ထိုင်းနိုင်ငံမှာ ပါတီစုံဒီမိုကရေစီရွေးကောက်ပွဲကြီး နီးလာတာနဲ့အမျှ သက်ဆိုင်ရာပါတီတွေ အပြိုင်မဲဆွယ်နေရာမှာ လူငယ်တွေကြား ရေပန်းစားတဲ့ ကလောက်ကိုင်ပါတီ (Move Forward Party) က သွားလေရာနေရာတိုင်း ခြိမ့်ခြိမ့်သဲအားပေးမှုခံရပြီး ရေပန်းစားမှု အရှိန်မြင့်နေပါတယ်။

အသက် ၄၂ သာရှိသေးတဲ့ ပါတီခေါင်းဆောင် ထိမ်း ဖိထား လိုမ့်ကျ ရွန်းရတ်နဲ့ အဖွဲ့ဟာ မနေ့က နွန်ထပူရီနယ်မြေထဲ မဲဆွယ်စည်းရုံးရာမှာ လူပေါင်း ၄,၀၀၀ ကျော် လာရောက်အားပေးခဲ့ကြပါတယ်။

ပြည်သူအတွက် ထိုင်ခုံပေါင်း ၂၀၀ သာ စီစဉ်ထားပေမဲ့ ထောင်နဲ့ချီ လာရောက်အားပေးတာကြောင့် ပါတီခေါင်းဆောင် ဖိထားက ကျေနပ်အားရကြောင်း၊ ဒီလိုအခြေအနေမျိုးမှာ သူတို့ပါတီလမ်းကြောင်းဟာ အစိုးရအိမ်တော်ကလွဲလို့  တခြား ရွေးချယ်စရာ လမ်းမရှိတော့ကြောင်း၊ တနိုင်ငံလုံးမှာ အမတ်နေရာပေါင်း ၁၆၀ ရဖို့ လျာထားပြီး ကိုယ်တိုင်အစိုးရဖွဲ့နိုင်ဖို့ ယုံကြည်မှုအပြည့်ရှိတယ်လို့ ပြောသွားပါတယ်။

ရွေးကောက်ပွဲမတိုင်ခင် ပြည်သူတွေရဲ့ အားပေးမှုအခြေအနေတွေနဲ့ ပတ်သက်လို့ စစ်တမ်းတွေ ကောက်ယူနေကြရာမှာ မနေ့ကထုတ်ပြန်တဲ့ Nida Poll ရဲ့ စစ်တမ်းအရ ဝန်ကြီးချုပ်နေရာမှာ Move Forward Party ခေါင်းဆောင် ထိမ်း ဖိထားက ဖွေ့ထိုင်းပါတီခေါင်းဆောင် အုန်အင် ခေါ် ဖဲထောင်းထန်းကို ကျော်တက်သွားသလို The Nation Poll ရဲ့ ဒီကနေ့ စစ်တမ်းထုတ်ပြန်ချက်မှာလည်း ဖိထားက ထိပ်ဆုံးကို ရောက်သွားပါတယ်။

The Nation Poll စစ်တမ်းက ဧပြီ ၂၄ ရက်မှ မေလ ၃ ရက်နေ့ထိ တနိုင်ငံလုံးရှိ မဲဆန္ဒနယ်မြေပေါင်း ၃၆၇ နယ်မြေရှိ လူပေါင်း ၁၁၄,၄၅၇ ဦးကို စစ်တမ်းကောက်ယူခဲ့ရာမှာ ဝန်ကြီးချုပ်နေရာမှာ ထိမ်းဖိထားက ၂၉ ဒသမ ၃၇ ရာခိုင်နှုန်းနဲ့ ပထမ၊ ဖဲထောင်းထန်းက ၂၇ ဒသမ ၅၅ နဲ့ ဒုတိယ၊ ဆေထာထဝီးဆင် (ဖွေ့ထိုင်းပါတီ) က ၁၃ ဒသမ ၂၈၊ ဗိုလ်ချုပ်ကြီး ပရာယုဒ်ကျန်အိုးချားက ၈ ဒသမ ၈၅ အသီးသီးရပြီး ဘယ်သူမှန်းမသေချာတာက ၅ ဒသမ ၃၅ နဲ့ ထိုင်းနိုင်ငံမှာ နိုင်ငံရေးသက်တမ်းအရှည်ဆုံး ဒီမိုကရက်ပါတီမှ ကျူရင်း ရတ်တနဝိဆစ်ကတော့ ၂ ဒဿမ ၄၉ ရာနှုန်းသာ ရရှိပါတယ်။

အခုလို ထိမ်းဖိထားက ဖွေ့ထိုင်းပါတီကို ကျော်တက်သွားရတာဟာ Move Forward Party ဟာ တိကျပြတ်သားတဲ့ မူဝါဒရှိတယ်၊ ဦးလေးကြီး (အာဏာသိမ်းစစ်ခေါင်းဆောင်တွေ) နဲ့ လုံးဝပူးပေါင်းမှာ မဟုတ်ဘူးဆိုတာ အပြတ်ကြေညာတယ်၊ ပြည်သူတွေနဲ့ အနီးစပ်ဆုံး ချဉ်းကပ်တယ်၊ ဖွေ့ထိုင်းပါတီကတော့ ဦးလေးတွေနဲ့ ပေါင်းမပေါင်းဆိုတာ ခုထိ မသေချာသေးဘူး၊ ဒီကြားထဲမှာ ဖဲထောင်းထန်းက သူ့ကိုယ်ရေးကိစ္စ (ကလေးမွေးနေတာ) ကြောင့် မဲဆွယ်စည်းရုံးရေး မဆင်းနိုင်ဘူး၊ ဆေထာထဝီးဆင်လည်း စည်းရုံးရေးဆင်းပေမဲ့ သူအဆိုပြုတဲ့ လူတယောက်ကို ဘတ် ၁၀,၀၀၀ ဒစ်ဂျစ်ဒယ်လ်ငွေ ထည့်ပေးမယ်ဆိုတဲ့ကိစ္စ မဖြစ်နိုင်တဲ့အကြောင်း ဝေဖန်ခံနေရတယ်၊ အဲဒါကြောင့် သူတို့ကိုအားပေးတဲ့လူတွေက Move Forward ဘက်ကို ရောက်သွားတဲ့သဘောပဲလို့ Nation Poll စစ်တမ်းကောက်ရေး အဖွဲ့ခေါင်းဆောင် ပရော်ဖက်ဆာ ဒေါက်တာ ချေဆထာ ဆပ်ယင်က ပြောပါတယ်။

ဗိုလ်ချုပ်ကြီး ပရာယုဒ်ကျန်အိုးချားရဲ့ အခြေအနေကတော့ တိုးတက်မှုမရှိဘဲ အရင် ပထမအကြိမ် ကောက်ခံရရှိထားတဲ့ ရာခိုင်နှုန်းမှာပဲ ငြိမ်နေပြီး သူ့ကိုထောက်ခံသူတွေဟာ ထိုင်းတောင်ပိုင်း ၁၁ ခရိုင်မှာ အများဆုံးလို့ ဆိုပါတယ်။

မဲဆန္ဒနယ်မြေအသီးသီးရဲ့ လွှတ်တော်အမတ်နေရာတွေနဲ့ ပတ်သက်တဲ့ စစ်တမ်းမှာတော့ ဖွေ့ထိုင်းပါတီက ၃၈ ဒသမ ၄၈ ရာခိုင်နှုန်းနဲ့ အများဆုံးဖြစ်နေဆဲဖြစ်ပြီး Move Forward ပါတီကတော့ ၂၈ ဒသမ ၀၃ ရာနှုန်းမှာ ရှိနေပါတယ်။

Move Forward ပါတီရဲ့ မူဝါဒပေါင်း အချက် ၃၀၀ ရှိပြီး ပါတီအနိုင်ရရင် ဆောင်ရွက်ပေးမယ်လို့ ကတိပေးထားတဲ့အထဲမှာ မိမိဆန္ဒအလျောက်သာ စစ်မှုထမ်းရမယ်၊ လာဘ်စားမှုမရှိစေရ၊ ပွင့်လင်းမြင်သာပြီး အစစ်ဆေးခံနိုင်တဲ့အစိုးရ ဖြစ်ရမယ်၊ ခရိုင်ဝန်တွေကို မိမိခရိုင်တွင်းနေ ပြည်သူများက ရွေးချယ်တင်မြှောက်ခြင်းဖြင့် အာဏာခွဲဝေစနစ်ကျင့်သုံးမယ်၊ လယ်သမားများအတွက် မြေဧက ၅ သန်းကျော်ကို စိုက်ပျိုးနိုင်တဲ့မြေဂရန် ဖော်ပေးမယ်၊ အနိမ့်ဆုံးလုပ်အားခ တနေ့ ဘတ် ၄၅၀ ပေးပြီး နှစ်စဉ်တိုးပေးမယ်၊ လူပေါင်း ၁ သန်းအတွက် အလုပ်အကိုင် နေရာချပေးမယ်၊ ခရိုင်တိုင်းမှာ လျှပ်စစ်ဘတ်စ်ကားပြေးဆွဲမယ်၊ ကလေးသူငယ် ထောက်ပံ့ကြေး ၁ လ ဘတ် ၁,၂၀၀၊ လူအိုထောက်ပံ့ကြေး ၁ လ ဘတ် ၃,၀၀၀ တိုးပေးမယ်၊ စာသင်ကျောင်းမှာ ဘေးကင်းလုံခြုံသော သင်ကြားရေးစနစ်နဲ့ ဆရာများအတွက် နားချိန်ပိုရရန် စီစဉ်ခြင်း၊ လျှပ်စစ်မီတာခ ၁ ယူနစ်ကို ၀ ဒသမ ၇ ဘတ် လျှော့ပေးမယ် စတဲ့အချက်တွေ ပါဝင်ပါတယ်။

ကိုးကား - komchadluek.net

ထိုင်းနိုင်ငံမှာ မေလ ၁၄ ရက် ကျင်းပမယ့် ပါတီစုံဒီမိုကရေစီအထွေထွေရွေးကောက်ပွဲအတွက် သက်ဆိုင်ရာနိုင်ငံရေးပါတီအသီးသီးက အပြိုင်အဆိုင် နည်းအမျိုးမျိုးနဲ့ မဲဆွယ်စည်း ရုံးနေကြပါတယ်။

တဘက်မှာလည်း ပြည်သူတွေရဲ့ ထောက်ခံအားပေးမှုအခြေအနေတွေကို စောင့်ကြည့် အကဲခတ် နေကြပြီး အဲဒီထဲက Nida Poll Election 2023 ရဲ့ မနေ့က ထုတ်ပြန်တဲ့ စစ်တမ်း ကောက်ယူရရှိမှုအရ ဝန်ကြီးချုပ်နေရာမှာ Move Forward Party  ( ကောက်ကလိုင်ပါတီ ) ခေါင်းဆောင် ဖိထား လိုမ့်ကျရွန်းရတ် ( အသက် ၄၂ နှစ် ) က ရှေ့ပြေးနေပါတယ်။ 

Nida Poll က စစ်တမ်း ၃ ကြိမ်ကောက်ယူချက်အရ ပထမအကြိမ် နဲ့ ဒုတိယအကြိမ်မှာ Phue Thai Party ခေါင်းဆောင် / ဝန်ကြီးချုပ်ဟောင်း သက်ဆင်ရှင်နာဝပ်ရဲ့ သမီး ဖဲထောင်းထန်း ( အသက် ၃၆ နှစ် ) က လူကြိုက်အများဆုံးဖြစ်နေပြီး ဒီတတိယအကြိမ်မှာတော့ ဖိထားက  ကျော်တက်သွားပါတယ်။

တတိယအကြိမ်စစ်တမ်းမှာ ဖိထားက ၃၅ ဒသမ ၄၄ ရာခိုင်နှုန်းနဲ့ ရေပန်းအစားဆုံးဖြစ်ပြီး ဖဲ ထောင်းထန်းက ၂၉ ဒသမ ၂၀  ရာနှုန်းနဲ့ ဒုတိယ ၊ United Thai Nation Party ( ရူမ့်ထိုင်းဆန့်ချတ် )ပါတီမှ ဗိုလ်ချုပ်ကြီး ပရယုဒ်ကျန်အိုးချားက ၁၄ ဒသမ ၈၄ ရာနှုန်းနဲ့ တတိယ၊ ဖွေ့ထိုင်းပါတီမှ ဆေထာထဝီးဆင်က ၆ ဒသမ ၇၆ ရာနှုန်းနဲ့ စတုတ္ထနေရာရောက်ကာ ဝန်ကြီးချုပ်နေရာနဲ့ ထိုက်တန်သူမရှိဘူးလို့ ပြောတာကတော့ ၃ ရာခိုင်နှုန်း ရှိနေပါတယ်။ 

ဒီစစ်တမ်းဟာ ဧပြီလ ၂၄ မှ ၂၈ ရက်ထိ ၅ ရက်တာအတွင်း လူပေါင်း ၂၅၀၀ ကို မေးမြန်းထားတာ ဖြစ်ပါတယ်။

အခုလို ဖိထားက ဖဲထောင်းထန်းကို ကျော်တက်သွားရတာဟာ ကောက်ကလိုင်ပါတီမှာ ပြတ်သားတဲ့ ခံယူချက်ရှိတယ်၊ သူတို့ပါတီအာဏာရပြီး ရက်ပေါင်း ၁၀၀ အတွင်း အစိမ်းရောင်နယ်မြေ ( ပတ်ဝန်းကျင်ထိန်းသိမ်းရေး ) ဖြစ်ရမယ်၊  ဒီဘိတ် ( နိုင်ငံရေးစကားရည်လုပွဲ )တိုင်းကို တက် ရောက်ပြီး ပိုင်ပိုင်နိုင်နိုင် ပြောတတ်တယ်၊ တခြားပါတီနဲ့မတူတဲ့ ပြုပြင်ပြောင်းလဲမှုတွေ  အဆိုပြုတယ်၊ သူတို့ဟောပြောချက်တွေက Tit tok လူမှုကွန်ရက်မှာ ရက်တိုတိုအတွင်း သန်းနဲ့ချီပြီး မျှဝေနေကြတယ်လို့ Kasetsart တက္ကသိုလ် နိုင်ငံရေးသိပ္ပံအသင်းဥက္ကဋ္ဌ ဒေါက်တာ ထနဖွန်း ဆီယာ့ကွန်းက MCOT သတင်း အင်တာဗျူးမှာ ပြောပါတယ်။

ကောက်ကလိုင်ပါတီက ဧပြီ ၂၉ မှ မေလ ၃ ရက်နေ့တွေအတွင်း ထိုင်းတောင်ပိုင်း ဖူးကက်၊ မြောက်ပိုင်း ချင်းမိုင်နဲ့ အရှေ့ပိုင်း ချွန်းပူးရီးခရိုင်မှာ ကွင်းဆင်းပြီး ပြည်သူတွေနဲ့ တွေ့ဆုံဟော ပြောပွဲပြုလုပ်ရာမှာလည်း လူတွေတခဲနက်အားပေးခဲ့ကြပါတယ်။

အများအားဖြင့် လူငယ်လူရွယ်တွေဖြစ်ပြီး မနေ့က ချွန်းပူးရီး- ဘန်းဆဲန်ပင်လယ်ကမ်းခြေတွေ့ဆုံပွဲမှာ ပါတီခေါင်းဆောင် ဖိထားက “ လူတွေပင်လယ်ကို အလည်လာရတဲ့အကြောင်းရင်းမှာ အပူရှောင်ရင်ရှောင် မဟုတ်ရင် အချစ်ကိုရှောင်ပြီး ရောက်လာတာလို့ဆိုရိုးစကားရှိတယ်။ ကျနော်တို့ကတော့ ပင်လယ်မှာအချစ်ကို ရှောင်လို့မရတော့ဘူး ဒါလောက်အများကြီးလာအားပေးတာကို မချစ်ဘဲနေလို့ရမလား”လို့ လူငယ်အကြိုက်ပြောလိုက်ရာမှာ အားပေးသံတွေ ဝက်ဝက်ကွဲသွားပါတယ်။

သူတို့ပါတီဟာ တိကျပြတ်သားတဲ့မူဝါဒရှိတယ်။ ဘယ်စီးပွါးရေးသမားတွေနဲ့မှ ကျေးဇူးခံ ကျေးဇူးစား မရှိဘူး။အားနာစရာအနှောင်အဖွဲ့မရှိဘူး။ ဝန်ကြီးချုပ်ကို ပြောင်းလဲတာ ပါတီကိုပြောင်းလဲတာမဟုတ်ဘဲ တိုင်းပြည်ကိုပြောင်းလဲဖို့သာ အဓိကကျတယ်။ နိုင်ငံရေးကောင်းရင် စီးပွါးရေးကောင်းမယ်။ ပြည်သူတွေ ဝဝလင်လင်စားရမယ်လို့ ပြောပါတယ်။ 

Nida Poll Election စစ်တမ်းနဲ့ ပတ်သက်ပြီး ဖိထားက "ဒါဟာ မဆုတ်မနစ်ကြိုးစားမှုနဲ့ ပြည်သူတွေရဲ့ စိတ်ချယုံကြည်မှုပြယုဂ်ပဲ။ ဒါပေမဲ့ စစ်တမ်းအဖြေထက် ပြည်သူတွေနဲ့ ထဲထဲ ဝင်ဝင်တွေ့ဆုံခြင်းဟာ ပိုပြီးအရေးကြီးပါတယ်။ ဒါကြောင့် ပြည်သူထဲ ထပ်ပြီးကွင်းဆင်းဖို့ အစွမ်းကုန်ကြိုးစားမယ်။ မျှော်လင့်ချက်နဲ့ တိုက်ပွဲဝင်နေတာဖြစ်တယ်။ ပညာသမာဓိကို အဓိကထားပြီး အမှောင်ကို အလင်းရောင်နဲ့ ခွင်းသွားမယ်"လို့ သတင်းထောက်တွေကို ပြောပါတယ်။ 

အခုလို ကောက်ကလိုင်ပါတီက ကျော်တက်သွားတဲ့အပေါ်မှာ ဖွေ့ထိုင်းပါတီခေါင်းဆောင် ဖဲထောင်း ထန်းကတော့ Nida Poll စစ်တမ်းတွေဟာ ယုံရတာလည်းရှိတယ်၊ မယုံရတာ လည်းရှိတယ်၊ သူ့အနေနဲ့တော့ ဝန်ကြီးချုပ်နေရာအတွက် ကိုယ့်ကိုယ်ကို ယုံကြည်မှုအပြည့်နဲ့ အစွမ်းကုန်ကြိုးစားဖို့ အဆင်သင့်ရှိတယ်၊ မကြာခင်ရက်ပိုင်းအတွင်း လူထုကြားထဲ မဲဆွယ်စည်းရုံးရေးဆင်းဦးမယ်လို့ ယမန်နေ့သတင်းစာရှင်းပွဲမှာ ပြောပါတယ် ။

သူ့ဖခင် ဝန်ကြီးချုပ်ဟောင်း သက်ဆင်ရှင်နာဝပ် မကြာခင်ထိုင်းကိုပြန်လာမယ်ဆိုတာဟာ ပါတီနဲ့ရော အခုစည်းရုံးရေးလုပ်ငန်းတွေနဲ့ပါ လုံးဝပတ်သက်ခြင်းမရှိကြောင်း၊ အဖေ့အနေနဲ့လည်း ဝန်ကြီးချုပ်လာလုပ်မယ်လို့ တခါမှမပြောဖူးဘူး။ မလိုတဲ့သူတွေက မဆိုင်တာကို အတင်းဆွဲထည့် နေခြင်းသာဖြစ်တယ်၊  အဖေဟာ လူသားတစ်ယောက်ဖြစ်တယ်၊ သူ့မြေးတွေနဲ့တူတူ နေချင်တယ်၊ လူသားချင်းစာနာတဲ့ဘက်က ကြည့်စေချင်တယ်လို့ ပြောပါတယ်။ 

သူဟာ ကလေးမွေးဖွားပြီး ၂ ရက်အကြာ သွေးနုသားနုနဲ့  စည်းရုံးရေးဆင်းမယ်ဆိုတာဟာ ကောက် ကလိုင်က ကျော်တက်လာတာကို စိုးရိမ်နေတဲ့သဘောပါဘဲလို့  လူမှုကွန်ရက်မှာ မှတ်ချက်ပေး နေ ကြပါတယ်။ 

ကောက်ကလိုင်ပါတီက စစ်တမ်းမှာရော အပြင်မှာပါ ရေပန်းစားလူကြိုက်များနေပေမယ့်  Future Forward Party ခေါင်းဆောင် ထနားထွဏ်း ကျင်ရုန့်ရိန်းကစ်လို စစ်အာဏာရှင်ရဲ့ အနာအဆာအမျိုးမျိုးရှာပြီး ဖယ်ထုတ်ခံရမှာကိုလည်း စိုးရိမ်နေကြပါတယ် ။ 

Move Forward Party ဟာ Future Forward Party ကနေ ပြန်လည်ဖွဲ့စည်းခဲ့တဲ့ ပါတီဖြစ်ပါတယ်။ ၂၀၁၉ ရွေးကောက်ပွဲဝင်ခါနီးက Future Forward Party ခေါင်းဆောင် ထနား ထွဏ်းဟာ ဝန်ကြီးချုပ်အဖြစ်ရွေးချယ်ခံဖို့ လူကြိုက်များရေပန်းစားခဲ့ပေမယ့်  အာဏာသိမ်းစစ် တပ်ရဲ့ ရမယ်ရှာ တရားစွဲတာကိုခံခဲ့ရပြီး ပါတီရုပ်သိမ်းခံရသလို ပါတီခေါင်းဆောင်တွေဟာလည်း ၁၀ နှစ်တာ ရွေးကောက်ပွဲဝင်ဖို့ ပိတ်ပင်ခံခဲ့ရပါတယ်။ အဲဒီနောက် အရေးယူမခံရတဲ့ ထိမ်းဖိထားနဲ့ ပါတီဝင်တွေက Move Forward Party ကို ထူထောင်လှုပ်ရှားနေတာ ဖြစ်ပါတယ် ။ 

ကိုးကား - The Nation / MCOT / Thairath / 3Plus News