ဂရေ့စ်လို့ နာမည်ပေးထားတဲ့ ဟာရီကိန်းမုန်တိုင်းဟာ မက္ကဆီကိုနိုင်ငံကို  သြဂုတ် ၂၁ ရက်က ဖြတ်သန်းတိုက်ခတ်လို့ လူ ၈ ဦးထက် မနည်းသေဆုံးခဲ့ပါတယ်။

နှစ်အတော်များများအတွင်း မက္ကဆီကို ပင်လယ်ကွေ့ကို ဝင်ခဲ့တဲ့ အင်အားအပြင်းဆုံး မုန်တိုင်းဖြစ်ခဲ့တာမို့ ဆိုးဆိုးရွားရွား ရေကြီးပြီး ရွှံ့မြေတွေ ပြိုကျခဲ့တာပါ။

လေတိုက်နှုန်း ၁ နာရီ ၁၂၅ မိုင်နဲ့ တိုက်ခတ်ခဲ့လို့ အဆင့် ၅ ဆင့်ရှိတဲ့ ဆက်ဖီယာ ဆင်မ်ဆွန် စနစ်အရ အဆင့် ၃ ဟာရီကိန်းမုန်တိုင်း ဖြစ်ခဲ့ပါတယ်။

မနက်အစောပိုင်းမှာတော့ ဗေရာခရုဇ်ပြည်နယ် တေကိုလွတ်လာ အပန်းဖြေစခန်းနားကနေ မုန်တိုင်းက ကုန်းတွင်းကို ဝင်ရောက်ခဲ့ပါတယ်။

မုန်တိုင်းကြောင့် ပြတင်းပေါက်တွေ၊ လျှပ်စစ်ဓာတ်အား လိုင်းတွေ၊ ကြေးနန်းတိုင်တွေ သစ်ပင်တွေ ပျက်စီးပြိုလဲခဲ့ပြီး အပျက်အစီးတွေ တမြို့လုံးမှာ ပြန့်ကျဲနေတယ်လို့ ဒေသခံ အာဏာပိုင်တွေက ပြောပါတယ်။ 

မုန်တိုင်းဟာ အမြန် အားပျော့သွားကာ တောင်ထူတဲ့ ကုန်းတွင်းပိုင်းဆီကို ရွေ့လျား တိုက်ခတ်နေပြီး ညနေ ၄ နာရီ လောက်မှာ မက္ကဆီကိုနိုင်ငံ အလယ်ပိုင်းကို လေတိုက်နှုန်း  ၁ နာရီ ၂၅ မိုင်နဲ့ ဆက်လက် တိုက်ခတ်ကာ လောလောဆယ် မက်ဆီကိုစီးတီးမြို့တော်ရဲ့ အနောက်မြောက် အရပ် ၆၅ မိုင် အကွာကို ဗဟိုပြုနေတယ်လို့ မိုင်ယာမီအခြေစိုက်အမျိုးသား ဟာရီကိန်းဌာန (NHC) က ခန့်မှန်းထားပါတယ်။