စစ်ကိုင်းတိုင်း၊ မုံရွာမြို့၊ ချမ်းမြဝတီရပ်ကွက်က တိုင်းဆည်မြောင်းရုံးမှာ တပ်စွဲထားတဲ့ စစ်ကောင်စီတပ်ကို ဒေသခံပြည်သူ့ကာကွယ်ရေးတပ်ဖွဲ့ ၄ ဖွဲ့  စုပေါင်းပြီး နိုဝင်ဘာ ၈ ရက် မနက် ၁၀ နာရီလောက်က ဝင်ရောက်ပစ်ခတ်ခဲ့တာကြောင့် စစ်သား ၄ ယောက်  ဦးခေါင်း ကျည်ထိမှန် သေဆုံးသွားပါတယ်။

ပစ်ခတ်ခံရမှုနဲ့ပတ်သက်လို့ အသေးစိတ်သိရှိနိုင်ဖို့ တိုင်းဆည်မြောင်းရုံးကို ဆက်သွယ်ခဲ့ပေမဲ့ ဖုန်းလက်ခံဖြေဆိုခြင်းမရှိတဲ့အတွက် အဆိုပါဌာနရဲ့ ဝန်ထမ်းတဦးဆီကိုဆက်သွယ် မေးမြန်းရာမှာ အစောင့်စစ်သားတွေ ပစ်ခတ်ခံရလို့ စစ်သား ၄ ဦး သေဆုံးကာ ဒဏ်ရာရရှိသူတွေလည်းရှိတယ်လို့ ပြောပါတယ်။

အဲဒီ တိုက်ခိုက်မှုကို PDF-South Monywa၊ Monywa Heroes Group ၊ Monywa UG Group နဲ့ Monywa Night King တို့ ပူးပေါင်းတိုက်ခိုက်ခဲ့တာဖြစ်ပြီး စစ်သား ၄ ဦး သေဆုံးတယ်လို့ Monywa UG Group တာဝန်ခံကလည်း အတည်ပြု ပြောဆိုပါတယ်။

''အဲဒီ ရုံးဘက်က သေနတ်သံတွေကြားရပြီး လမ်းပေါ်မှာ လူတွေ ရှင်းသွားတယ်။ နောက်ပြီး စစ်ကားတွေ၊ ရဲကား တွေ၊ လူနာတင်ယာဉ်တွေ သွားတာမြင်လိုက်တယ်'' လို့ အမည်မဖော်လို့သူ ဒေသခံ တဦးက ဆိုပါတယ်။

ပစ်ခတ်မှုအပြီးမှာ အခင်းဖြစ်ရာနေရာကို စစ်သားတွေ ထပ်မံရောက်လာပြီး လမ်းတွေကိုပိတ်ဆို့ စစ်ဆေးတာတွေပြုလုပ်နေတယ်လို့ ဒေသခံက  ပြောပါတယ်။

စစ်ကိုင်းတိုင်းမှာ ဒေသခံပြည်သူ့ကာကွယ်ရေးတပ်ဖွဲ့တွေရဲ့ တိုက်ခိုက်မှုကြောင့် အကြမ်းဖက်စစ်ကောင်စီတပ်တွေ အထိနာပြီး သေဆုံးထိခိုက်ပျက်ဆီးမှုတွေ များပြားနေသလို စစ်ကောင်စီကလည်း တပ်သားအင်အားတွေ တိုးမြှင့်ချထားနေပါတယ်။