အင်တာနက်ကတဆင့် ရုပ်ရှင်နဲ့ တီဗီစီးရီးတွေ ထုတ်လွှင့်ဝန်ဆောင်မှုပေးနေတဲ့  နက်ဖလစ် (Netflix) ကုမ္ပဏီက ဇန်နဝါရီကနေ မတ်လအတွင်း ကြည့်ရှုသူ ထက်ဝက်နီးပါး လျော့သွားမယ်လို့ ခန့်မှန်းပြီးနောက် အစုရှယ်ယာ ၂၀ ရာခိုင်နှုန်း ထိုးကျသွားခဲ့ပါတယ်။

ကမ္ဘာ့အကြီးဆုံး နက်ဖလစ် အွန်လိုင်းရုပ်ရှင်ဝန်ဆောင်မှုလုပ်ငန်းဟာ ယခုနှစ် ပထမ သုံးလပတ် အတွင်း အခပေးကြည့်ရှုသူ ၅ ဒသမ ၉ သန်း တိုးလာမယ်လို့ မူလက ခန့်မှန်းထားခဲ့ရာက၊ တဝက်နီးပါး လျော့ကျသွားပြီး ကြည့်ရှုသူ ၂ ဒသမ ၅ သန်း သာ တိုးလာမယ်လို့ ဆိုပါတယ်။

ကိုဗစ်ကပ်ဘေးနဲ့ ကမ္ဘာ့စီးပွားရေးအကျပ်အတည်းကြောင့် နက်ဖလစ်ရဲ့  ရှယ်ယာ ၂၀ ရာခိုင်နှုန်းနီးပါး ကျဆင်းပြီး အမြတ်ငွေ ဒေါ်လာ ၇ ဒသမ ၇၁ ဘီလီယံ ထိခိုက်ဖို့ ရှိပါတယ်။

ပြိုင်ဘက်ကုမ္ပဏီတွေဖြစ်တဲ့ Walt Disney ကုမ္ပဏီက ရှယ်ယာ ၄ ရာခိုင်နှုန်း ကျဆင်းပြီး၊ Roku ကုမ္ပဏီက ၅ ရာခိုင်နှုန်း ကျဆင်းပါတယ်။ 

ဒါပေမဲ့ Walt Disney ၊ HBO နဲ့ Roku  တို့ဟာ အနာဂတ် အွန်လိုင်းရုပ်သံ ဝန်ဆောင်မှု လုပ်ငန်းတွေအတွက် ဘီလီယံပေါင်းများစွာ ပုံအောပြီး ရင်းနှီးမြှုပ်နှံနေကြပါတယ်။

လက်ရှိ ကမ္ဘာတဝန်း နက်ဖလစ်အစီအစဉ်တွေကနေ ကြည့်ရှုသူ စုစုပေါင်း ၂၂၁ ဒသမ ၈ သန်း ရှိပြီး ဈေးကွက် တန်ကြေးပမာဏ ဒေါ်လာ ၁၇၆ ဘီလီယံ ရှိပါတယ်။