ထိုင်းနိုင်ငံမှာ ပြည်သူ ၂၃ ရာခိုင်နှုန်းကျော်ဟာ  ကိုဗစ်-၁၉ ကာကွယ်ဆေး ၁ ကြိမ် ထိုးနှံပြီးဖြစ်ကာ တရားဝင်ကာကွယ်ဆေးအမျိုးအစား ၄ မျိုးအသုံးပြုနေတယ်လို့ နေးရှင်းသတင်းမှာ ဖော်ပြပါတယ်။

ထိုင်းနိုင်ငံ အဆင့်မြင့်ပညာရေး၊ သိပ္ပံ၊ သုတေသနနှင့် ဆန်းသစ်တီထွင်မှုဝန်ကြီးဌာနက ထုတ်ပြန်တဲ့ ကိန်းဂဏန်းအချက်အလက်တွေအရ ပြည်သူ ၆ ဒသမ ၇ ရာခိုင်နှုန်း ကတော့ ကာကွယ်ဆေး ၂ ကြိမ်၊ ဆေးဘက်ဆိုင်ရာ ကျန်းမာရေး ပညာရှင်တွေအများစု ပါဝင်တဲ့ ၀ ဒသမ ၃ ရာခိုင်နှုန်းကတော့ ၃ ကြိမ်ထိုးနှံပြီးဖြစ်တယ်လို့ ဆိုပါတယ်။

လတ်တလော တရားဝင် အသုံးပြုနေတဲ့ ကိုဗစ်-၁၉ ကာကွယ်ဆေးအမျိုးအစား ၄ မျိုးကတော့ Sinovac ကာကွယ်ဆေး ၄၈ ဒသမ ၇၇ ရာခိုင်နှုန်း၊ AstraZeneca ကာကွယ် ဆေး ၄၃ ဒသမ ၉၅ ရာခိုင်နှုန်း၊ Sinopharm ကာကွယ်ဆေး ၇ ရာခိုင်နှုန်းနဲ့ Pfizer ကာ ကွယ်ဆေး ၀ ဒသမ ၂၈ ရာခိုင်နှုန်း ဖြစ်တယ်လို့ ဆိုပါတယ်။

လူဦးရေနဲ့ ရာခိုင်နှုန်းအလိုက် ကာကွယ်ဆေးထိုးနှံပေးမှု အများဆုံးခရိုင်တွေထဲမှာတော့ ဖူးခက်က ၇၅ ဒသမ ၉ ရာခိုင်နှုန်းနဲ့ အများဆုံးထိုးနှံပေးပြီးဖြစ်ကာ အဲဒီနောက်မှာတော့ ဘန်ကောက်က ၇၀ ဒသ မ ၂ ရာခိုင်နှုန်း၊ လရောင်က  ၄၁ ဒသမ ၆ ရာခိုင်နှုန်း၊ ဖန်ငက ၄၁ ဒသမ ၁ ရာခိုင်နှုန်းစီ အသီးသီး ထိုးနှံပြီးဖြစ်တယ်လို့ ဆိုပါတယ်။

လက်ရှိအချိန်ထိ ထိုင်းနိုင်ငံတဝန်း ရောဂါကူးစက်ခံရသူ စုစုပေါင်း ၇ သိန်း ၇ သောင်းကျော်၊ သေဆုံးသူပေါင်း ၆,၃၀၀ ကျော် ရှိနေပြီး ကမ္ဘာ့နိုင်ငံတွေထဲ ရောဂါကူးစက် မှု အမြင့်ဆုံးအဆင့် ၃၇ နေရာမှာ ရှိနေပါတယ်။

တကမ္ဘာလုံးအတိုင်းအတာနဲ့ ရောဂါကူးစက်ခံရသူ ၂၀၃ သန်းကျော်၊ သေဆုံးသူ ၄ ဒသမ ၃သန်းကျော်နဲ့ ရောဂါပြန်လည်ပျောက်ကင်းလာသူအရေအတွက်ကတော့ ၁၈၂ သန်းကျော် ရှိပါတယ်။