ပေါ့ပ်စတား ဘရစ်တနီစပီးယားစ်ကို ၁၃ နှစ်ကျော် ကန့်သတ်ချုပ်ချယ်ထားတဲ့ အုပ်ထိန်းခွင့်စနစ်ကို လော့စ်အိန်ဂျလိစ် တရားသူကြီးတစ်ဦးက အဆုံးသတ်ပေးပြီးနောက်မှာတော့ သူ့ရဲ့ဘဝနဲ့ ငွေကြေးဆိုင်ရာ လွတ်လပ်မှုကို နိုဝင်ဘာ ၁၂ ရက်မှာ ပြန်လည်ရရှိခဲ့ပါတယ်။ 

“ ဒီနေ့ (နိုဝင်ဘာ ၁၂ ရက်)  ကနေ စတင်အကျုံးဝင်ပြီး ဘရစ်တနီစပီးယားစ်ရဲ့ လူပုဂ္ဂိုလ်နဲ့ပိုင်ဆိုင်မှုကို အုပ်ထိန်းထားခွင့်ကို ဤဥပဒေဖြင့် ရပ်ဆိုင်းလိုက်သည်” လို့  တရားသူကြီး ဘရန်ဒါပန်နီက  အမိန့်ချလိုက်ပြီးနောက် မိနစ် ၃၀ ကြာ ကြားနာမှုအပြီးမှာ ဆန့်ကျင်ကန့်ကွက်သူ မရှိ အမှုပြီးဆုံးသွားပါတယ်။

တရားရုံးအပြင်ဘက်မှာ ဒါဇင်နဲ့ချီတဲ့ ပရိသတ်တွေက လက်ပြ နှုတ်ဆက်တဲ့ ပန်းရောင် သင်္ကေတတွေနဲ့ ဝှေ့ယမ်းပြီး ဆုံးဖြတ်ချက်ကို သဘောကျစွာ အားပေးခဲ့ကြပါတယ်။  တချို့ကလည်း ဘရစ်တနီရဲ့ နာမည်ကျော်သီချင်း “Stronger” ကို သီဆိုကခုန်ကြပါတယ်။ 

နိုဝင်ဘာ ၁၂ ရက် ကြားနာမှုကို ဘရစ်တနီ မတက်ရောက်ခဲ့ပေမဲ့ လူမှုကွန်ရက်မှာတော့ “ကျမ ပရိသတ်တွေကို အရမ်းချစ်တယ် ရူးသွပ်တယ်!!! ကျန်တဲ့အချိန်တွေမှာတော့ ငိုမိမယ်ထင်တယ်!!!! အကောင်းဆုံးနေ့တစ်နေ့” လို့ ဆိုခဲ့ပါတယ်။

တရားရုံးအပြင်ဘက်မှာ ပေါ့ပ်စတားရဲ့ရှေ့နေက ဘရစ်တနီကို ကျေးဇူးတင်ကြောင်း ပြောသွားပြီး ဥပဒေရေးရာအစီအစဉ်ကို အဆုံးသတ်ဖို့အတွက် မရှိမဖြစ် လိုအပ်တယ်လို့ ပြောခဲ့တဲ့အတိုင်း #FreeBritney လှုပ်ရှားမှုမှာ ပါဝင်ပေးခဲ့တဲ့ ပရိသတ်တွေကို ကျေးဇူးတင်ရှိကြောင်း ထုတ်ဖော်ပြောကြားသွားပါတယ်။

အသက် ၃၉ နှစ်အရွယ် ကမ္ဘာကျော် ပေါ့ပ်အဆိုတော် ဘရစ်တနီစပီးယားစ်ဟာ ၂၀၀၇ ခုနှစ်မှာ အများပြည်သူသိ ဖရိုဖရဲဖြစ်ခဲ့ရပြီး မဖော်ပြနိုင်တဲ့ စိတ်ကျန်းမာရေးပြဿနာတွေကြောင့် ဆေးရုံတက်ခဲ့ရပြီးနောက်မှာ သူ့ရဲ့အဖေ ဂျေမီစပီးယားစ်က အုပ်ထိန်းခွင့်လျှောက်ထားပြီး ကြီးကြပ်ခဲ့ပါတယ်။

ဘရစ်တနီရဲ့ ငွေကြေးတွေအပေါ် စီမံခန့်ခွဲမှု အလွဲအမှားတွေ ဖြစ်လာပြီးနောက်မှာ ဘရစ်တနီစပီးယားစ်ဟာ ၂၀၀၈ ခုနှစ်ကတည်းက သူ့ရဲ့ကိုယ်ရေးကိုယ်တာဘဝနဲ့ ဒေါ်လာ သန်း ၆၀ ပိုင်ဆိုင်မှုကို ထိန်းချုပ်ထားတဲ့  အုပ်ထိန်းခွင့်ဥပဒေကို ရပ်ဆိုင်းပေးဖို့ တရားရုံးကို လနဲ့ချီ လျှောက်ထား အသနားခံခဲ့တာပါ။

အဆိုတော်ဟာ ကမ္ဘာတဝန်း အောင်မြင်စွာဖျော်ဖြေပြီး ဒေါ်လာသန်းပေါင်းများစွာ ဝင်ငွေရရှိနေချိန် ဘာကြောင့် ကန့်သတ်ချုပ်ချယ်မှုတွေအောက်မှာ နေထိုင်ခဲ့ရသလဲလို့ မေးခွန်းထုတ်ထားတဲ့ မှတ်တမ်းရုပ်ရှင်တွေနဲ့ #FreeBritney လှုပ်ရှားမှုတို့ကြောင့် ပြီးခဲ့တဲ့နှစ်က ဒီကိစ္စအပေါ် လူတွေစိတ်ဝင်စားမှု မြင့်တက်ခဲ့ပါတယ်။

ဘရစ်တနီရဲ့ ဖခင်ကတော့ သူ့သမီးရဲ့ အသက်မွေးဝမ်းကျောင်း ပြန်လည်ထူထောင်ရာမှာ ကူညီပေးခဲ့ပြီး အကောင်းဆုံးအကျိုးအတွက် အမြဲလုပ်ဆောင်ခဲ့တယ်လို့ ရှေ့နေတွေကတဆင့် ပြောခဲ့ပါတယ်။