ရန်ကုန်မြို့မှာ ပြေးဆွဲနေတဲ့ YBS ဘတ်စ်ကားတွေရဲ့ ယာဥ်စီးခကို ဒီရက်ပိုင်းမှာ စျေးနူန်းပြောင်းလဲ တာတွေ လုပ်ထားတယ်လို့ ခရီးသည်တွေက ပြောပါတယ်။

အရင် ပုံသေ ၂၀၀ ကျပ်ပေးရတဲ့ ကားတွေဟာ ၃၀၀ ကျပ်ပြောင်းလဲကောက်ယူနေပြီး Yangon Payment System (YPS) ကတ်နဲ့စီးရင်တော့ ၂၀၀ ကျပ်ပဲ ကျသင့်တာလို့ ခရီးသည်တဦးက ပြောပါတယ်။

ဒဂုံမြို့သစ်မြောက်ပိုင်းမြို့နယ်မှ ခရီးသွားတဦးက "ဘာမှ ကြိုအသိပေးတာ မရှိဘဲ  ရုတ်တရက်ကြီး ယာဥ်စီးခစျေးတွေ တက်တာ။ ငွေထည့်တဲ့ ပုံးမှာလည်း အခုအသစ်ကျတဲ့ နှုန်းကို စာကပ် ပြီး အသိပေးထားတယ်။ အရင်တိုင်း ၂၀၀ ထည့်တော့ နောက် ၁၀၀ ထပ်ထည့်ခိုင်းတယ်" လို့ ပြောပါတယ်။

ရန်ကုန်မြို့က YBS ဘတ်စ်ကားတွေဟာ ဒီနှစ်ဆန်းလောက်ကလည်း ခရီးအကွာအဝေးအလိုက် ခရီးစဥ်တပိုင်းကို ၂၀၀ ကျပ်နဲ့ အပိုင်းလိုက်ပြောင်းလဲကောက်ခံမူတွေ လုပ်ခဲ့ပါတယ်။

အခုက ပုံသေ ၂၀၀ ကျပ်အဖြစ်နဲ့ ကျန်ခဲ့တဲ့ ကားလိုင်းတွေကပါ စျေးနူန်း တိုးမြှင့်လိုက်ပြီး ယာဥ်စီးခပြောင်းလဲမှာကို ကြိုတင်အသိမပေးတာနဲ့ ပတ်သက်လို့ ဝေဖန်နေကြပါတယ်။

ကုမ္ပဏီဝန်ထမ်းခရီးသည်တဦးက "အရင်အပိုင်းလိုက် ယာဥ်စီးခတွေ တိုးကောက်တော့လည်း တရားဝင် ခွင့်ပြုသလို၊ မခွင့်ပြုသလိုနဲ့ ပြီးသွားတယ်။ အခုလည်း ခရီးသည်တွေကို ဘာမှ အသိ မပေးဘူး။ မလိမ့်တပတ်နဲ့ ခရီးသည်တွေ ကို လေးစားမူမရှိတာ" လို့ ပြောပါတယ်။

အဲဒီယာဥ်လိုင်းတွေ ပြေးဆွဲမူကို တာဝန်ယူနေတဲ့ စစ်ကောင်စီလက်အောက်ခံ ရန်ကုန်တိုင်း ဒေသကြီး သယ်ယူပို့ဆောင်ရေးကြီးကြပ်မူကော်မတီ (YRTC) အနေနဲ့လည်း ယာဥ်စီးခ တိုးမြှင့် လိုက်တာနဲ့ပတ်သက်လို့ တစုံတရာအသိပေးခြင်းမရှိဘဲ နူတ်ဆိတ်နေပါတယ်။

ဘတ်(စ်)ကားစီးရာတွင် YPS(Yangon Payment Services)ကတ်နဲ့ ငွေပေးချေရန် YBS(Yangon Bus Service) YRTC လက်အောက်ခံယာဉ်လိုင်း ၁၂၇ လိုင်းအနက် လတ်တလော ယာဉ်လိုင်း ၅၆ လိုင်းမှာ  POS(Point of Sale) စက်တွေ တပ်ဆင်ပြီး ဖြစ်ပါတယ်။

လက်ရှိ ရန်ကုန်မြို့မှာ နေ့စဥ် YBS ကားစီးရေ ၃၀၀၀ ကျော် ပြေးဆွဲနေပြီး ခရီးသည် ၁ ဒသမ ၂ သန်း စီးနင်းနေတယ်လို့ စာရင်းတွေအရ သိရပါတယ်။

ရန်ကုန်မှာ ပြေးဆွဲနေတဲ့ YBS ဘတ်စ်ကား ယာဉ်လိုင်းတချို့ဟာ တရားဝင် ကြိုတင်အသိပေး ကြေညာထားတာမရှိဘဲ ယာဥ်စီးခတွေကို ကျပ် ၄၀၀ ပြောင်းလဲကောက်ယူနေတာရှိတယ်လို့  ခရီးသွားပြည်သူတွေထံက သိရပါတယ်။

ခရီးစဥ်အလိုက် ဟိုနား၊ ဒီနားကို ၂၀၀ ကျပ်နဲ့ ခရီးလမ်းကြောင်းဝေးရင် ၄၀၀ ကျပ်တောင်းတယ်လို့ ဒီနေ့ကိုယ်တိုင်ကြုံရတဲ့ ခရီးသွားတစ်ဦးက ပြောပါတယ်။

"ယာဥ်မောင်းက ဘယ်ကနေ၊ ဘယ်အထိဆို နှစ်ရာ၊ ကျော်ရင် လေးရာဆိုပြီးပြောကောက်တာ ဒီနေ့မှကြုံရတာ"လို့ ဒဂုံမြို့သစ်အရှေ့ပိုင်းမြို့နယ်နေ ခရီးသွားက ပြောပါတယ်။

သူစီးခဲ့တဲ့ YBS ယာဥ်လိုင်းနံပတ်၂၈ နဲ့ ၂၉ ဟာ အရင်ရက်တွေက ယာဥ်စီး  ၂၀၀ ကျပ်သာ ပေးရတဲ့လိုင်းတွေ ဖြစ်ပြီး အခုမှ ပြောင်းသွားတာလို့ ဆိုပါတယ်။

ဒါအပြင် တခြားခရီးသွားတွေလည်း ယာဥ်စီးခတိုးမြှင့်ကောက်ယူတာတွေနဲ့ ကြုံနေရကြောင်း သိရပါတယ်။

"ကားသမားက စျေးပြောင်းသွားပြီဆိုပြီးပြောတယ်။ ကျနော်သိရသလောက် ကြေညာအ သိပေးထားတာမရှိဘူး။ မကြားမိဘူး"လို့  ကုမ္ပဏီဝန်ထမ်းခရီးသွားတစ်ဦးက ပြောပါတယ်။

YBS ယာဉ်စီးခတွေကို ကျပ် ၄၀၀  ပြောင်းလဲသတ်မှတ်မယ်ဆိုပြီး ဖေဖော်ဝါရီလ ဆန်းပိုင်းကတည်းက သတင်းထွက်နေတာပါ။

စစ်ကောင်စီလက်အောက်ခံ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှု ကော်မတီ (YRTC)က ယာဉ်စီးခပြောင်းလဲဖို့ ယာဥ်လိုင်းတွေဘက်က တင်ပြထားတာမျိုးသာရှိပြီး ခွင့်မပြုထားသေးဘူးလို့  အသိပေးထားပါတယ်။

ဒါပေမဲ့ မြေပြင်မှာတော့  စစ်အာဏာသိမ်းပြီး နောက်ပိုင်းယာဥ်စီးခတွေကို ယာဥ်လိုင်းအများစုက ပြောင်ပြောင်းတင်းတင်း တိုးမြှင့်ကောက်ယူတာတွေပို မိုများပြားလာနေပါတယ်။