မက္ကဆီကိုနိုင်ငံထဲက တိုင်းရင်းသားလူ့အဖွဲ့အစည်းဝင်တွေဟာ မြို့တော် မက္ကဆီကိုစီးတီးက ဇိုကာလိုရင်ပြင်ကို သြဂုတ် ၉ ရက်က စုရုံးရောက်လာပြီး ကမ္ဘာ့တိုင်းရင်းသားများနေ့ကို ဆင်နွှဲခဲ့ကြ ပါတယ်။

မက္ကဆီကိုနိုင်ငံအတွင်း တိုင်းရင်းသားမျိုးနွယ်စု ၇၀ ကျော်ထဲမှာ တိုင်းရင်းသား နိုင်ငံသားဦးရေ ၁၇ သန်းရှိလို့ အမေရိကမှာ တိုင်းရင်းသားလူဦးရေ အများဆုံးနိုင်ငံလို့ မက္ကဆီကို သန်းခေါင်စာရင်း ဗျူရိုက ဆိုပါတယ်။

မက္ကဆီကိုတောင်ပိုင်းက မကောင်းဆိုးဝါး အကတွေနဲ့ ကျေးလက်အကတွေကို ကခုန်ခဲ့ကြပြီး ဒါဟာ စပိန် ကိုလိုနီတွေ လက်ကနေ အာဖရိက ကျွန်တွေ လွတ်မြောက်လာတဲ့ သင်္ကေတလို့လည်း ဆိုပါတယ်။

မက္ကဆီကိုနိုင်ငံဟာ ကုလသမဂ္ဂ တိုင်းရင်းသားများအခွင့်အရေး ကြေညာစာတမ်းကို လိုက်နာ ကျင့်သုံးပေမဲ့ နိုင်ငံတွင်းက တိုင်းရင်းသားတွေဟာ ထိခိုက်လွယ်ဆုံး လူမျိုးတွေထဲမှာ ပါနေတယ်လို့ ရိုက်တာသတင်းဌာနက ပြောပါတယ်။

မက္ကဆီကို လူမှုဖွံ့ဖြိုးတိုးတက်ရေး အကဲဖြတ်မူဝါဒကောင်စီ CONEVAL ရဲ့ အဆိုအရ တိုင်းရင်းသား ၇၀ ရာခိုင်နှုန်းနီးပါးဟာ ဆင်းရဲမွဲတေနေတယ်လို့ ဆိုပါတယ်။