စစ်ကိုင်းတိုင်း၊ ဗန်းမောက်မြို့နယ်မှာ ပြည်သူ့ကာကွယ်ရေးအဖွဲ့က ဖမ်းဆီးထိန်းသိမ်းထားတဲ့ Non-CDM ပညာရေးဝန်ထမ်း အမျိုးသမီး ၂ ယောက်ကို ဒေသတွင်းကာကွယ်ရေး PDF အဖွဲ့က ဧပြီ ၂၆ ရက်မှာ ပြန်လွှတ်ပေးခဲ့တယ်လို့ နီးစပ်တဲ့ အသိုက်အဝန်းကနေ သိရပါတယ်။
ဒေသခံ အမျိုးသားတဦးက "Non-CDM ပညာရေးဝန်ထမ်း ၂ ယောက်ကို ဧပြီ ၄ ရက်က ဖမ်းဆီးခဲ့ပြီး ၁ လနီးပါး ထိန်းသိမ်းထားတာ ၂၆ ရက် နေ့လယ်က ပြန်လွှတ်ပေးခဲ့တာ"လို့ ပြောပါတယ်။
အမည်နဲ့ နေရပ်ကိုတော့ လုံခြုံရေးအရ မဖော်ပြဖို့ ကာယကံရှင်တွေက တောင်းဆိုထားပါတယ်။
ဗန်းမောက်မြို့နယ်အတွင်း တိုက်ပွဲ မကြာခဏဖြစ်ပွားရာမှာ စစ်တပ်က လေကြောင်းကနေ ပစ်ခတ်လေ့ ရှိတယ်လို့ ဒေသခံတွေက ပြောပါတယ်။
ချင်းပြည်နယ်၊ မင်းတပ်မြို့နယ်ထဲက CDM မလုပ်ထားတဲ့ ဝန်ထမ်းတွေအနေနဲ့ နီးစပ်ရာ အုပ်ချုပ်ရေးတာဝန်ရှိသူတွေဆီမှာ ၂ ပတ်အတွင်း အမြန်ဆုံး စာရင်းပေးကြဖို့နဲ့ မပေးဘူးဆိုရင် ပြင်းပြင်းထန်ထန် အရေးယူတော့မယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ကြေညာပါတယ်။
ဝန်ထမ်းတွေဟာ အကြမ်းမဖက်အာဏာဖီဆန်ရေးလှုပ်ရှားမှု (CDM) မှာ ပါဝင်ကြောင်းကို နေထိုင်ရာ နီးစပ်ရာတိုက်နယ်မှူး၊ အုပ်စုအုပ်ချုပ်ရေးမှူး၊ ကျေးရွာအုပ်ချုပ်ရေးမှူးတို့ဆီမှာ ကိုယ်ရေးအချက်အလက်အပြည့်အစုံနဲ့ အတူ သီတင်းနှစ်ပတ်အတွင်း အမြန်စာရင်းပေးသွင်းရမှာ ဖြစ်ပါတယ်။
ပြီးတော့ မတရားအာဏာသိမ်းမှုနောက်ပိုင်း ပြန်ပေးဆပ်ဖို့မလိုတဲ့ နိုင်ငံ့ဝန်ထမ်း အတိုးမဲ့ချေးငွေတွေကို ဖိအားပေးခြိမ်းခြောက်တောင်းခံတာ၊ အာဏာအလွဲသုံးစားလုပ်တာ၊ CDM လုပ်လို့ စစ်ကောင်စီလက်အောက်ခံဌာနတွေက ထုတ်ပယ်ထားသူတွေနဲ့ CDM ပြုလုပ်ဆဲ ဝန်ထမ်းတွေရဲ့ ကိုယ်ရေးအချက်အလက်တွေကို စုစည်းပြီး စစ်ကောင်စီဆီကို သတင်း ပေးပို့ကျူးလွန်နေတဲ့ ဌာနဆိုင်ရာ အကြီးအကဲတွေ၊ အရာထမ်း၊ အမှုထမ်းတွေအနေနဲ့ ကိုယ်ပြုလုပ်ပျက်ကွက်တာတွေအတွက် အပြည့်အဝတာဝန်ယူ၊ တာဝန်ခံရမယ်လို့လည်း ထုတ်ပြန် သတိပေးထားပါတယ်။
ဒါ့အပြင် ပြင်းပြင်းထန်ထန်အရေးယူဆောင်ရွက်သွားမယ်လို့ သတိပေးကြေညာပါတယ်။ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ဟာ စစ်အာဏာသိမ်းတာကို ဆန့်ကျင်ပြီးနောက်ပိုင်း အစောဆုံးဖွဲ့စည်းခဲ့တဲ့ ပြည်သူ့အုပ်ချုပ်ရေးအဖွဲ့တခု ဖြစ်ပါတယ်။
