ဗီယက်နမ်နိုင်ငံမြောက်ပိုင်းက စက်မှုခရိုင်ဖြစ်တဲ့ ဘက်ဂ်ဇန်မှာ  ကိုဗစ်-၁၉ ကူးစက်ကပ်ဘေး ထိန်းချုပ်ဖို့ ပိတ်ပင်ချက်တွေကို  မေ ၃၁ ရက်က စပြီး ပြန်ဖွင့်ပေးလိုက်ပြီလို့ အစိုးရ မီဒီယာ VTV က ထုတ်လွှင့်ပါတယ်။

ဒီခရိုင်ဟာ Apple နဲ့ Samsung လို အီလက်ထရောနစ်ကုမ္ပဏီတွေကို သွင်းတဲ့ ပစ္စည်းတွေ ထုတ်လုပ်ရာ စက်ရုံတွေ ရှိတဲ့ဒေသလည်း ဖြစ်ပါတယ်။ ဟနွိုင်းမြို့ အရှေ့မြောက်ဘက် ၃၇ မိုင်အကွာက ဘက်ဂ်ဇန်ကတော့ အရင်လနှောင်းပိုင်းက စပြီး ကိုဗစ်-၁၉ ကူးစက်မှု အဓိက နေရာဖြစ်ခဲ့တာပါ။

ရောဂါ ကူးစက်ခံတွေထဲမှာ စက်ရုံလုပ်သားတွေ ပါခဲ့ပါတယ်။ စက်ရုံလုပ်သား အယောက် ၄,၀၀၀ လောက်ဟာ တနင်္လာနေ့က လုပ်ငန်းခွင်ပြန်မဝင်မီ ဗိုင်းရပ်စ်ကူး၊ မကူး ဆေးစစ်ခံရတဲ့အပြင် ကာကွယ်ဆေးပါထိုးပေးခံရပါတယ်။

ဒါပေမဲ့ နိုင်ငံတောင်ပိုင်းက စီးပွားရေးအချက်အချာမြို့ ဟိုချီမင်းမှာတော့ ကိုဗစ်-၁၉ ကပ်ရောဂါ ကူးစက်မှု ထိန်းချုပ်ဖို့ ၁၅ ရက် ကြာ လူချင်းခွာနေရမယ့် ကန့်သတ်ချက်အသစ်ကို စတင် ကျင့်သုံးနေရပါတယ်။

ရဲတွေက စစ်ဆေးရေးစခန်းအသစ်တွေဖွင့်လှစ်လုပ်ဆောင်နေသလို  ကျောင်းသားတွေကလည်း ကျောင်းသားအဆောင်တခုကို ခုတင် ၆,၀၀၀ ဆံ့ ဆေးရုံအဖြစ် ပြောင်းဖို့ ရှင်းလင်းနေတယ်လို့ VTV က ပြောပါတယ်။

မနှစ်က တနှစ်လုံးနီးပါး  ကိုဗစ်-၁၉ ကို အောင်အောင်မြင်မြင် ထိန်းချုပ်နိုင်ခဲ့တဲ့ ဗီယက်နမ်နိုင်ငံမှာ ဧပြီနှောင်းပိုင်းက စလို့ ကူးစက်မှု တိုးလာခဲ့တာပါ။ လူဦးရေ ၉၈ သန်းရှိတဲ့ ဗီယက်နမ်မှာ ကိုဗစ်-၁၉ ကူးစက်ခံ စုစုပေါင်း ၇၁၀၇ ယောက်ရဲ့ တဝက်ကျော်ဟာ ဧပြီလကုန်ပိုင်းက ကူးစက်ခံရတာလို့ ဆိုပါတယ်။

ကူးစက်ခံ သေဆုံးသူ စုစုပေါင်း ၄၇ ယောက်သာရှိလို့ ဗီယက်နမ်ဟာ ကမ္ဘာ့အနည်းဆုံး ကူးစက်ခံနိုင်ငံတွေထဲက တနိုင်ငံ ဖြစ်နေဆဲပါ။