ဧရာဝတီတိုင်း၊ မအူပင်မြို့မှာ နိုဝင်ဘာလ ၂ ရက် မနက်ပိုင်းက ပြုလုပ်တဲ့ အာဏာသိမ်း အကြမ်းဖက်စစ်တပ်ထောက်ခံပွဲမှာ သွေးသစ္စာသီချင်းမှားယွင်းဖွင့်ခဲ့တဲ့ အမျိုးသားတယောက်ကို စစ်ကောင်စီတပ်သားတွေက ရိုက်နှက်ဖမ်းဆီးသွားတယ်လို့ သိရပါတယ်။

တပ်ထောက်ခံပွဲလုပ်ဖို့ ကားကို အတင်းအဓမ္မချောဆွဲလာပြီး ကားပေါ်မှာ အသံချဲ့စက်တင် ချက်ချင်းဖွင့်ခိုင်းချိန်မှာ သီချင်းမှားဖွင့်ခဲ့မိလို့ လူကိုရိုက်နှက်ဖမ်းသွားတယ်လို့ ဒေသခံတွေက ပြောပါတယ်။

"'အရေးကြီးပြီ ညီနောင်အပေါင်းတို့'' သီချင်းသံကြီးကထွက်လာတော့ချက်ချင်းပိတ်ခိုင်းပြီး သူ့ကို စစ်သားတွေက ရိုက်နှက်ပြီးခေါ်သွားတာ။ ဘယ် ခေါ်သွားတာလဲတော့မသိဘူး။ ကားကိုတော့ရဲစခန်းထဲထည့်ထားတယ်''လို့ ဒေသခံတဉီးက ပြောပါတယ်။

တပ်ထောက်ခံပွဲ သီချင်းမှားဖွင့်လို့ ဖမ်းဆီးခံရသူဟာ မအူပင်မြို့ မြို့သစ် (၂)လမ်းနေထိုင်တဲ့ ကို ညီညီဆိုသူဖြစ်တယ်လို့ ဆိုပါတယ်။

မအူပင်မြို့မှာ လူ ၅ ဉီးထက်ပိုမစုရအမိန့်ကို အာဏာသိမ်းစစ်ကောင်စီက ထုတ်ပြန်ထားပေမယ့် တပ်ထောက်ခံပွဲကို လူအင်အား ရာနဲ့ချီပြုလုပ်ခဲ့တာလို့ သိရပါတယ်။