အမေရိကန်နဲ့ မဟာမိတ်တပ်တွေ အာဖဂန်နစ္စတန်နိုင်ငံမှ  သြဂုတ် ၃၁ ရက်မတိုင်ခင် ဆုတ်ခွာဖို့ တာလီဘန်တွေက တိုက်တွန်းလိုက်ပါတယ်။

တာလီဘန်တွေဆီကနေ ထွက်ပြေးဖို့ မျှော်လင့်ချက်နဲ့ ထောင်သောင်းချီတဲ့ အာဖဂန်ပြည်သူတွေနဲ့ နိုင်ငံခြားသားတွေ ကဘူးလ်လေဆိပ်ဆီကို စုပြုံလာနေချိန်မှာ ခုလို ပြောလိုက်တာပါ။

အမေရိကန်အစိုးရဟာ သူ့တပ်တွေကို မေလ ၁ ရက် နောက်ဆုံးထား ဆုတ်ခွာမယ်ဆိုတဲ့ သတ်မှတ်ရက်ကိုလည်း တခါ လွဲချော်ခဲ့ပြီးပြီလို့ တာလီဘန် ပြောခွင့်ရ ဆူဟေးလ်ရှဟိဒ်က တရုတ် ကမ္ဘာလုံးဆိုင်ရာ ရုပ်သံကွန်ရက် CGTN နဲ့ လူတွေ့မေးမြန်းခန်းမှာ သြဂုတ် ၂၃ ရက်က ပြောပါတယ်။

“သူတို့ဟာ သူတို့ ကြေညာချက်ကို လိုက်နာသင့်တယ်။ တကယ်လို့ ချိုးဖောက်ခဲ့ရင်လည်း ဒါဟာ ရှင်းလင်းတဲ့ ချိုးဖောက်မှု ဖြစ်လာမှာပဲ။ ဘယ်လိုရှေ့ဆက်ပြီး ဘာလုပ်မယ်ဆိုတာ ဆုံးဖြတ်ဖို့က ကျနော်တို့ ခေါင်းဆောင်တွေအပေါ် မူတည်တယ်။”

အာဖဂန်နစ္စတန်နိုင်ငံထဲက အမေရိကန်တွေနဲ့ မဟာမိတ်တွေ ဘေးကင်းရာ လေကြောင်းလိုင်းနဲ့ ကယ်ထုတ်ဖို့ နောက်ဆုံးရက် သတ်မှတ်ချက်ကို သက်တမ်းတိုးမလား ဆိုတာကို အမေရိကန် သမ္မတ ဂျိုးဘိုင်ဒင်က ဆုံးဖြတ်ဖို့ မျှော်လင့်ထားပါတယ်။

အာဖဂန်ပြည်သူတချို့ နိုင်ငံထဲက မထွက်နိုင်ဖြစ်နေတဲ့ကိစ္စကို မေးရာမှာ သက်ဆိုင်ရာ စာရွက်စာတမ်းပါတဲ့ ဘယ်သူမဆို စီးပွားရေးလုပ်ငန်းသုံး လေကြောင်းလိုင်းတွေနဲ့ ကဘူးလ်ကနေ ထွက်သွားနိုင်တယ်လို့ ရှဟိဒ်က ပြောပါတယ်။

တာလီဘန် ခေါင်းဆောင်တွေဟာ ကဘူးလ်ကို သိမ်းအပြီး အစိုးရဖွဲ့ဖို့ စတင် ဆွေးနွေးနေပါပြီ။ တပ်တွေကတော့ ပြိုင်ဘက်တွေရဲ့ နောက်ဆုံးခြေကုပ်တွေကို အာရုံစိုက်နေကြတယ်လို့ ရိုက်တာက ဖော်ပြထားပါတယ်။