သန်းကြွယ်သူဌေးကြီး အီလွန်မတ်စ်ခ်ဟာ ဒေါ်လာ ၄၄ ဘီလီယံတန် တွစ်တာ ကုမ္ပဏီကို အပြီးသတ်ဝယ်ယူလိုက်ပြီး အောက်တိုဘာ ၂၇ ရက်မှာ တွစ်တာ လူမှုကွန်ရက်ရဲ့ ပိုင်ရှင်အသစ် ဖြစ်လာပါတယ်။

သူ့ရဲ့ ပထမဆုံး လုပ်ဆောင်ချက်ကတော့ ထိပ်တန်းအမှုဆောင်တွေဖြစ်တဲ့ တွစ်တာ အမှုဆောင်အရာရှိချုပ် ပါရဂျ်အဂရာဝဲလ်၊ ဘဏ္ဍာရေးအရာရှိချုပ် နက်ဒ်ဆီးဂဲလ်နဲ့ ဥပဒေရေးရာနဲ့ မူဝါဒရေးရာ အကြီးအကဲ ဗီဂျာရာဂတ်ဒီတို့ကို ရာထူးကနေ ရပ်စဲလိုက်တာဖြစ်ကြောင်း အဲဒီကိစ္စနဲ့ နီးစပ်သူတွေဆီက သိရပါတယ်။

သူတို့တွေဟာ သူ့ကို လှည့်စားခဲ့ပြီး ဆိုရှယ်မီဒီယာပလက်ဖောင်းပေါ်ရှိ အကောင့်တု အရေအတွက်နဲ့ ပတ်သက်ပြီးတော့ တွစ်တာရင်းနှီးမြှုပ်နှံသူတွေကို အထင်အမြင် လွဲမှားအောင် စွပ်စွဲခဲ့တာလို့ ဆိုပါတယ်။

သြဇာကြီးတဲ့ ဆိုရှယ်မီဒီယာပလက်ဖောင်းအတွက် သူ ပုံစံချထားတဲ့ မြင့်မားတဲ့ ရည်မှန်းချက်တွေကို သူ ဘယ်လိုပေါက်မြောက်နိုင်ကြောင်း နည်းနည်းလောက်ပဲ ရှင်းလင်းပြခဲ့တယ်လို့လည်း ဆိုပါတယ်။

အရောင်းအဝယ် သဘောတူညီချက် ပြီးဆုံးသွားချိန်အထိ အဂရာဝဲလ်နဲ့ဆီးဂဲလ်တို့ဟာ ဆန်ဖရန်စစ္စကို ဌာနချုပ်မှာ ရှိနေကြပြီး သူတို့ကို အစောင့်အကြပ်တွေနဲ့ အပြင်ထုတ်ခဲ့ပါတယ်။

တွစ်တာ၊ အီလွန်မတ်စ်ခ်နဲ့ အမှုဆောင်တွေဟာ မှတ်ချက်ပေးဖို့ တောင်းဆိုမှုတွေကို ချက်ချင်းတုံ့ပြန်ခြင်း မရှိပါဘူး။

တွစ်တာကုမ္ပဏီမှာ အနည်းဆုံး တရုတ်အေးဂျင့် (စပိုင်) တယောက် အလုပ်လုပ်နေကြောင်း တွစ်တာအမှုဆောင်ဟောင်း ပီတာမတ်ဂီဇတ်ကိုက စက်တင်ဘာ ၁၃ ရက်က အမေရိကန် အထက်လွှတ်တော် ကြားနာပွဲမှာ ပြောကြားလိုက်ပါတယ်။

ပီတာမတ်ဂီဇတ်ကိုဟာ ဇန်နဝါရီလက အလုပ်ဖြုတ်ခံရချိန်အထိ တွစ်တာရဲ့ လုံခြုံရေးအကြီးအကဲအဖြစ် တာဝန်ထမ်းဆောင်ခဲ့တဲ့ နာမည်ကျော် ဟက်ကာတယောက် ဖြစ်ပါတယ်။

တရုတ်အစိုးရဟာ တွစ်တာသုံးစွဲသူတွေရဲ့ အချက်အလက်တွေကို စုဆောင်းနိုင်တော့မှာကို တချို့ တွစ်တာဝန်ထမ်းတွေက စိုးရိမ်မိကြောင်း သူက ကြားနာပွဲအတွင်း ပြောကြားခဲ့ပါတယ်။

တရုတ်နဲ့ အမေရိကန် ပထဝီဝင်နိုင်ငံရေး တင်းမာမှုတွေ မြင့်တက်နေချိန်မှာ တရုတ်ကြော်ငြာရှင်တွေဆီက ကြော်ငြာဝင်ငွေ အခွင့်အလမ်းကို မြှင့်တင်လိုတဲ့ တချို့အဖွဲ့တွေနဲ့ တရုတ်နိုင်ငံထဲမှာ စီးပွားရေးလုပ်ဖို့ စိတ်ပူနေသူတွေကြားက ကုမ္ပဏီအတွင်းပိုင်း တိုက်ပွဲတွေကို အသေးစိတ်ဖော်ပြထားတဲ့ ရိုက်တာသတင်းတပုဒ်ကို ကိုးကားပြီး သူက အင်္ဂါနေ့မှာ ပြောသွားတာပါ။

“လိုရင်းတိုရှင်းပြောရရင် ကိုယ်တွေအိပ်ပျော်နေတုန်း အဲဒီဝင်ငွေစီးကြောင်းကို ဆုံးရှုံးသွားရင် ပြဿနာရှိလိမ့်မယ်” လို့ ဇတ်ကိုက  ပြောကြားခဲ့ပါတယ်။

သုံးစွဲသူတွေရဲ့ ဒေတာတွေကို မလျော်ကန်စွာ ကိုင်တွယ်စီမံနေတယ်ဆိုတဲ့အပေါ် ဖက်ဒရယ်ကုန်သွယ်ရေးကော်မရှင်နဲ့ ၂၀၁၁ ခုနှစ် သဘောတူညီချက်အရ တွစ်တာဟာ သူ့ရဲ့ လုပ်ငန်းစဉ် လိုက်နာမှုအပေါ် စည်းကမ်းထိန်းသိမ်းသူတွေကို လမ်းမှားပြနေတယ်ဆိုတဲ့ ဇတ်ကိုရဲ့ စွပ်စွဲပြောကြားချက်တွေကို အထက်လွှတ်တော် တရားစီရင်ရေး ကော်မတီက စစ်ဆေးမေးမြန်းနေပါတယ်။

တွစ်တာဟာ အခြေခံလုံခြုံရေး၊ ဂုဏ်သိက္ခာနဲ့ ကိုယ်ရေးကိုယ်တာစနစ်တွေအတွက် အဓိပ္ပာယ်ရှိတဲ့ တိုးတက်မှုအနည်းငယ်သာ ရှိခဲ့ကြောင်း ဇတ်ကိုက တိုင်ကြားထားတာ ဖြစ်ပါတယ်။