ထိုင်းနိုင်ငံမှာ ကိုဗစ်-၁၉ ကူးစက်ခံရသူ နေ့စဉ်ထောင်နဲ့ချီ ရှိနေပေမယ့် တဘက်က ကမ္ဘာလှည့်ခရီးသွားလုပ်ငန်းပြန်ဖွင့်ဖို့  ပြင်ဆင်နေသလို အခြေခံပညာသင်ကျောင်းပေါင်း ၁၂၀၀၀ ကျော်ကိုလည်း လာမယ့် နိုဝင်ဘာ ၁ ရက်နေ့ကစ ပြန်ဖွင့်တော့မှာ ဖြစ်ပါတယ်။ 

သက်ဆိုင်ရာ ပညာသင်ကျောင်းအသီးသီးက ကျောင်းပြန်ဖွင့်ဖို့ တင်ပြထားတာကြောင့် ပညာရေးဌာနအနေနဲ့ ကျန်းမာရေးဝန်ကြီးဌာန၊ ကူးစက်ရောဂါထိန်းချုပ်ရေးဌာနတွေနဲ့ ဆွေးနွေး တိုင်ပင်ကာ  စည်းစနစ်ကျစွာနဲ့  ဒုတိယနှစ်ဝက်စာသင်နှစ်တွေ ပြန်ဖွင့်ဖို့ သဘောတူခဲ့ကြတယ်လို့  ထိုင်းပညာရေးဝန်ကြီး နန်းဆောင်သရီနွတ် ထိန်းထောင်းန်က အောက်တိုဘာ ၂၈ ရက် သ တင်းစာရှင်းပွဲမှာ ပြောပါတယ်။

နိုဝင်ဘာ ၁ ရက်နေ့ ပြန်လည်ဖွင့်လှစ်မယ့်ထဲမှာ  အခြေခံပညာဦးစီးဌာနလက်အောက်ခံ စာသင်ကျောင်းပေါင်း ၁၂၀၀၀ ကျော်နဲ့ သက်မွေးဝမ်းကျောင်း ပညာသင်ကျောင်းပေါင်း ၁၉၂ ကျောင်းရှိကြောင်း၊ ကျောင်းပတ်ဝန်းကျင်အခြေအနေအလိုက် On - Site (စာသင်ခန်းထဲ သင်ကြားခြင်း ) ရှိသလို On line ( အွန်လိုင်း ) နဲ့ တွဲပြီး သင်ကြားတာတွေ ရှိမယ်လို့ ဆိုပါတယ်။ 

ကျောင်းဖွင့်ခွင့်တောင်းထားတဲ့ စာသင်ကျောင်းက ဆရာ/ဆရာမ နဲ့ ဝန်ထမ်းတွေဟာ အနီရင့် နဲ့ အနီရောင်ဇုံ (ကိုဗစ် ကူးစက်မှုမြင့်မားဆဲဇုန်) မှာရှိနေရင် ၈၅ ရာခိုင်နှုန်းက ကိုဗစ်-၁၉ ကာကွယ်ဆေး ၂ ကြိမ်လုံး ထိုးနှံပြီးသားဖြစ်ရမှာဖြစ်ပြီး အခြား လိမ္မော်ရောင်၊ အဝါရောင်၊ အစိမ်းရောင် စတဲ့ ဇုန်ထဲကဆိုရင် ၈၅ ရာနှုန်းအထက်က ကာကွယ်ဆေး ၁ ကြိမ် ထိုးနှံပြီး သားဖြစ်ရမယ်လို့ ဆိုပါတယ်။ 

ကာကွယ်ဆေးထိုးနှံထားသူများရဲ့ အမည်စာရင်းကို နိုဝင်ဘာ ၁ ရက်မတိုင်ခင် ပညာရေးဌာနကို ကြိုတင်ပေးပို့ရမှာဖြစ်ပြီး စာသင်ခန်းနဲ့ ပတ်ဝန်းကျင်ပြင်ဆင်ထားမှုအခြေအနေတွေလည်း သွားရောက်စစ်ဆေးမယ်လို့  ဆိုပါတယ်။ 

ကျောင်းသူကျောင်းသားတွေအနေနဲ့လည်း  မာ့က်စ်တပ်ရန်ဖို့၊ လက်ဆေးဖို့ အပူချိန်တိုင်းဖို့ တဦးနှင့်တဦး ခပ်ခွါခွါနေဖို့ သန့်ရှင်းစွာစားသောက်နေထိုင်ဖို့ လူနေသိပ်သည်းမှုရှောင်ကြဉ်ဖို့ စတဲ့အချက်တွေ လိုက်နာရမယ်လို့ ဆိုပါတယ်။

ATK ကရိယာနဲ့ ကိုဗစ်-၁၉ ပိုးစစ်ဆေးမှုကို မကြာခဏလုပ်ရမှာဖြစိပြီး စာသင်ခန်း တစ်ခန်းကို ကျောင်းသား ၂၅ ဦးထက်မပို၊  လက်တွေ့လေ့ကျင့်ခန်းတွေမှာလည်း လူ ၂၅ ဦးထက်ပို မစုဝေးရ ဆိုတဲ့အချက်တွေ ပါဝင်ပါတယ်။ 

လတ်တလောမှာ ကျောင်းသူကျောင်းသားတွေကို ဖိုက်ဇာကာကွယ်ဆေးထိုးနှံပေးနေပြီး နောက်ထပ် ၂ သန်းကျော် ရောက်လာမှာဖြစ်တဲ့အတွက် လုံလောက်စွာ ထိုးပေးနိုင်မယ်လို့  ထိုင်းပညာရေးဝန်ကြီးက ပြောသွားပါတယ်။ 

ထိုင်းနိုင်ငံကို ဗစ်-၁၉  အပြာရောင်ဇုန် (ဘေးကင်းဇုံ) ရှိ  စာသင်ကျောင်းနဲ့ ပုဂ္ဂလိကစာ သင်ကျောင်းအချို့ကတော့ On-site အနေနဲ့ရော On-line အနေနဲ့ပါ အဆင်ပြေသလို ဖွင့်လှစ်နေပါတယ်။