ကမ္ဘာ့အကြီးဆုံးလူမှုကွန်ရက် ဖေ့စ်ဘွတ်ခ်ဟာ ကြော်ငြာလုပ်ငန်းရှင်တွေနဲ့ မမျှမတယှဉ်ပြိုင်ဖို့ သုံးစွဲသူ ဖောက်သည်တွေရဲ့ အချက်အလက်တွေကို အသုံးချနေခြင်း ရှိ၊ မရှိ ဆုံးဖြတ်ဖို့ အီးယူက ဖေ့စ်ဘွတ်ခ်ကို  စုံစမ်းစစ်ဆေးရေး ဇွန်လ ၄ ရက်မှာ စတင်လိုက်ပါတယ်။

classified ads လို ဖေ့စ်ဘွတ်ခ်မှာ တက်ကြွမှုရှိတဲ့ ဈေးကွက်တွေမှာ သူတို့နဲ့ပြိုင်ဆိုင်ရာမှာ ကြော်ငြာရှင်တွေဆီကနေ အစီအစဉ်တကျ စုဆောင်းထားတဲ့ ကြော်ငြာအချက်အလက်တွေကို သုံးပြီး အီးယူ ယှဉ်ပြိုင်မှုစည်းမျဉ်းတွေကို ဖေ့စ်ဘွတ်ခ်က ချိုးဖောက်မှု ရှိ၊ မရှိ စတင်စုံစမ်းတာဖြစ်တယ် လို့ အီးယူကော်မရှင်ရဲ့ပြောခွင့်ရအမျိုးသမီး ARIANNA PODESTA က ပြောပါတယ်။ 

စုံစမ်းစစ်ဆေးမှုရဲ့ ဒုတိယပိုင်းမှာလည်း ဖေ့စ်ဘွတ်ခ်ဟာ သူ့ရဲ့ အွန်လိုင်းကြော်ငြာဝန်ဆောင်မှု Facebook Marketplace ကို သူ့ရဲ့လူမှုကွန်ရက်တွေအားလုံးသိကြတဲ့ ဖေ့စ်ဘွတ်ခ် ပလက်ဖောင်းနဲ့ ချိတ်ဆက်ထားမှု ရှိ၊ မရှိ၊ အီးယူယှဉ်ပြိုင်မှုစည်းမျဉ်းတွေကို ချိုးဖောက်ခြင်း ရှိ၊ မရှိ ဆိုတာတွေကို အကဲဖြတ်သွားမှာဖြစ်တယ်လို့လည်း ဆိုပါတယ်။

တစ်နေ့ထဲမှာပဲ ဗြိတိသျှစုံစမ်းရေးအဖွဲ့တစ်ဖွဲ့ကလည်း အလားတူ စုံစမ်းစစ်ဆေးမှု စတင်လုပ်ဆောင်နေပါတယ်။  

Facebook's Marketplace မှာ ကြော်ငြာကြတဲ့ ကုမ္ပဏီ ၇ သန်း နီးပါးကနေ စုဆောင်းရရှိထားတဲ့ ဒေတာအချက်အလက် ဘဏ္ဍာသိုက်ကြီးကို ဖေ့စ်ဘွတ်ခ်က အလွဲသုံးစား လုပ်နေတာ ရှိ၊ မရှိ စုံစမ်းစစ်ဆေးသွားမှာဖြစ်ကြောင်း  ဥရောပကော်မရှင်နဲ့ ဗြိတိန်နိုင်ငံရဲ့ ယှဉ်ပြိုင်မှုနှင့် ဈေးကွက်များ အာဏာပိုင်အဖွဲ့တို့က သီးခြားစီ ပြောကြားခဲ့တာပါ။ 

ဖေ့စ်ဘွတ်ခ် ကလည်း သူဟာ အီးယူနဲ့ယူကေတို့ရဲ့ စုံစမ်းစစ်ဆေးမှုတွေမှာ အတူတကွ အပြည့်အဝ ပူးပေါင်းဆောင်ရွက်သွားမယ်လို့ ပြောထားပါတယ်။