှေ့ယမ်း သီချင်းတွေဆိုနေကြတဲ့ ဆန္ဒပြသူတွေဟာ ဒီဥပဒေကို လက်မှတ်မထိုးဖို့ ယူဂန်ဒါသမ္မတ ယိုဝါရီ မူဆယ်ဗီနီကို တောင်းဆိုခဲ့ကြပါတယ်။
“ဒါဟာ ယူဂန်ဒါ ပြဿနာတင်မက အာဖရိကတိုက်ပြဿနာလဲ ဖြစ်တာကြောင့် ကမ္ဘာ့ခေါင်းဆောင်တွေက မူဆယ်ဗီနီကို ဒီဥပဒေကြမ်းကို လက်မှတ်မထိုးဖို့ ဖိအားပေးသင့်တယ်” လို့ ယူဂန်ဒါ LGBTQ အခွင့်အရေးလှုပ်ရှားသူလဲဖြစ်တဲ့ ဓာတ်ပုံဆရာ ပါပါဒီ ဒီလိုဗီ ကွာဂလာ က ပြောပါတယ်။
လိင်တူ၊ လိင်ကွဲ၊ လိင်ပြောင်း သူတွေကလဲ ဘယ်သူ့ကိုမှ ဒုက္ခပေးနေတာမှ မဟုတ်ပဲ သူတို့လဲ တခြားသူတွေလိုပဲ အသက်ရှင်နေထိုင်ဖို့ ထိုက်တန်ကြောင်း သူက ဆိုပါတယ်။
“ဒီအခွင့်အရေးတွေကို ဖယ်ရှားလို့ မရဘူး။ ဒါ ကမ္ဘာ့အရေးပေါ်အခြေအနေပါ။”
ယူဂန်ဒါဟာ လိင်တူဆက်ဆံခြင်းကို တားမြစ်ထားပြီးဖြစ်တဲ့ အာဖရိကနိုင်ငံ ၃၀ ကျော်မှာ ပါဝင်နေပြီး ဒီဥပဒေသစ်ဟာ အမျိုးသားချင်း လိင်တူချစ်သူ၊ အမျိုးသမီးချင်း လိင်တူချစ်သူ၊ လိင် ၂ မျိုးလုံးကို တိမ်းညွှတ်သူ၊ လိင်ပြောင်း၊ လိင်ကွဲ (LGBTQ) အဖြစ် အမျိုးအစား ခွဲခြား သတ်မှတ်ရုံကိုတောင် တရားမဝင်ကြောင်း လုပ်ဆောင်တဲ့ ပထမဆုံး ဥပဒေဖြစ်တယ်လို့ Human Rights Watch လူ့အခွင့်အရေးအဖွဲ့က ပြောပါတယ်။
အမေရိကန်အရာရှိတွေဟာ နိုဝင်ဘာ ၁၉ ရက် နှောင်းပိုင်းက သေနတ်သမား ၅ ဦးထက်မနည်း သေဆုံးပြီး ၂၅ ဦး ဒဏ်ရာရခဲ့တဲ့ ကော်လိုရာဒို စပရင်းစ်လို့ နာမည်ပေးထားတဲ့ လိင်စိတ်ခံယူချက် ကွဲပြားသူ LGBTQ တွေ လာလေ့ရှိတဲ့ နိုက်ကလပ်ကို စုံစမ်းစစ်ဆေးနေပါတယ်။
ရဲတပ်ဖွဲ့က သံသယရှိသူဟာ အသက် ၂၂ နှစ်အရွယ် အန်ဒါဆန် လီး အယ်လ်ဒရစ်ချ်လို့ ဖော်ထုတ်ထားပြီး သူဟာ ‘ရိုင်ဖယ်ရှည်’ သေနတ်ကို သုံးခဲ့တယ်လို့ ပြောပါတယ်။
သူဟာ ပစ်ခတ်မှုဖြစ်ပွားပြီး မကြာခင်မှာပဲ ရဲတပ်ဖွဲ့က ဖမ်းဆီးထိန်းသိမ်းခဲ့ပြီး ဒဏ်ရာတွေအတွက် ဆေးကုသမှု ခံယူနေတယ်လို့ တာဝန်ရှိသူတွေက ပြောပါတယ်။
ဒဏ်ရာရသူ အများအပြားက စိုးရိမ်ရတဲ့ အခြေအနေမှာ ရှိနေကြပြီး ဒေသန္တရဆေးရုံတွေမှာ ကုသပေးနေတယ်လို့ အာဏာပိုင်တွေက ပြောပါတယ်။
ဒေသခံ LGBTQ အသိုက်အဝန်းအတွက် ဘေးကင်းလုံခြုံတဲ့ နေရာတခုအဖြစ် လူအများက ဖော်ပြတဲ့ ဈေးဝယ်စင်တာတခုမှာရှိတဲ့ Club Q က ခုဖြစ်ရပ်ကို ဖေ့စ်ဘွတ်ခ်မှာ “အမုန်းတရားကြောင့် တိုက်ခိုက်မှု” လို့ ခေါ်ဆို ရေးသားခဲ့ပါတယ်။
တိုက်ခိုက်မှုဟာ အမုန်းတရားက လှုံ့ဆော်လို့ ဟုတ် မဟုတ် စုံစမ်းစစ်ဆေးနေတယ်လို့ အာဏာပိုင်တွေက ပြောပါတယ်။
အမေရိကန်ပြည်ထောင်စု ထောက်လှမ်းရေးဗျူရို FBI က ဖက်ဒရယ်တုံ့ပြန်မှု အာမခံချက်ရှိမရှိ ဆုံးဖြတ်ဖို့ တရားဥပဒေစိုးမိုးရေး လုပ်ဖော်ကိုင်ဖက်တွေနဲ့ လက်တွဲလုပ်ဆောင်နေတယ်လို့ ပြောပါတယ်။
ရိုင်ဖယ်အပါအဝင် သေနတ်အများအပြားကို ခန်းမထဲမှာ တွေ့ခဲ့တယ်လို့ ကော်လိုရာဒို စပရင်းစ် ရဲဌာနအကြီးအကဲ အဒ်ဒရီယံ ဗက်စ်ကက်ဇ်က နိုဝင်ဘာ ၂၀ ရက်မှာ လုပ်တဲ့ သတင်းစာရှင်းလင်းပွဲ မှာ ပြောခဲ့ပါတယ်။
ရဲတပ်ဖွဲ့က လက်နက်တွေရဲ့ ပိုင်ဆိုင်မှုကို ဆုံးဖြတ်ဖို့ လုပ်နေတယ်လို့ ဆိုပါတယ်။ အကြမ်းဖက်မှုကို ရှုတ်ချတဲ့ ကြေညာချက်မှာ သမ္မတ ဂျိုးဘိုင်ဒင်က အမေရိကန်တွေဟာ အမုန်းတရားတွေကို သည်းမခံနိုင်ဘူးလို့ ပြောခဲ့ပါတယ်။