Netflix နဲ့ အပြိုင် အင်တာနက်ကနေ ရုပ်သံထုတ်လွှင့်ဝန်ဆောင်မှုပေးနေတဲ့ Disney+ က ပြီးခဲ့တဲ့ ၃ လအတွင်း အားပေးကြည့်ရှုသူ ၁၁ ဒသမ ၈ သန်းအထိ တက်လာပြီး ဖေဖော်ဝါရီ ၁၁ ရက်မှာ အစုရှယ်ယာတွေ မြင့်တက်ခဲ့တယ်လို့ ကြေညာပါတယ်။
ဝေါ့လ်ဒစ္စနေကုမ္ပဏီရဲ့ ကုမ္ပဏီခွဲ Disney+ က အွန်လိုင်းရုပ်သံလွှင့်မှုဈေးကွက်ကို ဦးဆောင်နေတဲ့ Netflix နဲ့ ကြည့်ရှုသူအရေအတွက် ကွာဟမှု ကျဉ်းလာနေတာပါ။
မကြာမီက ပေါက်ခဲ့တဲ့ ရုပ်ရှင်သုံးကား "The Mandalorian," "Black Widow" နဲ့ "The Beatles: Get Back" တို့ကြောင့် ကြည့်ရှုသူတွေ ပိုများလာတာပါ။
၃ လအတွင်း ကြည့်ရှုသူ ၁၁ ဒသမ ၈ သန်းနဲ့ အမြတ်ငွေ ဒေါ်လာ ၂၁ ဒသမ ၈၂ ဘီလီယံ ရခဲ့တာပါ။
လက်ရှိ ကမ္ဘာတလွှား ဒစ္စနေပလပ်စ်ကို အခပေးကြည့်ရှုသူ စုစုပေါင်း ၁၉၆ ဒသမ ၄ သန်း ရှိပါတယ်။
ယခုနှစ် နှစ်လယ်အထိ ကြည့်ရှုသူ အများအပြား တက်လာမယ်လို့ ခန့်မှန်းထားပြီး ရှယ်ယာတွေ တက်နေချိန်မှာ၊ ပြိုင်ဘက် Netflix ကတော့ ပြီးခဲ့တဲ့လမှာ ကြည့်ရှုသူဦးရေ ကျဆင်းပြီး ရှယ်ယာတွေ လှုပ်ခတ်ခဲ့ပါတယ်။
အင်တာနက်ကတဆင့် ရုပ်ရှင်နဲ့ တီဗီစီးရီးတွေ ထုတ်လွှင့်ဝန်ဆောင်မှုပေးနေတဲ့ နက်ဖလစ် (Netflix) ကုမ္ပဏီက ဇန်နဝါရီကနေ မတ်လအတွင်း ကြည့်ရှုသူ ထက်ဝက်နီးပါး လျော့သွားမယ်လို့ ခန့်မှန်းပြီးနောက် အစုရှယ်ယာ ၂၀ ရာခိုင်နှုန်း ထိုးကျသွားခဲ့ပါတယ်။
ကမ္ဘာ့အကြီးဆုံး နက်ဖလစ် အွန်လိုင်းရုပ်ရှင်ဝန်ဆောင်မှုလုပ်ငန်းဟာ ယခုနှစ် ပထမ သုံးလပတ် အတွင်း အခပေးကြည့်ရှုသူ ၅ ဒသမ ၉ သန်း တိုးလာမယ်လို့ မူလက ခန့်မှန်းထားခဲ့ရာက၊ တဝက်နီးပါး လျော့ကျသွားပြီး ကြည့်ရှုသူ ၂ ဒသမ ၅ သန်း သာ တိုးလာမယ်လို့ ဆိုပါတယ်။
ကိုဗစ်ကပ်ဘေးနဲ့ ကမ္ဘာ့စီးပွားရေးအကျပ်အတည်းကြောင့် နက်ဖလစ်ရဲ့ ရှယ်ယာ ၂၀ ရာခိုင်နှုန်းနီးပါး ကျဆင်းပြီး အမြတ်ငွေ ဒေါ်လာ ၇ ဒသမ ၇၁ ဘီလီယံ ထိခိုက်ဖို့ ရှိပါတယ်။
ပြိုင်ဘက်ကုမ္ပဏီတွေဖြစ်တဲ့ Walt Disney ကုမ္ပဏီက ရှယ်ယာ ၄ ရာခိုင်နှုန်း ကျဆင်းပြီး၊ Roku ကုမ္ပဏီက ၅ ရာခိုင်နှုန်း ကျဆင်းပါတယ်။
ဒါပေမဲ့ Walt Disney ၊ HBO နဲ့ Roku တို့ဟာ အနာဂတ် အွန်လိုင်းရုပ်သံ ဝန်ဆောင်မှု လုပ်ငန်းတွေအတွက် ဘီလီယံပေါင်းများစွာ ပုံအောပြီး ရင်းနှီးမြှုပ်နှံနေကြပါတယ်။
လက်ရှိ ကမ္ဘာတဝန်း နက်ဖလစ်အစီအစဉ်တွေကနေ ကြည့်ရှုသူ စုစုပေါင်း ၂၂၁ ဒသမ ၈ သန်း ရှိပြီး ဈေးကွက် တန်ကြေးပမာဏ ဒေါ်လာ ၁၇၆ ဘီလီယံ ရှိပါတယ်။
