မန္တလေးတိုင်း ပြင်ဦးလွင်ခရိုင် မတ္တရာမြို့နယ်ရွှေဘောင်ကျေးရွာမှာ နိုဝင်ဘာ ၁၀ရက်နေ့က WY စိတ်ကြွမူးယစ်ဆေးပြား ၁၀၀၀ ကျော်ကို ပြည်သူ့ကာကွယ်ရေးတပ်ဖွဲ့တွေက ဖမ်းဆီးရမိခဲ့တယ်လို့ နဂါးနီပြောက်ကျား မတ္တရာမြို့နယ်က တာဝန်ရှိသူတဦးက ပြောပါတယ်။

မူးယစ်ဆေးဝါးရောင်းဝယ်နေသူရဲ့ နေအိမ်ကို ဝင်ရောက်ဖမ်းဆီးရှာဖွေချိန်မှာ WY စိတ်ကြွဆေးပြားတွေကို ဖမ်းဆီးရမိခဲ့တာလို့ ဆိုပါတယ်။

"သူတို့မူးယစ်ဆေးရောင်းတာကိုအစကတည်းက သိပြီးသားပါ၊ ခေါင်းဆောင်ကိုလည်း လွန်ခဲ့တဲ့တလက ရှင်းလင်းခဲ့ပြီးပါပြီ။ ဒါကို မငြိမ်သေးဘဲ သတင်းတွေဆက်ထွက်လာလို့ သူ့တပည့်တွေကို အရင်၀င်ဖမ်းပြီး မူးယစ်ဆေးတွေ ဖော်ခိုင်းခဲ့တာပါ" လို့ နဂါးနီပြောက်ကျား မတ္တရာမြို့နယ်က တာဝန်ရှိသူတဦးက ပြောပါတယ်။

မူးယစ်ဆေးရောင်းဝယ်ပြီး စစ်ကောင်စီတပ် သတင်းပေးဖြစ်သူ ဗိုလ်မြင့်ဆိုသူကို လွန်ခဲ့တဲ့လက ပစ်ခတ်ရှင်းလင်းခဲ့ပေမယ့် ဗိုလ်မြင့်တပည့်တွေက ထပ်မံရောင်းဝယ်နေတာကြောင့် သွားရောက်ရိုက်နှက်ဆုံးမခဲ့တာလို့ ပြောပါတယ်။

ဖမ်းဆီးရမိခဲ့တဲ့ WY စိတ်ကြွမူးယစ်ဆေးပြားတွေကို မီးရှို့ဖျက်ဆီးသွားမယ်လို့လည်း ပြောပါတယ်။

မတ္တရာမြို့နယ်အတွင်းမှာစစ်တပ်က အာဏာသိမ်းပြီးနောက်ပိုင်း မူးယစ်ဆေးရောင်းသူတွေ များလာတာကြောင့် သုံးစွဲသူများလာပြီး စစ်ကောင်စီတပ် တာဝန်ရှိသူတွေက အ ရေးယူ ဖမ်းဆီးဆောင်ရွက်တာမျိုးမရှိဘူးလို့ ပြောပါတယ်။ 

မူးယစ်ဆေးရောင်းဝယ်နေသူတွေကို နောက်ဆုံးအနေနဲ့သတိပေးခြင်းဖြစ်တယ်လို့လည်း နဂါးနီပြောက်ကျားတပ်ဖွဲ့ မတ္တရာက ထုတ်ပြန်ထားပါတယ်။

စစ်ကိုင်းတိုင်း၊ ကသာမြို့နယ်၊ အင်းရွာတိုက်နယ်မှာ မူးယစ်ဆေးသတင်းရရှိလို့ ကသာခရိုင်က ပြည်သူ့ကာကွယ်ရေး ပူးပေါင်းတပ်ဖွဲ့တွေ ဇွန် ၂၆ ရက် ည ၈ နာရီလောက်က သွားရောက်ရှာဖွေရာ ကိုသောင်‌အေးဆိုသူရဲ့ အခင်းတဲထဲမှာ WY စာတန်းပါ မူးယစ်ဆေးပြား ၁၀ သိန်းကျော်၊ ကာလတန်ဖိုး ကျပ်သိန်း ၃,၀၀၀ ကျော် ဖမ်းဆီးရမိခဲ့ပါတယ်။

အခင်းပိုင်ရှင်ဟာ နမ်းခမ်းဘက်ကလာတဲ့ မူးယစ်ကုန်သည်နှစ်ဦးဆီကနေ မူးယစ်ဆေးတွေ လက်ခံရယူထားတာဖြစ်ပြီး တဆင့် ပြန်လည်ရောင်းချဖြန့်ဝေတာလို့ ကသာ ပကခ တာဝန်ခံက ပြောပါတယ်။

“သတင်းရလို့ ပူးပေါင်းတပ်ဖွဲ့တွေ သွားရောက်ရှာဖွေကြတာ၊ WY စာတန်းပါတဲ့ ဆေးပြား ၁၀ သိန်းကျော် ဖမ်းမိတယ်။ ဖမ်းမိတဲ့သူနဲ့သိတဲ့ မူးယစ်ကုန်သည်နှစ်ဦးက သူ့တဲမှာ လာထားတယ်၊ စောင့်ရှောက်ခိုင်းထားတယ်။ စောင့်ရှောက်ခအနေနဲ့ ၁၀ သိန်းပေးတာတဲ့။ အဲကနေတဆင့် တလုံးကို လက်ကားစျေး ၂၅၀၊ ၃၀၀ နဲ့ ပြန်ပြီး ရောင်းချပေးနေတယ်။”

WY မူးယစ်ဆေးဝါး လက်ခံရောင်းချနေတဲ့ အမျိုးသားကို ရဲလုပ်ထုံးလုပ်နည်းနဲ့အညီ ပြည်သူ့လုံခြုံ‌ရေးအဖွဲ့က အမှုတွဲတည်ဆောက်ပြီး ကသာမြို့နယ် တရားရေးဌာနကို တင်ပြကာ တရားစီရင်သွားဖို့ရှိတယ်လို့ သိရပါတယ်။ ပြည်သူ့လုံခြုံရေးအဖွဲ့တွေမှာ CDM ပြုလုပ်တဲ့ ရဲတပ်သားတွေလည်း ပါဝင်နေတယ်လို့ သိရပါတယ်။

ကသာခရိုင်မှာ တရားရေးရာဌာနကို မြို့နယ်တိုင်းမှာ ဖွဲ့စည်းထားပြီး NUG ရဲ့ မူဝါဒအတိုင်း ဆောင်ရွက်နေပြီလို့ ကသာ ပကဖတာဝန်ခံက ပြောပါတယ်။

“တရားစီရင်ရေးက ခရိုင်နယ်လို့တော့ မဟုတ်ဘူး၊ တမြို့နယ်ကို တရားသူကြီးငါးဦးနဲ့ ဖွဲ့စည်းထားတာရှိတယ်။ တရားသူကြီးငါးဦးနဲ့ ဖွဲ့စည်းထားပြီးတော့ အမှုတွေကို သုံးပါးဒိုင်အနေနဲ့ စစ်ဆေးပြီးတော့ ပြစ်မှု၊ ပြစ်ဒဏ်ပေးဖို့ စီမံထားတာရှိတယ်။ NUG ရဲ့ လမ်းညွှန်ချက်နဲ့အညီ ဖွဲ့စည်းထားတယ်။ အဲ့လမ်းကြောင်းအတိုင်းပဲ ဆက်လက် ဆောင်ရွက်နေတယ်။”

ကသာမြို့နယ်မှာ မူးယစ်ဆေးဝါး အမြောက်အမြား ဖမ်းဆီးရမှုဟာ ဒုတိယအကြိမ် ဖြစ်ပါတယ်။ ပထမအကြိမ် ဖမ်းဆီးရမှုမှာ လွန်ခဲ့တဲ့ ဖေဖော်ဝါရီက မဘိန်းမြို့နယ်နဲ့ ကသာမြို့နယ်အစပ် အင်းကြီးမှာ ဘိန်းဖြူ ၁၇ အိတ်၊ WY စာတန်းပါ မူးယစ်ဆေးဝါး ၆ အိတ်၊ ကာလတန်ဖိုး သိန်းပေါင်းနှစ်သောင်းကျော်ဖိုး ဖမ်းဆီးရမိခဲ့ပါတယ်။

လက်ရှိအချိန် ကသာမြို့နယ်မှာ စစ်ကောင်စီတပ်ဖွဲ့တွေနဲ့ ပြည်သူ့ကာကယ်ရေးတပ်ဖွဲ့တွေ နေ့စဥ် ထိတွေ့ တိုက်ပွဲဖြစ်ပွားနေပြီး စစ်ရေးတင်းမာနေပါတယ်။