ဖမ်းဆီးထိန်းသိမ်းခံထားရတဲ့ နိုင်ငံတော်ရဲ့ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ တွေ့ခွင့်ပေး ဖို့ နိုင်ငံတကာက ကိုယ်စားလှယ်တွေက တောင်းဆိုတာကို အကြောင်းအမျိုးမျိုး ငြင်းဆန်ခဲ့ပေမယ့် NLD ပါတီ၀င်အချို့နဲ့ ပြီးခဲ့တဲ့ နို၀င်ဘာလထဲမှာ ပေးတွေ့ခွင့်ပြုခဲ့တယ်လို့ နေပြည်တော်အချုပ်ထောင်အသိုက်အဝန်းနဲ့ နီးစပ်သူတွေတွေက ပြောပါတယ်။
“အချုပ်ထောင်ထဲက သီးသန့်အဆောင်ထိ လာတွေ့တာဆိုတော့ အန်တီကလည်း ဘယ်လိုပုဂ္ဂိုလ်လည်း မသိဘူးဆိုပြီး ထွက်တွေ့လိုက်တယ် ပြောတယ်။ ပြီးမှ ပါတီ၀င်အချို့ဖြစ်နေတော့ အန်တီ တော်တော်စိတ်ဆိုးသွားတယ်လို့ သိရတယ်။ သိတဲ့အတိုင်းလေ ဒီလိုနေရာထိ သီးသန့်လာတွေ့နိုင်ဖို့က ဘယ်သူ့ခွင့်ပြုချက်နဲ့လည်းဆိုတာ” လို့ အချုပ်ထောင်နဲ့နီးစပ်သူတဦးက ပြောပါတယ်။
သီးခြားအတည်ပြုနိုင်ခြင်း မရှိပေမယ့် လာတွေ့သူတွေဟာ NLD ပါတီအမတ်ဟောင်း ဒေါ်စန္ဒာမင်းနဲ့ ပါတီ၀င် ဦးတိုးလွင် ဆိုသူတို့ဖြစ်ပြီး ပါတီရုံးခန်းဖွင့်ခွင့်ပြုဖို့နဲ့ ရွေးကောက်ပွဲကိစ္စတို့အတွက် လာရောက်တွေ့ဆုံတာလို့ သတင်းတွေ ထွက်ပေါ်နေပါတယ်။
အာဏာသိမ်းစစ်ကောင်စီအနေနဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရုံးချိန်းရှိတဲ့ ရက်တွေမှာ သူ့ရဲ့ ရှေ့နေတွေနဲ့ သီးခြားတွေ့ခွင့်ပေးတာကလွဲပြီး ပြည်တွင်း၊ ပြည်ပမှ မည်သည့် လူပုဂ္ဂိုလ်၊ အဖွဲ့အစည်းတို့နဲ့မှ သီးသန့်တွေ့ဆုံဖို့ ခွင့်ပြုတာမရှိသေးပါဘူး။
မကွေးတိုင်း၊ ပွင့်ဖြူမြို့နယ် သရက်ကုန်းကျေးရွာက ရပ်ကျေး NLD ပါတီဝင် ဦးဝင်းဌေးကို ဒီဇင်ဘာ ၄ ရက်နေ့ ည ၈ နာရီလောက်မှာ အမည်မသိလူတစုက ဖမ်းဆီးပြီး လည်လှီးသတ်ဖြတ်ခဲ့တယ်လို့ NLD ပါတီဝင် တယောက်က ဒီဗွီဘီကိုပြောပါ။
သူက ပွင့်ဖြူမြို့နယ် NLD ပါတီဝင် ရပ်ကျေး အဖွဲ့ဝင်တယောက်ဖြစ်သလို NLD အစိုးရလက်ထက်က သရက်ကုန်းကျေးရွာ အုပ်ချုပ်ရေးမှူးအဖြစ် တာဝန်ထမ်းဆောင်ခဲ့ပြီး အပျော်တန်းဓာတ်ပုံဆရာနဲ့ ယာဥ်မောင်း အလုပ်လုပ်ကိုင်သူတယောက်ဖြစ်တယ်လို့ ဆိုပါတယ်။
ဦးဝင်းဌေးဟာ မကွေးမြို့ကနေ ကားနဲ့ ပြန်လာတဲ့ဘအချိန်မှာ လက်နက်ကိုင်ဆောင်ထားတဲ့ လူတစုက သစ်ချိုကုန်းရွာအဝင်မှာ သေနတ်နဲ့ချိန် ဖမ်းဆီးသွားတာဖြစ်ပြီး စစ်ကောင်စီက ဖမ်းဆီးတယ်ထင်လို့ ရဲစခန်းကို လိုက်လံစုံစမ်းပေမဲ့ စခန်းမှာမရှိဘူးလို့ ပြောတာကြောင့် လိုက်လံရှာဖွေခဲ့တာလို့ ပြောပါတယ်။
မိသားစုဝင်တွေနဲ့ မိတ်ဆွေအပေါင်းသင်းတွေက ဝိုင်းဝန်းရှာဖွေရာ ဒီဇင်ဘာ ၅ ရက်နေ့ မနက် ၉ နာရီလောက်က ကျောင်းကုန်းကြီးကျေးရွာ မြောက်ဘက်က တောထဲမှာ လည်လှီးဒဏ်ရာနဲ့ သေဆုံးနေတဲ့ ဦးဝင်းဌေးရဲ့ အလောင်းကို တွေ့ရှိခဲ့ရပြီး ကျောင်းကုန်းကြီးရွာက ပျူစောထီးတွေလက်ချက် ဖြစ်နိုင်တယ်လို့ ဒေသခံတွေက ပြောပါတယ်။
“စစ်အာဏာသိမ်းပြီးကတည်းက ပြည်သူတွေရဲ့ အသက်အိုးအိမ်စည်းစိမ် လုံခြုံမှုမရှိဘူး၊ တယောက်နဲ့ တယောက် တဖက်နဲ့တဖက် လူသားမဆန်စွာ သတ်ဖြတ်နေတာတွေကို ရှုတ်ချပါတယ်” လို့ ဒေသခံတဦးက ပြောပါတယ်။
ပွင့်ဖြူမြို့နယ် ကျောင်းကုန်းကြီးရွာမှာ ၂၀၂၁ ခုနှစ် မတ် ၆ ရက်နေ့ကလည်း NLD ပါတီအလုပ်အမှုဆောင် ဦးထွေးနိုင်နဲ့ ပါတီဝင်ကို နန်းဝေတို့ ၂ ယောက်ကို စစ်တပ်ထောက်ခံသူ အယောက် ၃၀ လောက်က ဝိုင်းဝန်းသတ်ဖြတ်ခဲ့ပြီး ဒီနေ့အထိ အရေးယူမှုမရှိဘူးလို့ ဒေသခံတွေက ပြောပါတယ်။
