ယီမင် စစ်ရာဇဝတ်မှုများစုဆောင်းရေးအဖွဲ့ ဖွဲ့စည်းရန် ကုလညီလာခံတွင် တောင်းဆို

ယီမင်နိုင်ငံရဲ့ခါးသီးတဲ့ပဋိပက္ခမှာ နောင်ကာလ တရားစွဲဆိုနိုင်ဖို့ ဖြစ်နိုင်တဲ့စစ်ရာဇ၀တ်မှုဆိုင်ရာ အထောက်အထားတွေကို ဘက်ပေါင်းစုံကနေ စုဆောင်းထိန်းသိမ်းမယ့် အမှီအခိုကင်းတဲ့ ကျွမ်းကျင်သူတွေရဲ့အဖွဲ့သစ်တခုကို ဖွဲ့စည်းဖို့ တက်ကြွလှုပ်ရှားသူ အုပ်စုတွေက ကုလသမဂ္ဂ အထွေထွေညီလာခံမှာ ဒီဇင်ဘာ ၂ ရက်က တောင်းဆိုပါတယ်။
ဘာရိန်း၊ ရုရှားနဲ့ တခြားကုလသမဂ္ဂလူ့အခွင့်အရေးကောင်စီမှ အဖွဲ့ဝင်တွေဟာ ယီမင်က စစ်ရာဇ၀တ်မှုတွေ စုံစမ်းစစ်ဆေးမှုတွေကို ပိတ်ပစ်ဖို့ အောက်တိုဘာလက မဲခွဲဆုံးဖြတ်ဖို့ တွန်းအားပေးခဲ့ပါတယ်။
Human Rights Watch နဲ့ Amnesty International အပါအဝင် အဖွဲ့ ၆၀ လောက်က စုံစမ်းစစ်ဆေးမှု အသစ်ပြုလုပ်ဖို့ ပူးတွဲကြေညာချက်မှာ တောင်းဆိုထားပြီးတော့ လွန်ခဲ့တဲ့ ၄ နှစ်လောက်က ဂျီနီဗာအခြေစိုက် ကျွမ်းကျင်သူအဖွဲ့ ဖွဲ့စည်းထားတာကို ဖြိုခွင်းဖို့ အပြင်းအထန် ရန်လိုတဲ့စည်းရုံးလှုံ့ဆော်တယ် ဆိုပြီး ဆော်ဒီအာရေဗျနဲ့ အာရပ်စော်ဘွားများ ပြည်ထောင်စုတို့ကို စွပ်စွဲခဲ့ပါတယ်။
ဆော်ဒီဦးဆောင်တဲ့ ညွန့်ပေါင်း လေကြောင်းတိုက်ခိုက်မှု အပြင် အီရန်မဟာမိတ် ဟူသီ တိုက်ခိုက်ရေးသမားတွေက ဒုံးကျည်တွေနဲ့ ပစ်ခတ်မှုတွေကြောင့် လူပေါင်း ၁ သိန်းကျော် သေဆုံး ပြီး လေးသန်းကျော် အိုးအိမ်စွန့်ခွာ ထွက်ပြေးခဲ့ရပါတယ်။
၂၀၁၄ ခုနှစ်က ဟူသီတပ်ဖွဲ့တွေဟာ မြို့တော်ဆာနာမှာ နိုင်ငံတကာ အသိအမှတ်ပြု အစိုးရကို ဖြုတ်ချလိုက်ပြီးနောက်မှာ ဆော်ဒီဦးဆောင်တဲ့ ဆွန်နီမွတ်စလင်ညွန့်ပေါင်းအဖွဲ့ဟာ ၂၀၁၅ ခုနှစ် မတ်လမှာ ယီမင်နိုင်ငံမှာ ဝင်ရောက်စွက်ဖက်ခဲ့ပါတယ်။
ဆော်ဒီအာရေးဗီးယားနဲ့ ဟူသီတပ်ဖွဲ့တွေ အပါအဝင် ယီမင်ရှိ ပဋိပက္ခမှာ ပါဝင်သူတွေဟာ အချိန်အတော်ကြာတဲ့အထိ ရက်စက်ကြမ်းကြုတ်မှုတွေကို ပြစ်ဒဏ်ကင်းလွတ် ကျူးလွန်ခဲ့ကြ ကြောင်း Amnesty International ရဲ့ အထွေထွေအတွင်းရေးမှူး အဂနက်စ်ကယ်လ်လာမတ်ဒ်က သတင်းစာရှင်းလင်းပွဲမှာ ပြောကြားခဲ့ပါတယ်။