ကယားပြည်နယ်၊ ဒီးမော့ဆိုနဲ့ မိုးဗြဲဘက်ကို  အကြမ်းဖက်စစ်ကောင်စီတပ်ဖွဲ့တွေက ဒီကနေ့ ဇွန်လ ၂ ရက်မှာ  ၁၅ မိနစ်ခြား တစ်ခါလောက် လက်နက်ကြီးနဲ့ ပစ်ခတ်တိုက်ခိုက်နေတယ်လို့ ကရင်နီအမျိုးသားကာကွယ်ရေးတပ် (KNDF) တာဝန်ရှိသူတစ်ဦးက ပြောပါတယ်။

စစ်ကောင်စီက လွိုင်ကော်ဘက်ကနေ အဲဒီလိုလက်နက်ကြီးနဲ့ ရမ်းသန်းပစ်ခတ်နေတာ ဖြစ်ပြီး လူနေအိမ်နဲ့ ဘုရားကျောင်းတွေ ထိခိုက်တာရှိပေမဲ့ လူထိခိုက် သေဆုံးမှုတော့ မရှိသေးဘူးလို့ KNDFအဖွဲ့ဝင်တစ်ယောက်က ပြောပါတယ်။ 

ဒီနေ့မနက်တုန်းကတော့ မိုးဗြဲဘက်မှာ အပြင်ထွက်တဲ့ ပြည်သူတစ်ယောက်ကို စစ်ကောင်စီဘက်က ပစ်ခတ်တာကြောင့် ထိခိုက်မှုရှိပြီး နောက်ဆက်တွဲအနေနဲ့ ဒေသခံ PDF အဖွဲ့နဲ့ ထိတွေ့တိုက်ပွဲ အနည်းငယ်ဖြစ်ခဲ့‌တယ်လို့ ဆိုပါတယ်။

အလားတူ ဒီးမော့ဆိုဘက်မှာလည်း ဒေသခံ PDF အဖွဲ့တွေနဲ့ စစ်ကောင်စီ တပ်တွေ ထိတွေ့တိုက်ပွဲ အနည်းငယ်ရှိခဲ့ပြီး နှစ်ဖက် ထိခိုက်ကျဆုံးတော့ မရှိဘူးလို့ သိရပါတယ်။

ဒီဗွီဘီက ဆက်သွယ်မေးမြန်းခဲ့တဲ့ ဒီနေ့ ညနေ ၄ နာရီခွဲချိန်ထိလည်း လက်နက်ကြီး ပစ်ခတ်မှုတွေ ရှိနေတယ်လို့ ဆိုပါတယ်။