အမျိုးသားညီညွတ်ရေးအစိုးရ (NUG) အပါအဝင် မြန်မာ့နွေဦးတော်လှန်ရေးကို ဦးဆောင်နေကြတဲ့ အဖွဲ့အစည်းတွေအနေနဲ့ နိုင်ငံ့ဝန်ထမ်း CDM Policy ကို တော်လှန်ရေးကို ရှေးရှုပြီးတော့ အမြန်ဆုံး ဆုံးဖြတ် အတည်ပြုပေးကြဖို့ ပညာရေးအင်အားစု ၁၅ ဖွဲ့က အလေးအနက် တိုက်တွန်းလိုက်ပါတယ်။

CDM နိုင်ငံ့ဝန်ထမ်းတွေအပေါ် အကြမ်းဖက်စစ်အုပ်စုအလိုကျ ဖိနှိပ်နေတဲ့ Non CDM ဝန်ထမ်းတွေအပေါ် သဘောထားနဲ့ ပတ်သက်ပြီးတော့ ပညာရေးအင်အားစုတွေဖြစ်တဲ့ ဖက်ဒရယ်ဒီမိုကရေစီပညာရေး ပူးပေါင်းဆောင်ရွက်မှုကွန်ရက် (FDECN)၊ အခြေခံ/အဆင့်မြင့် ပညာရေးအထွေထွေသပိတ်ကော်မတီ (GSC BHE)၊ တက္ကသိုလ်ဆရာသမဂ္ဂများ ကိုယ်စားပြုကော်မတီ (RC of UTAs)၊ အခြေခံပညာ ပညာရေးလုပ်သားသမဂ္ဂများ တိုက်ပွဲဦးဆောင်ကော်မတီ (BEWU-Sc)၊ အခြေခံပညာ ပညာရေးဝန်ထမ်းများ အထွေထွေသပိတ်ကော်မတီ (BEGSC)၊ မြန်မာနိုင်ငံဆရာ/ဆရာမများအဖွဲ့ချုပ် (MTF)၊ နည်းပညာဆိုင်ရာ ဆရာများအဖွဲ့ချုပ် (TTF)စတဲ့ ၁၅ ဖွဲ့က ဇန်နဝါရီ ၁၁ ရက်မှာ ပူးပေါင်းထုတ်ပြန်ခဲ့တာပါ။ 

CDM ဝန်ထမ်းတွေကို အလုပ်အကိုင် အခွင့်အလမ်းတွေ အပါအဝင် စိတ်ပိုင်း၊ ရုပ်ပိုင်းဆိုင်ရာ ထိရောက်တဲ့ ကူညီထောက်ပံ့မှုတွေ ပေးဖို့ ပြည်သူလူထုကိုလည်း တိုက်တွန်းထားပါတယ်။

ပြီးခဲ့တဲ့ ၂၀၂၁ ခုနှစ် စစ်အာဏာသိမ်းပြီးချိန်ကစတင်ကာ နိုင်ငံ့ဝန်ထမ်းတွေဟာ အကြမ်းမဖက် အာဏာဖီဆန်ရေးလှုပ်ရှားမှု (Civil Disobedience Movement - CDM) ကို ဦးဆောင်ပြုလုပ်ခဲ့ပြီး CDM လှုပ်ရှားမှုဟာ တော်လှန်ရေးတပ်ဦးအဖြစ် အရှိန်အဟုန်ကောင်းစွာနဲ့ ပေါ်ထွက်ခဲ့ပြီး ဒီလှုပ်ရှားမှုဟာ အခုအချိန်အထိ အားကောင်းခိုင်မာနေဆဲဖြစ်တာဟာ ငြင်းပယ်မရတဲ့ အမှန်တရားတခု ဖြစ်တယ်လို့ ဆိုပါတယ်။

CDM လှုပ်ရှားမှုရဲ့ ထိရောက်မှုကြောင့် အကြမ်းဖက်စစ်အုပ်စုဟာ CDM နိုင်ငံ့ဝန်ထမ်းတွေကို အငြိုးတကြီး ဖမ်းဆီးအရေးယူတာတွေ၊ လူမဆန်စွာ သတ်ဖြတ်တာတွေကို ဆောင်ရွက်ပြီးတော့ CDM လှုပ်ရှားမှု ပြိုလဲစေဖို့ နည်းလမ်းပေါင်းစုံနဲ့ ဆောင်ရွက်နေဆဲ ဖြစ်တဲ့အပြင် ဒီဖိနှိပ်မှုတွေမှာ စစ်အုပ်စုအလိုကျ အလိုတူအလိုပါ ပါဝင်ဆောင်ရွက်နေတဲ့ Non CDM နိုင်ငံ့ဝန်ထမ်းတွေရဲ့ လုပ်ဆောင်ချက်တွေဟာလည်း ပိုမိုဆိုးဝါးလာခဲ့တယ်လို့ ထုတ်ပြန်ချက်မှာ ဖော်ပြပါတယ်။

CDM နိုင်ငံ့ဝန်ထမ်းတွေအပေါ် Non CDM နိုင်ငံ့ဝန်ထမ်းတွေရဲ့ အကြမ်းဖက်စစ်အုပ်စုအလိုကျ ဖိနှိပ်မှုတွေဟာ လူ့အခွင့်အရေးချိုးဖောက်မှုတွေ ဖြစ်နေရုံမကဘဲ အကြမ်းဖက်စစ်အုပ်စု နည်းတူ ရာဇဝတ်မှုတွေအထိ ကျူးလွန်နေတာတွေ သက်သေသာဓကများစွာရှိနေပြီ ဖြစ်တာကြောင့် CDM ဝန်ထမ်းတွေရဲ့ စိတ်ပိုင်းနဲ့ ရုပ်ပိုင်းဆိုင်ရာတွေအတွက် ထိရောက်တဲ့ ကူညီထောက်ပံ့မှုတွေ ပေးအပ်ကြဖို့လည်း ပြည်သူလူထုကို အထူးတိုက်တွန်းထားပါတယ်။

ဒါကြောင့်မို့ CDM နိုင်ငံ့ဝန်ထမ်းတွေအပေါ် အကြမ်းဖက်စစ်အုပ်စုအလိုကျ Non CDM ဝန်ထမ်းတွေရဲ့ အလိုတူအလိုပါ ဖိနှိပ်မှုတွေကို ပညာရေးအင်အားစုတွေအနေနဲ့ တခြားသော တော်လှန်ရေးအစုအဖွဲ့တွေ အားလုံးနဲ့ ပူးပေါင်းပြီး ပြင်းပြင်းထန်ထန် ဆန့်ကျင်သွားမှာ ဖြစ်ပြီးတော့ အလားတူဖိနှိပ်မှုတွေ ထပ်မံကျူးလွန်လာပါက ပိုမိုထိရောက်တဲ့ အရေးယူမှုတွေ ဆောင်ရွက်သွားမယ်လို့လည်း သတိပေး ထုတ်ပြန်ထားပါတယ်။

ပြီးခဲ့တဲ့ရက်ပိုင်းတုန်းကလည်း ပြည်သူ့ကျန်းမာရေးအင်အားစု ၈ ဖွဲ့က မြန်မာ့နွေဦးတော်လှန်ရေးကို ဦးဆောင်နေကြတဲ့ အဖွဲ့အစည်းတွေအနေနဲ့ နိုင်ငံ့ဝန်ထမ်း စီဒီအမ်မူဝါဒ (CDM Policy) ကို နှောင့်နှေးခြင်းမရှိဘဲ အမြန်ဆုံး ဆုံးဖြတ်အတည်ပြုပေးကြဖို့ တိုက်တွန်းထားပါတယ်။

မြန်မာ့နွေဦးတော်လှန်ရေး ၂ နှစ်နီးပါး ကြာမြင့်လာတဲ့တိုင်အောင် အကြမ်းဖက်စစ်အုပ်စုဟာ သူတို့ကို ဆန့်ကျင်တော်လှန်တဲ့ ပြည်သူတွေနဲ့အတူ နိုင်ငံ့ဝန်ထမ်း CDM သူရဲကောင်းတွေကိုပါ ဖိနှိပ်ဖမ်းဆီး သတ်ဖြတ်မှုတွေ ကျူးလွန်နေသလို စစ်ကောင်စီသတင်းပေး ဒလန်တွေ၊ ပျူစောထီးတွေနဲ့ စစ်အုပ်စုအလိုတော်ရိ Non-CDM တွေရဲ့ သတင်းပေး တိုင်ကြား ဖိနှိပ်တိုက်ခိုက်မှုတွေကိုပါ ခံစားနေကြတာ ဖြစ်ပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာလည်း တိုင်းရင်းသားလက်နက်ကိုင်တပ်တွေ၊ ဒေသခံပြည်သူ့ကာကွယ်ရေး တပ်တွေနဲ့ အကြမ်းဖက်စစ်ကောင်စီတပ်တွေကြား မြေပြင်တိုက်ပွဲတွေလည်း ပြင်းထန်နေတာ ဖြစ်ပါတယ်။

ကယား(ကရင်နီ)ပြည်နယ်၊ လွိုင်ကော်မြို့နယ်၊ လွိုင်လင်လေးမြို့၊ အောင်မင်္ဂလာရပ်ကွက်ရှိ အခြေခံပညာအထက်တန်းကျောင်းက NonCDM ဆရာ/ ဆရာမ  ၆ ယောက်ဟာ  ဇွန် ၂၄ ရက်က  လက်နက်ကိုင်အဖွဲ့တဖွဲ့ရဲ့ ဖမ်းဆီးခေါ်ဆောင်သွားတာခံခဲ့ရတယ်လို့  ကနဦးသတင်းရရှိပါတယ်။

ဖမ်းဆီးခေါ်ဆောင်ခံရသူတွေဟာ အထက်တန်းပြ ဆရာမဒေါ်နန်း၊ အလယ်တန်းပြဆရာမ ဒေါ် ခင်သန်း၊ ဒေါ်စုလေးငယ်၊ ဒေါ်မြထွေး ၊ မူလတန်းပြဆရာ ဦးအောင်ဇော်ထွေး၊ ဦးကောင်းဇေယျာငြိမ်းနဲ့ ဦးအောင်ဇော်ထွေးတို့ဖြစ်ပါတယ်။

လတ်တလောမှာတော့ ဖမ်းဆီးခံဆရာ ဆရာမတွေကို ဘယ်အဖွဲ့ကဖမ်းဆီးတယ်၊ ဘာကြောင့် ဖမ်းဆီးတယ်ဆိုတာနဲ့ ဘယ်မှာ ဖမ်းဆီးထားတယ်ဆိုတာ အသေးစိတ်မသိရသေးပါဘူး။ 

စစ်အာဏာသိမ်းပြီးနောက်ပိုင်း ကယား(ကရင်နီ) ပြည်နယ်အတွင်းမှာ စစ်ကောင်စီတပ်နဲ့ ပြည်သူ့ခုခံကာကွယ်ရေးတပ်တွေကြား ပစ်ခတ်တိုက်ခိုက်မှုတွေဖြစ်ပွားနေတာ တစ်နှစ်ကျော်ကြာမြင့်ခဲ့ပြီ ဖြစ်ပါတယ်။

အဲ့ဒီဒေသအတွင်းမှာ စစ်ကောင်စီတပ်၊ ပြည်သူ့စစ်တပ်ဖွဲ့၊ KA၊ KNDF၊ PDFနဲ့ တခြားသော ပြည်သူ့ကာကွယ်ရေးတပ်တွေဟာ အပြိုင်အဆိုင်စစ်ရေးလှုပ်ရှားမှုတွေ ပြုလုပ်နေပါတယ်။

ကယား (ကရင်နီ)ပြည်နယ်အတွင်းက မြို့ပေါ်မှာသာ စစ်ကောင်စီတပ်လက်အောက်ခံ အခြေခံပညာရေးကျောင်း တချို့ ဖွင့်လှစ်နိုင်ပြီး အမျိုးသားညီညွတ်ရေးအစိုးရ (NUG)က ဖွင့်လှစ်တဲ့စာသင်ကျောင်းတွေမှာတော့ တက်ရောက်တဲ့ ကျောင်းသူ/ သားဟာ စစ်ကောင်စီဖွင့်တဲ့ကျောင်းတွေထက် ပိုမိုများပြားနေပါတယ်။ 

လက်ရှိ NonCDM ဆရာ/ ဆရာမ ၆ ဦး ဖမ်းဆီးခံရတဲ့ လွိုင်လင်လေးမြို့မှာ ရဲတပ်ဖွဲ့စခန်း၊ တိုက်နယ်ဆေးရုံ၊ မီးသတ်ဌာန အပါအဝင် စစ်ကောင်စီလက်အောက်ခံ ဌာနဆိုင်ရာရုံးအားလုံး ပိတ်သိမ်း ထားရပါတယ်။